༥ ང་མ་ཀེ་དོན་རྒྱུད་ནས་འགྲོ་རྒྱུ་ཡིན་པས། དེ་རྒྱུད་ཁྱེད་ཚོའི་རྩར་འོང་ངོ་། ༦ ང་ཁྱེད་ཚོའི་རྩར་དུས་རེ་ཞིག་གམ། ཡང་ན་དགུན་ཀའང་བསྡད་སྲིད། དེ་ནས་ང་གར་འགྲོ་ནའང་ཁྱེད་ཚོས་སྐྱེལ་ཐུང་བྱེད་ཐུབ། ༧ གཙོ་བོ་མཉེས་ན་ལམ་ཐོག་ཏུ་ཕྲད་པ་ཙམ་མ་ཡིན་པར་ཡུན་རིང་ཞིག་ཁྱེད་ཚོ་དང་མཉམ་སྡོད་པར་རེའོ། ༨-༩ དགྲ་བོ་མང་པོ་ཡོད་ཀྱང་། དེའི་ཕྱིར་འབྲས་བུ་དང་ལྡན་པའི་ལས་ཀྱི་སྒོ་རྒྱ་ཆེ་བ་ཞིག་ཕྱེས་ཡོད་པས། ཉི་མ་ལྔ་བཅུ་པའི་དུས་ཆེན་གྱི་བར་དུ་ང་ཨེ་ཕེ་སུ་རུ་བསྡད་འོང་།

༡༠ ཏི་མོ་ཐེའུས་ང་དང་འདྲ་བར་གཙོ་བོའི་ལས་བྱེད་པས། དེར་བསླེབ་ན་ཁོ་ཁྱེད་མཉམ་འཇིགས་པ་མེད་པར་སྡོད་ཆུག་ཅིག ༡༡ དེ་ལ་མི་བརྙས་ཤིང་། ཉེ་ཞོ་མེད་པར་ངའི་རྩར་ཐོང་ཞིག ཁོ་བསླེབ་ཕྱིར་ང་དང་སྤུན་རྣམས་སྒུག་གིན་བསྡད་ཡོད། ༡༢ སྤུན་ཨ་པོལ་ལོ་ལ་གཞན་རྣམས་དང་མཉམ་ཁྱེད་ཚོའི་རྩར་འགྲོ་བར་ཨུ་ཚུགས་བྱས་པ་ཡིན། ད་ལྟ་དེར་འགྲོ་བར་དུས་སུ་མ་བབས་ཀྱང་། དུས་སུ་འབབ་ན་ཁོ་འོང་ངོ་༎

༡༣ བྱ་ར་བྱོས་ཤིག དད་པ་བརྟན་པོར་གནས་ཤིག དཔའ་ཞིང་རེམ་ཞིག ༡༤ ཇི་བྱེད་ནའང་བྱམས་པས་བྱོས་ཤིག

༡༥ སྟེ་ཕ་ནཱའི་ནང་ཚང་ནི་ཨ་ཁ་ཡཱའི་ནང་ནས་མཱ་ཤི་ཀ་ལ་དད་པ་ཞུ་མཁན་དང་པོ་ཡིན་པ་དང་། མཱ་ཤི་ཀ་པའི་ཞབས་ཏོག་ལ་འབུངས་པ་ཁྱེད་སྤུན་རྣམས་ཀྱིས་ཤེས་པས། ༡༦ དེ་ལྟ་བུ་རྣམས་དང་དེ་དག་ལ་གཏོགས་པ་ཐམས་ཅད་ཀྱི་ཁ་ལ་ཉོན་ཞིག་ཅེས་ཞུའོ། ༡༧ སྟེ་ཕ་ནཱ་དང་ཕོར་ཏུ་ནཱ་ཏུ་དང་ཨ་ཁ་ཡི་ཀུ་འོངས་ནས། ཁྱེད་ཚོ་དང་འཕྲད་པ་ལྟ་བུའི་དགའ་བ་འབྱུང་། ༡༨ དེ་དག་གིས་ང་དང་ཁྱེད་ཚོའི་སེམས་གསོས། དེ་འདྲའི་མི་ལ་སྟི་སྟང་བྱོས་ཤིག

༡༩ ཨ་སི་ཨའི་ཆོས་ཚོགས་རྣམས་ཀྱིས་ཁྱེད་ཚོར་ཕྱག་འབུལ་ལོ། ཨ་ཀུ་ལཱ་དང་པྲིས་ཀིལ་ལཱ་དང་། དེ་དག་གི་ཁྱིམ་དུ་ཚོགས་པ་རྣམས་ཀྱིས་གཙོ་བོའི་ནང་ན་ཁྱེད་ཚོར་ཕྱག་མང་འབུལ་ལོ། ༢༠ སྤུན་ཐམས་ཅད་ཀྱིས་ཁྱེད་ཚོར་ཕྱག་འབུལ་ལོ། དམ་པའི་འོ་བཅས་ཕན་ཚུན་ཕྱག་བྱོས་ཤིག

༢༡ ཕྱག་འབུལ་འདི་ནི་ང་རང་པའུ་ལུའི་ལག་པས་འབྲིའོ། ༢༢ གཙོ་བོ་ལ་མི་བྱམས་པ་དེ་མི་གླུད་དུ་གྱུར་ཅིག གཙོ་བོ་ཕེབས་པར་ཤོག ༢༣ ཁྱེད་ཚོར་གཙོ་བོ་ཡེ་ཤུའི་ཐུགས་རྗེ་འབབ་པར་ཤོག ༢༤ ཁྱེད་ཐམས་ཅད་ལ་མཱ་ཤི་ཀ་ཡེ་ཤུའི་ནང་ངའི་བྱམས་པ་གནས་སོ། ཨ་མེན༎ ༎