རྒྱུ་ཅིས་ཁྱེད་ཚོའི་ནང་དམག་དང་འཐབ་མོ་བྱུང་། ཁྱེད་ཚོའི་ལུས་ཀྱི་འདོད་པ་དབང་ཆེ་བའི་རྐྱེན་གྱིས་བྱུང་བ་མིན་ནམ། ༢ ཁྱེད་ཚོས་འདོད་པ་ལྟར་མ་ཐོབ་པས་མིའི་སྲོག་གཅད་དོ། བརྣབ་སེམས་བྱེད་ཅིང་མ་ཐོབ་པས་འཐབ་མོ་བྱེད་ཅིང་དམག་རྒྱབ་བོ། ཁྱོད་ཚོས་མི་ཞུ་བས་མི་ཐོབ་བོ། ༣ ཞུས་ཀྱང་མི་ཐོབ་པ་ནི་རང་གི་འདོད་པ་སྤྱོད་ཕྱིར་ལོག་པར་ཞུས་པའི་རྐྱེན་གྱིས་སོ། ༤ དཀོན་མཆོག་སྤངས་པ་ཁྱེད་ཚོ་འཇིག་རྟེན་དང་མཛའ་བ་ནི་དཀོན་མཆོག་དང་འཁོན་པ་ཡིན་པར་མི་ཤེས་སམ། དེའི་ཕྱིར་འཇིག་རྟེན་གྱི་མཛའ་བོར་འགྱུར་འདོད་པ་དེས་རང་ཉིད་དཀོན་མཆོག་གི་དགྲ་བོར་བྱེད་དོ། ༥ ང་ཚོར་སྩལ་བའི་སེམས་ཉིད་ལ་ཁོང་གིས་འཁྲེན་སེམས་ཀྱིས་དུང་བར་མཛད་དོ། ཞེས་གསུང་རབ་ན་བྲིས་ཡོད་པ་དོན་མེད་ཡིན་པར་སེམས་སམ། ༦ དཀོན་མཆོག་གིས་ང་རྒྱལ་ཅན་ལ་རྒོལ་བར་མཛད་ཅིང་། སྙེམས་ཆུང་བ་ལ་ཐུགས་རྗེ་གནང་ངོ་ཞེས་གསུངས་པ་བཞིན་དུ། ཐུགས་རྗེ་ལྷག་པར་གནང་ངོ་། ༧ དེའི་ཕྱིར་དཀོན་མཆོག་གི་འབངས་བྱོས་ཤིག བདུད་ལ་རྒོལ་ཞིག་དང་ཁོ་འབྲོས་པར་འགྱུར་རོ། ༨ དཀོན་མཆོག་དང་ཉེ་བར་སོང་ཞིག་དང་། ཁོང་ཁྱེད་ཚོ་དང་ཉེ་བར་འབྱོན་པར་འགྱུར། སྡིག་ཅན་རྣམས། སྡིག་པ་ལས་ལག་པ་ཁྲུས་ཤིག ཡིད་གཉིས་བྱེད་པ་རྣམས། རང་གི་སྙིང་གཙང་མ་བྱོས་ཤིག ༩ སྡུག་བསྔལ་དང་མྱ་ངན་བྱེད་ཅིང་ངུས་ཤིག ཁྱོད་ཀྱི་དགད་མོ་ནི་མྱ་ངན་དང་། དགའ་བ་ནི་ཡི་མུག་ཏུ་སྒྱུར་ཞིག ༡༠ གཙོ་བོའི་སྤྱན་སྔར་དམན་སེམས་བཟུང་ཞིག་དང་ཁོང་གིས་ཁྱེད་ཚོ་ཡར་འདེགས་པར་འགྱུར་རོ༎