༡༤ ཡང་འདི་དང་འདྲ་སྟེ། མི་ཞིག་གིས་བྱེས་སུ་འགྲོ་བའི་དུས་སུ། གཡོག་པོ་བོས་ནས་ནོར་བཏད། ༡༥ རེ་རེའི་ནུས་ཚོད་ལྟར་གཅིག་ལ་རྡོ་ཚད་ལྔ། གཅིག་ལ་རྡོ་ཚད་གཉིས། གཅིག་ལ་རྡོ་ཚད་གཅིག་བཏད་ནས་སོང་ངོ་། ༡༦ རྡོ་ཚད་ལྔ་ཐོབ་པ་དེ་འཕྲལ་དུ་སོང་ནས། དེ་ལ་འབད་པས། གཞན་རྡོ་ཚད་ལྔ་འབྱོར། ༡༧ དེ་བཞིན་དུ་རྡོ་ཚད་གཉིས་ཐོབ་པ་ལའང་། གཞན་རྡོ་ཚད་གཉིས་འབྱོར། ༡༨ རྡོ་ཚད་གཅིག་ཐོབ་པ་དེས་ས་བྲུས་ཏེ། དཔོན་པོའི་དངུལ་སྦས་སོ། ༡༩ ཡུན་རིང་གི་རྗེས་སུ་དཔོན་པོ་ལོག་འོངས་ནས། རྩིས་ལེན་པ་ལས། ༢༠ རྡོ་ཚད་ལྔ་ཐོབ་པ་དེས་གཞན་ལྔ་ཕུལ་ནས། ཇོ་བོ། ཁྱེད་ཀྱིས་ང་ལ་རྡོ་ཚད་ལྔ་བཏད། ང་ལ་གཞན་ལྔ་འབྱོར་པ་ལ་གཟིགས་ཞུས་པ་དང་། ༢༡ དཔོན་པོས། ལེགས་སོ། གཡོག་པོ་བཟང་ཞིང་དྲང་པོ་ཁྱོད། ཉུང་ངུའི་ནང་ལ་དྲང་པོ་བྱས་པས། མང་པོའི་གཉེར་པ་བྱའོ། རང་གི་དཔོན་པོའི་དགའ་མོའི་ནང་འགྲོགས་ཤིག་སྨྲས་སོ། ༢༢ རྡོ་ཚད་གཉིས་ཐོབ་པ་དེས་ཀྱང་། ཇོ་བོ། ཁྱེད་ཀྱིས་ང་ལ་རྡོ་ཚད་གཉིས་བཏད། ང་ལ་གཞན་གཉིས་འབྱོར་པ་ལ་གཟིགས་ཞུས་པ་དང་། ༢༣ དཔོན་པོས། ལེགས་སོ། གཡོག་པོ་བཟང་ཞིང་དྲང་པོ་ཁྱོད། ཉུང་ངུའི་ནང་ལ་དྲང་པོ་བྱས་པས། མང་པོའི་གཉེར་པ་བྱའོ། རང་གི་དཔོན་པོའི་དགའ་མོའི་ནང་འགྲོགས་ཤིག་སྨྲས་སོ། ༢༤ རྡོ་ཚད་གཅིག་ཐོབ་པ་དེས། ཇོ་བོ། ཁྱེད་དྲག་པོ་དང་། མ་བཏབ་པའི་ས་ནས་རྔ་མཁན་དང་། མ་གཏོར་བའི་ས་ནས་སྡུད་མཁན་ཡིན་པ་ཤེས་པས། ༢༥ ང་འཇིགས་ནས་ཁྱེད་ཀྱི་རྡོ་ཚད་གཅིག་པུ་སའི་ནང་སྦས་པ་ཡིན། ཁྱེད་ཀྱི་ཡིན་པ་བཞེས་ཤིག་ཞུས་པ་དང་དཔོན་པོས། ༢༦ གཡོག་པོ་ངན་པ་ལེ་ལོ་ཅན་ཁྱོད། ང་མ་བཏབ་པའི་ས་ནས་རྔ་མཁན་དང་། མ་གཏོར་བའི་ས་ནས་སྡུད་མཁན་ཡིན་པར་ཁྱོད་ཀྱིས་ཤེས་པས། ༢༧ ངའི་དངུལ་རྗེ་མཁན་ལ་གཏོད་དགོས་པ་ཡིན། བཏད་པ་ཡིན་ན་ང་འོང་དུས་སུ། ངའི་ཡིན་པ་སྐྱེད་དང་བཅས་ལེན་ཐུབ་པ་ཡིན། ༢༨ ད་རྡོ་ཚད་དེ་ཁོ་ནས་ལེན་ཏེ། བཅུ་ཡོད་པ་དེ་ལ་ཐོང་། ༢༩ ཡོད་པ་ལ་གནང་སྟེ་མང་པོར་འགྱུར། མེད་པ་ལས་ཇི་ཡོད་པ་དེའང་ལེན་པར་འགྱུར། ༣༠ གཡོག་པོ་ཕན་མེད་དེ་ངུ་འབོད་དང་སོ་ཁྲིག་པ་འབྱུང་བའི་ཕྱི་རོལ་མུན་པའི་ནང་དབྱུག་ཅིག་ཅེས་སྨྲས་སོ༎

