དུས་འགའ་ཞིག་ནས་སླར་ཀ་ཕར་ནཱ་ཧུམ་དུ་བྱོན་པའི་ཚེ། ཁྱིམ་དུ་བཞུགས་པའི་སྐད་ཆ་གྲགས་ནས། ༢ སྒོ་རྩ་ལའང་འདུག་ས་མི་ཐོབ་པ་ཙམ་དུ་མི་མང་པོ་འདུས་པས། ཆོས་བསྟན་པར་མཛད་དོ། ༣ མི་བཞིས་ཁུར་བའི་གཟའ་ཕོག་གཅིག་ཁོང་གི་དྲུང་དུ་བསྐྱེལ་བ་ལ། ༤ མི་ཚོགས་མང་བས་སྐུ་དྲུང་དུ་མ་ཐར་བར་བཞུགས་སའི་ཐོག་བཤུས་ཏེ། བརྟོལ་ནས། ཉལ་ཁྲི་དང་གཟའ་ཕོག་མར་ཕབ་བོ། ༥ དེ་རྣམས་ཀྱི་ཡིད་ཆེས་ལ་གཟིགས་ནས་ཡེ་ཤུས་གཟའ་ཕོག་ལ། བུ། ཁྱོད་ཀྱི་སྡིག་པ་སེལ་ཟིན་གསུངས། ༦ དེར་ཡོད་པའི་མཁན་པོ་ཁ་ཅིག་གིས། ༧ མི་འདིས་འདི་ལྟར་ཅི་ལ་སྨྲ། ཁོས་སྐུར་པ་འདེབས་སོ། དཀོན་མཆོག་གཅིག་པོས་མ་གཏོགས་སྡིག་པ་སུས་སེལ་ཐུབ་ཅེས་བསམས་པ་དང་། ༨ ཡེ་ཤུས་དེ་རྣམས་ཀྱིས་དེ་ལྟར་བསམ་པ་མཁྱེན་ནས། ཁྱེད་ཀྱི་སྙིང་ནང་འདི་ལྟར་ཅི་ལ་སེམས། ༩ གཟའ་ཕོག་འདི་ལ། ཁྱོད་ཀྱི་སྡིག་པ་སེལ་ཟིན་ཟེར་བ་སླའམ། ལངས་ཏེ་ཁྱོད་ཀྱི་ཉལ་ཁྲི་ཁུར་ནས་འགྲུལ་ཟེར་བ་སླ། ༡༠ འོན་ཀྱང་མིའི་བུ་ལ་འཇིག་རྟེན་དུ་སྡིག་པ་སེལ་བའི་དབང་ཡོད་པ་ཁྱོད་ཅག་གིས་ཤེས་པའི་ཕྱིར། ཞེས་གསུངས་ནས་གཟའ་ཕོག་དེ་ལ། ༡༡ ངས་ཁྱོད་ལ་ཟེར། ལོངས་ལ་ཉལ་ཁྲི་ཁུར་ནས་ཁྱིམ་དུ་སོང་ཞེས་གསུངས་སོ། ༡༢ ཁོ་ལངས་ནས་ཉལ་ཁྲི་ཁུར་ཏེ། མི་ཚོགས་ཀྱི་མཐོང་སར་སོང་བས། ཐམས་ཅད་ངོ་མཚར་དུ་གྱུར་ཏེ། དཀོན་མཆོག་ལ་བསྟོད་ཅིང་། ང་ཚོས་འདི་འདྲ་ནམ་ཡང་མ་མཐོང་སྨྲས་སོ༎