༣ ཁ་སྐྱུར་པོའི་རི་ལ་བཞུགས་ཡོད་པ་ལས། ཉེ་གནས་རྣམས་ཟུར་དུ་བཅར་ནས། ཁྱེད་འབྱོན་པ་དང་། དུས་ཀྱི་མཐའ་མའི་རྟགས་ཅི་ཡིན། འདི་རྣམས་ནམ་འབྱུང་འོང་ངེད་ལ་གསུང་དུ་གསོལ་ཞེས་ཞུས་པའི་བཀའ་ལན་དུ། ༤ ཁྱེད་བསླུ་བར་མ་འགྱུར་ཞིག ༥ མང་པོས་ངའི་མིང་འཁུར་ཏེ། ང་མཱ་ཤི་ཀ་ཡིན་ཟེར་ནས་མང་པོ་བསླུ་འོང་། ༦ དམག་དང་དམག་གི་སྐད་ཆ་ཐོས་འོང་ཡང་། མ་འཇིགས་ཤིག དེ་འབྱུང་དགོས། འོན་ཀྱང་ད་དུང་མཐའ་མ་མིན། ༧ མི་རྒྱུད་དང་རྒྱལ་ཁག་ཕན་ཚུན་ལང་འོང་། ས་ཆ་སོ་སོར་མུ་གེ་དང་ས་གཡོ་འབྱུང་འོང་། ༨ དེ་ཐམས་ཅད་ཟུག་གཟེར་གྱི་ཐོག་མ་ཡིན། ༩ དེ་ནས་མིས་ཁྱེད་ལ་འཚེ་བའི་ཕྱིར་བཏད་དེ་གསད་འོང་། ངའི་མིང་གི་རྐྱེན་གྱིས་མི་རྒྱུད་ཐམས་ཅད་ཀྱིས་ཁྱེད་ལ་སྡང་འོང་། ༡༠ དེའི་ཚེ་མང་པོ་དད་པ་ལོག་པར་འགྱུར། གཅིག་གིས་གཅིག་དགྲའི་ལག་ལ་གཏད། གཅིག་ལ་གཅིག་སྡང་། ༡༡ ལུང་སྟོན་པ་རྫུས་མ་མང་པོ་ལང་ཞིང་མང་པོ་བསླུ་བར་འགྱུར། ༡༢ ཁྲིམས་འཆལ་འཕེལ་བས། མང་པོའི་བྱམས་སེམས་ཉམས་པར་འགྱུར། ༡༣ འོན་ཀྱང་མཐའ་མའི་བར་དུ་བརྟན་པ་དེ་ཐར་བར་འགྱུར། ༡༤ མི་རྒྱུད་ཐམས་ཅད་ལ་དཔང་བྱེད་ཕྱིར། རྒྱལ་སྲིད་ཀྱི་ཕྲིན་བཟང་འདི་འཇིག་རྟེན་ཀུན་ཏུ་འཆད་པའི་རྗེས་སུ་མཐའ་མ་བསླེབ་བོ༎

༡༥ ཀློག་མཁན་གྱིས་གོ་ཞིག ལུང་སྟོན་པ་དཱ་ནི་ཨེལ་གྱིས་གསུངས་པའི། སྟོང་བྱེད་ཀྱི་མི་གཙང་བ་^*དེ་གནས་དམ་པ་རུ་ལང་ཡོད་པ་ཁྱེད་ཀྱིས་མཐོང་བའི་ཚེ། ༡༦ ཡ་ཧུ་དཱ་རུ་ཡོད་པ་རྣམས་རི་ལ་བྲོས་ཤིག ༡༧ ཐོག་ཁར་ཡོད་པ་ནང་ནས་ཡོ་བྱད་ལེན་དུ་མ་འབབ་ཅིག ༡༨ ཀླུངས་ལ་ཡོད་པ་གོས་ལེན་དུ་ལོག་མ་འགྲོ་ཞིག ༡༩ ཉིན་མོ་དེ་ལ་སྦྲུམ་མ་དང་ནུ་ཞོ་སྣུན་པ་རྣམས་སྙིང་རེ་རྗེ། ༢༠ ཁྱེད་འབྲོས་པ་དེ་དགུན་ཀའམ་ཤབ་བཱད་ཀྱི་ཞག་ལ་མི་འབྱུང་ཕྱིར་སྨོན་ལམ་ཐོབ་ཅིག ༢༡ འཇིག་རྟེན་གྱི་ཐོག་མ་ནས་ད་བར་དུ་མ་བྱུང་བ་དང་། ཕྱིས་ཀྱང་མི་འབྱུང་བའི་སྡུག་བསྔལ་ཆེན་པོ་དེའི་དུས་སུ་འབྱུང་འོང་། ༢༢ ཞག་དེ་མ་འཕྲི་ན་སུའང་མི་ཐར་གྱི། འདམས་པ་རྣམས་ཀྱི་དོན་དུ་ཞག་དེ་འཕྲི་འོང་། ༢༣ དེའི་ཚེ་མཱ་ཤི་ཀ་འདིར་བཞུགས་སོ་སུས་ཟེར་ན། ཡིད་མ་ཆེས་ཤིག ༢༤ མཱ་ཤི་ཀ་རྫུས་མ་དང་ལུང་སྟོན་པ་རྫུས་མ་ལང་ཞིང་། ཐུབ་ན་འདམས་པའང་བསླུ་བའི་ཕྱིར། ངོ་མཚར་ཆེ་བའི་ལྟས་སྟོན་འོང་། ༢༥ ངས་མ་འབྱུང་བའི་སྔོན་ལ་ཟེར་རོ། ༢༦ ཁོང་འབྲོག་སྟོང་ལ་བཞུགས་ཟེར་ན་ཕྱི་རོལ་དུ་མ་འགྲོ། ཁོང་ནང་དུ་བཞུགས་ཟེར་ན་ཡིད་མ་ཆེས་ཤིག ༢༧ ཤར་ནས་གློག་འཁྱུག་ཅིང་ནུབ་ཀྱི་བར་དུ་སྣང་བ་ལྟར། མིའི་བུ་ཕེབས་འོང་། ༢༨ རོ་ཡོད་སར་བྱ་རྒོད་འཁོར།