༣༡ མིའི་བུ་གཟི་བརྗིད་ནང་ཕོ་ཉའི་འཁོར་དང་བཅས་པ་འབྱོན་པའི་དུས་སུ། ཉིད་ཀྱི་གཟི་བརྗིད་ཀྱི་ཁྲིར་བཞུགས་པར་འགྱུར། ༣༢ མི་རྒྱུད་ཐམས་ཅད་སྐུ་དྲུང་དུ་བསྡུ་སྟེ། ལུག་རྫིས་ར་མ་ལས་ལུག་སོ་སོར་ཕྱེ་བ་ལྟར། ཁོང་གིས་དེ་རྣམས་ཀྱང་ཕྱེ་བར་འགྱུར། ༣༣ གཡས་སུ་ལུག་དང་གཡོན་དུ་ར་མ་འཇོག་ཅིང་། ༣༤ རྒྱལ་པོས་གཡས་སུ་ཡོད་པ་ལ། ཡབ་ཀྱིས་བྱིན་གྱིས་བརླབས་པ་ཁྱེད། འཇིག་རྟེན་བཀོད་པ་ནས་ཁྱེད་ཕྱིར་བཤམས་པའི་རྒྱལ་སྲིད་སྐལ་བར་ལེན་དུ་ཤོག ༣༥ ཁྱེད་ཀྱིས་ང་ལྟོགས་པ་ལ་ཁ་ཟས་བསྟེར། ང་སྐོམ་པ་ལ་བཏུང་བ་བསྟེར། ང་འགྲོན་པོར་གནས་ཚང་བཏང་། ༣༦ ང་གཅེར་བུར་གོས་བསྐོན། ང་ན་བ་ལ་བལྟས། ང་བཙོན་དུ་ཡོད་པ་ལ་མཇལ་དུ་འོངས་གསུང་བར་འགྱུར། ༣༧ དྲང་པོ་རྣམས་ཀྱིས། གཙོ་བོ་ལགས། ངེད་ཀྱིས་ཁྱེད་བཀྲེས་པའམ། སྐྱེམས་པའམ། ༣༨ འགྲོན་པོའམ། གཅེར་བུར་མཐོང་སྟེ། གསོལ་བའམ། སྐྱེམས་སམ། གནས་ཚང་ངམ། ན་བཟའ་ནམ་ཕུལ། ༣༩ ཡང་སྙུང་བའམ་བཙོན་དུ་མཐོང་སྟེ་ནམ་མཇལ་དུ་འོངས་ཞུ་བར་འགྱུར། ༤༠ རྒྱལ་པོས། ངའི་སྤུན་ཆུང་ཤོས་འདི་གཅིག་ལ་ཁྱེད་ཀྱིས་དེ་ལྟར་བྱས་པ་ནི། ང་ལ་བྱས་པ་ཡིན་ཞེས་ངས་བདེན་པར་ཟེར་གསུང་བར་འགྱུར། ༤༡ གཡོན་དུ་ཡོད་པ་ལ། དམོད་མོ་ཕོག་པ་དག ངའི་མདུན་ནས་བདུད་དང་དེའི་ཕོ་ཉའི་ཕྱིར་བཤམས་པའི་མི་འཇིག་པའི་མེའི་ནང་དུ་སོང་། ༤༢ ཁྱོད་ཀྱིས་ང་ལྟོགས་པ་ལ་ཁ་ཟས་མ་བསྟེར། ང་སྐོམས་པ་ལ་བཏུང་བ་མ་བསྟེར། ༤༣ ང་མགྲོན་པོར་གནས་ཚང་མ་བཏང་། ང་གཅེར་བུར་གོས་མ་བསྐོན། ང་ན་བ་དང་བཙོན་དུ་ཡོད་པ་ལ་མཇལ་དུ་མ་འོངས་གསུང་བར་འགྱུར། ༤༤ དེ་དག་གིས་གཙོ་བོ་ལགས། ངེད་ཀྱིས་ཁྱེད་བཀྲེས་པའམ། སྐྱེམས་པའམ། འགྲོན་པོའམ། གཅེར་བུའམ། སྙུང་བའམ། བཙོན་དུ་མཐོང་སྟེ་ནམ་བསྙེན་བཀུར་མ་བྱས་ཞུ་བར་འགྱུར། ༤༥ རྒྱལ་པོས། ཆུང་ཤོས་འདི་གཅིག་ལ་ཁྱོད་ཀྱིས་དེ་ལྟར་མ་བྱས་པ་ནི། ང་ལ་མ་བྱས་པ་ཡིན་ཞེས་ངས་བདེན་པར་ཟེར་གསུང་བར་འགྱུར། ༤༦ འདི་དག་མཐའ་མེད་པའི་ཆད་པ་དང་། དྲང་པོ་དག་མཐའ་མེད་པའི་ཚེར་ལོངས་སྤྱད་པར་འགྱུར་གསུངས་སོ༎