༣
ང་ཚོར་དཀོན་མཆོག་གི་སྲས་ཟེར་བས། ཡབ་ཀྱིས་ང་ཚོར་ཇི་ལྟ་བུའི་བྱམས་པ་མཛད་པར་ལྟོས། དེ་ལྟར་ཡིན་ཡང་ཡིན། འཇིག་རྟེན་གྱིས་ཁོང་མ་ཤེས་པས་ང་ཚོའང་མི་ཤེས་སོ། ༢ གཅེས་པ་རྣམས། ད་ལྟ་དཀོན་མཆོག་གི་སྲས་ཡིན། ཕྱིར་ཅི་འགྱུར་ད་དུང་མ་མངོན། ཁོང་མངོན་པའི་ཚེ་ན་ཁོང་ཇི་ལྟར་ཡིན་པ་དེ་ལྟར་མཇལ་བས་ང་ཚོའང་ཁོང་དང་འདྲ་བར་འགྱུར་བ་ང་ཚོས་ཤེས་སོ། ༣ དེ་འདྲའི་རེ་བ་བྱེད་པ་རྣམས་ཀྱིས། ཁོང་དྲི་མེད་ལགས་པ་ལྟར་རང་གི་དྲི་མ་འདག་པར་བྱེད་དོ༎༤ སྡིག་པ་ནི་བཀའ་ཁྲིམས་ལས་འགལ་བ་ཡིན་པས། སུས་སྡིག་པ་བྱེད་ན་བཀའ་ཁྲིམས་དང་འགལ་བ་ཡིན། ༥ ཁོང་གི་ནང་ན་སྡིག་པ་མེད་ཅིང་། སྡིག་པ་མེད་པར་མཛད་པའི་ཕྱིར་བྱོན་པ་ཁྱེད་ཚོས་ཤེས་སོ། ༦ ཁོང་ནང་གནས་པ་དེས་སྡིག་པ་མི་བྱེད། སྡིག་པ་བྱེད་པ་དེས། ཁོང་མ་མཇལ་ཞིང་མ་ཤེས་པ་ཡིན། ༧ ཕྲུ་གུ་རྣམས། ཁྱེད་བསླུ་རུ་མ་ཆུག་ཅིག དྲང་པོ་བྱེད་པ་དེ་ཁོང་དང་འདྲ་བར་དྲང་པོ་ཡིན། ༨ བདུད་ཀྱིས་ཐོག་མ་ནས་སྡིག་པ་བྱེད་པས། སྡིག་ཅན་རྣམས་བདུད་ཀྱི་ཡིན། དཀོན་མཆོག་གི་སྲས་བྱོན་པའི་དོན་ནི། བདུད་ཀྱི་ལས་ཚར་གཅོད་པའི་ཕྱིར་རོ། ༩ དཀོན་མཆོག་ནས་སྐྱེས་པ་དེས་སྡིག་པ་མི་བྱེད། དེའི་ནང་དཀོན་མཆོག་གི་སྙིང་པོ་ཡོད། དཀོན་མཆོག་ནས་སྐྱེས་པ་ཡིན་པས་དེས་སྡིག་པ་བྱེད་མི་སྲིད། ༡༠ དེ་ལས་དཀོན་མཆོག་གི་སྲས་སམ་བདུད་ཀྱི་བུ་གང་ཡིན་པ་ཤེས་སོ། དྲང་པོ་མི་བྱེད་པ་དང་། སྤུན་ལ་མི་བྱམས་པ་དེ་དཀོན་མཆོག་ནས་མིན།