༢༩ ཉིན་མོ་དེའི་སྡུག་བསྔལ་གྱི་རྗེས་སུ།

༣༢ སེ་ཡབ་ཤིང་ལས་དཔེ་སློབས་ཤིག དེའི་ཡལ་ག་མཉེན་པར་གྱུར་ཏེ་ལོ་མ་འབུར་བ་དང་། དབྱར་ཀ་ཉེ་བར་ཤེས་སོ། ༣༣ དེ་བཞིན་དུ་ཁྱེད་ཀྱིས་དེ་ཐམས་ཅད་མཐོང་བ་དང་། དེ་ནི་སྒོ་རྩར་བསླེབས་ཡོད་པར་ཤེས་འོང་། ༣༤ དེ་ཐམས་ཅད་མ་འབྱུང་བའི་བར་དུ། མི་རབས་འདི་འདའ་བར་མི་འགྱུར་ངས་བདེན་པར་ཟེར། ༣༥ གནམ་ས་གཉིས་འདའ་ཡང་ངའི་བཀའ་འདའ་བར་མི་འགྱུར།

༣༦ ཉིན་མོ་དེ་དང་དུས་ཚོད་དེའི་སྐོར་ལ་ངའི་ཡབ་གཅིག་པུས་མ་གཏོགས། སུས་ཀྱང་མི་ཤེས། ནམ་མཁའི་ཕོ་ཉས་ཀྱང་མི་ཤེས། སྲས་ཀྱིས་ཀྱང་མི་ཤེས་སོ། ༣༧ ནོ་ཨའི་དུས་ལྟར་མིའི་བུ་འབྱོན་པ་དེ་ཡིན་པར་འགྱུར། ༣༨ ཇི་ལྟར་ཆུ་རུད་ལས་སྔོན་དུ་ནོ་ཨ་གྲུའི་ནང་ཞུགས་པའི་ཉིན་མོའི་བར་དུ། མི་རྣམས་ཀྱིས་ཟ། འཐུང་། བག་མ་གཏོང་ལེན་བྱེད་ཅིང་། ༣༩ ཆུ་རུད་ཀྱིས་ཐམས་ཅད་ཁྱེར་བའི་བར་དུ་མ་ཤེས། དེ་ལྟར་མིའི་བུ་འབྱོན་པ་ཡིན་པར་འགྱུར། ༤༠ སྐྱེས་པ་གཉིས་ཞིང་ལ་ཡོད་པ་ལས། གཅིག་འདྲེན་ཞིང་གཅིག་འབོར་བར་འགྱུར། ༤༡ བུད་མེད་གཉིས་ཀྱིས་རང་འཐག་བསྐོར་བ་ལས། གཅིག་འདྲེན་ཞིང་གཅིག་འབོར་བར་འགྱུར་རོ། ༤༢ དེའི་ཕྱིར་ཁྱེད་ཀྱི་གཙོ་བོ་ནམ་འབྱོན་པ་མི་ཤེས་པས། བྱ་ར་བྱོས་ཤིག ༤༣ ཁྱིམ་བདག་གིས་ཐུན་གང་ལ་རྐུན་མ་འོང་བ་ཤེས་པ་ཡིན་ན། མེལ་ཚེ་བྱེད་ཅིང་ཁང་པར་འཛུལ་དུ་མི་འཇུག་པ་ཤེས་ཤིག ༤༤ དེའི་ཕྱིར་ཁྱེད་ཀྱིས་མི་བསམ་པའི་དུས་ཚོད་ལ་མིའི་བུ་འབྱོན་པས། གཅང་བྱོས་ཤིག

༤༥ དུས་ཐོག་འཁོར་གཡོག་ལ་ཁ་ཟས་སྟེར་བར། དཔོན་པོས་བསྐོས་པའི་གཉེར་པ་དྲང་ཞིང་མཁས་པ་སུ་ཡིན། ༤༦ དཔོན་པོ་འོང་སྟེ་དེ་བཞིན་དུ་བྱེད་པར་མཐོང་བའི་གཡོག་པོ་བདེའོ། ༤༧ དེ་ལ་ནོར་ཐམས་ཅད་གཏད་འོང་ཞེས་ངས་བདེན་པར་ཟེར། ༤༨ གཡོག་པོ་ངན་པས་ངའི་དཔོན་པོ་འགོར་འོང་བསམས་ནས། ༤༩ གཡོག་གྲོགས་ལ་རྡུང་ཞིང་། ཆང་འཐུང་དང་འགྲོགས་ཏེ་ཟ་ཞིང་འཐུང་ན། ༥༠ དེས་མི་སེམས་པའི་ཞག་དང་མི་ཤེས་པའི་དུས་ཚོད་ལ་དཔོན་པོ་འོངས་ཏེ། ༥༡ དྲག་ཏུ་བརྡུངས་ནས་དེ་ཚོའི་སྐལ་བ་སྒྱུ་ཟོག་ཅན་དང་མཉམ་དུ་ངུ་འབོད་དང་སོ་ཁྲིག་པ་ཡོད་སར་གཏོང་བར་འགྱུར༎