པའུ་ལུས་གྲོས་མི་རྣམས་ལ་སྤྱན་ཕུར་ཚུགས་སུ་གཟིགས་ནས། སྤུན་རྣམས། དེ་རིང་གི་བར་དུ་དཀོན་མཆོག་གི་ཞལ་ངོར་ངས་ཀུན་སློང་བཟང་པོར་སྤྱད་པ་ཡིན་གསུངས་པ་དང་། ༢ བླ་ཆེན་ཨ་ནན་ཡཱས་ཁོང་གི་དྲུང་དུ་ཡོད་པ་ཚོར། ཁོའི་ཁར་བརྡུངས་ཤིག་བསྒོས་པ་དང་། ༣ པའུ་ལུས། དཀར་རྩི་བསྐུས་པའི་རྩིག་པ་འདྲ་བར་ཁྱོད། ཁྱོད་ལ་དཀོན་མཆོག་གིས་བརྡུང་ཡོང་། བཀའ་ཁྲིམས་བཞིན་དུ་ངའི་ཞལ་ཆེ་གཅོད་པར་བསྡད་དེ། བཀའ་ཁྲིམས་དང་མི་མཐུན་པར་ང་ལ་རྡུང་བར་བསྒོའམ་གསུངས་སོ། ༤ མདུན་ལ་ཡོད་པ་ཚོས་ཁྱོད་ཀྱིས་དཀོན་མཆོག་གི་བླ་ཆེན་ལ་སྨད་དམ་ཟེར་བས། ༥ པའུ་ལུས་ངས་ཁོང་བླ་ཆེན་ཡིན་པར་མ་ཤེས། མི་སྡེའི་དཔོན་པོ་ལ་མ་སྨད་ཅེས་བྲིས་འདུག་གསུངས་སོ། ༦ པའུ་ལུས་དེ་ཚོ་ཁག་གཅིག་སད་དུ་ཀི་པ་དང་ཁག་གཅིག་ཕ་རུ་ཤི་པ་ཡིན་པར་མཁྱེན་ཏེ། སྐད་ཆེན་པོས་གྲོས་མི་ཚོར་སྤུན་རྣམས། ང་ནི་ཕ་རུ་ཤི་པའི་བུ། ཕ་རུ་ཤི་པ་ཞིག་ཡིན། གཤིན་པོ་རྣམས་ལང་བའི་རེ་བའི་སྐོར་དུ་ང་ལ་རྩོད་པ་བྱེད་དོ། ༧ ཞེས་གསུངས་པ་དང་། ཕ་རུ་ཤི་པ་དང་སད་དུ་ཀི་པའི་བར་ལ་མི་མཐུན་པ་བྱུང་སྟེ། ཚོགས་ནང་དབྱེན་པ་བྱུང་ངོ་། ༨ སད་དུ་ཀི་པས་གཤིན་པོ་ལང་བ་དང་། ཕོ་ཉ་དང་། སེམས་ཉིད་མེད་ཟེར་རོ། ཕ་རུ་ཤི་པས་ཡོད་ཟེར་རོ། ༩ ཅ་ཅོ་ཆེན་པོ་ལངས་ཏེ། ཕ་རུ་ཤི་པ་མཁན་པོ་རེ་ལངས་ནས་བརྩོད་པ་བྱེད་ཅིང་། ང་ཚོར་མི་འདིའི་ནང་སྐྱོན་ཅིའང་མི་རྙེད་དེ། སེམས་ཉིད་དམ་ཕོ་ཉས་གསུང་སྲིད་སྨྲས་སོ། ༡༠ དབྱེན་པ་དེ་དྲག་ཏུ་སོང་བ་དང་། པའུ་ལུ་ཚལ་བུར་གཏོང་ཉེན་འདུག་བསམས་ནས། སྟོང་དཔོན་གྱིས་དམག་མི་རྣམས་ལ། སོང་ལ་དེ་ཚོའི་དཀྱིལ་ནས་ཁོ་དབང་ཤུགས་ཀྱིས་ཁྱེར་ཏེ་རྫོང་དུ་ཁྲིད་ཅིག་ཅེས་བསྒོས་སོ༎