༡༡ ང་ཚོས་གཅིག་གིས་གཅིག་ལ་བྱམས་པ་བྱེད་དགོས་པ་དེ་ནི་ཁྱེད་ཀྱི་ཐོག་མ་ནས་ཐོས་པའི་ཕྲིན་དེ་ཡིན། ༡༢ བདུད་ཀྱི་ཡིན་ཅིང་རང་གི་ནུ་བོ་བསད་པའི་ཀ་ཡིན་ལྟར་མ་གྱུར་ཅིག རང་གི་ལས་རྣམས་ངན་ཅིང་ནུ་བོའི་ལས་རྣམས་དྲང་བས་བསད་དོ། ༡༣ སྤུན་རྣམས། འཇིག་རྟེན་གྱིས་ཁྱེད་ལ་སྡང་བས་ངོ་མཚར་དུ་མ་གྱུར་ཅིག ༡༤ ང་ཚོས་ནི་སྤུན་ལ་བྱམས་པས། འཆི་བ་ནས་གསོན་པ་ཉིད་ནང་ཞུགས་པ་ང་ཚོས་ཤེས་སོ། སྤུན་ལ་མི་བྱམས་པ་དེ་འཆི་བའི་ནང་གནས་སོ། ༡༥ སྤུན་ལ་སྡང་བ་དེ་མི་བསད་ཡིན། མི་བསད་ཀྱི་ནང་དུ་ཚེ་མཐའ་མེད་པ་མི་གནས་པ་ཁྱེད་ཚོས་ཤེས་སོ། ༡༦ ཁོང་གིས་ང་ཚོའི་ཕྱིར་ཉིད་ཀྱི་སྐུ་སྲོག་གནང་བས། བྱམས་པ་ཅི་ཡིན་པ་ང་ཚོས་ཤེས་སོ། ང་ཚོས་ཀྱང་སྤུན་གྱི་ཕྱིར་རང་གི་སྲོག་གཏོང་བར་རིགས་སོ། ༡༧ ནོར་རྫས་ཡོད་པ་ཞིག་གིས་སྤུན་དགོས་རྒྱགས་ཅན་ཞིག་མཐོང་བཞིན་དུ། སྙིང་མི་བརྩི་ན། དེའི་ནང་དཀོན་མཆོག་གི་བྱམས་པ་ཇི་ལྟར་གནས། ༡༨ ཕྲུ་གུ་རྣམས། ང་ཚོས་ངག་དང་ཚིག་གིས་མ་ཡིན་པར་བདེན་པར་ལས་ཀྱི་སྒོ་ནས་བྱམས་པ་བྱེད་པར་རིགས་སོ༎
༡༩ དེའི་ཕྱིར། ང་ཚོའི་སྙིང་གིས་རང་ལ་འགལ་འགེལ་བའི་ཚེ། ང་ཚོ་བདེན་པ་ཉིད་ཀྱི་ཡིན་པར་ཤེས་ཤིང་། ཁོང་གི་དྲུང་དུ་བློ་བདེར་སྡོད་པར་བྱ། ༢༠ ང་ཚོའི་སྙིང་ལས་དཀོན་མཆོག་ཆེ་ཞིང་ཁོང་གིས་ཐམས་ཅད་མཁྱེན་ནོ། ༢༡ གཅེས་པ་རྣམས། ང་ཚོའི་སྙིང་གིས་རང་ལ་འགལ་མི་འགེལ་ན། དཀོན་མཆོག་གི་དྲུང་དུ་ང་ཚོ་མི་ཞུམ། ༢༢ ཁོང་གི་བཀའ་རྒྱ་སྲུང་ཞིང་ཁོང་གི་དགྱེས་པ་བསྒྲུབས་པས། ཅི་ཞུ་བ་དེ་གནང་བར་འགྱུར་རོ། ༢༣ ང་ཚོར་བཀའ་སྩལ་པ་བཞིན། ཁོང་གི་སྲས་ཡེ་ཤུ་མཱ་ཤི་ཀའི་མཚན་ལ་དད་ཅིང་། གཅིག་གིས་གཅིག་ལ་བྱམས་པ་དེ་ནི་ཁོང་གི་བཀའ་རྒྱ་ཡིན། ༢༤ བཀའ་རྒྱ་སྲུང་བ་ཐམས་ཅད་ཁོང་ནང་གནས་ཤིང་། ཁོང་ཡང་དེའི་ནང་བཞུགས་སོ། དེ་ཡིས་ཁོང་ང་ཚོའི་ནང་བཞུགས་པ་ང་ཚོར་གནང་བའི་ཐུགས་ཉིད་ཀྱི་སྒོ་ནས་ཤེས་སོ༎