ཞག་དྲུག་གི་རྗེས་སུ། ཡེ་ཤུས་པེ་ཏྲོ་དང་ཡ་ཀོབ་དང་དེའི་ནུ་བོ་ཡོ་ཧ་ནན་འཁྲིད་ནས། རི་མཐོན་པོ་ཞིག་ལ་སོ་སོར་ཕེབས་སོ། ༢ དེ་དག་གི་མདུན་དུ་ཁོང་གི་སྐུ་དབྱིབས་གྱུར་ཏེ། ཞལ་ཉི་མ་ལྟར་འོད་འཕྲོ་ཞིང་། ན་བཟའ་འོད་དཀར་པོ་ལྟར་གྱུར་ཏོ། ༣ ཡང་མོ་ཤེ་དང་ཨེ་ལི་ཡཱ་མཉམ་དུ་གསུང་གླེང་མཛད་པར་མཇལ་ཏོ། ༤ པེ་ཏྲོས་ཡེ་ཤུ་ལ། ཇོ་བོ་ལགས། ངེད་ཅག་འདིར་བཞུགས་པ་ལེགས། ཁྱེད་ཐུགས་དགྱེས་ན་ངས་འདིར་གཟིམ་གུར། ཁྱེད་ལ་གཅིག་དང་། མོ་ཤེ་ལ་གཅིག ཨེ་ལི་ཡཱ་ལ་གཅིག་སྟེ་གསུམ་ཕུབ་འོང་ཞུ་བའི་འཕྲོ་ལ། ༥ སྤྲིན་མདངས་ཅན་ཞིག་གིས་དེ་དག་ལ་བསྒྲིབས་པ་དང་། སྤྲིན་གྱི་ནང་ནས་སྒྲ་ཞིག་གིས། འདི་ནི་ང་དགའ་བའི་སྲས་གཅིག་པུ་ཡིན། ཁོང་ལ་ཉོན་ཅིག་ཅེས་གསུངས་པ། ༦ དེ་ཐོས་ནས་ཉེ་གནས་རྣམས་ཁ་བུབ་ཏུ་འགྱེལ་ཏེ། ཤིན་ཏུ་འཇིགས་སོ། ༧ ཡེ་ཤུ་བྱོན་ཏེ་ཕྱག་རེག་ནས། ལོངས། མ་འཇིགས་ཤིག་གསུངས། ༨ བལྟས་པ་ལས་ཡེ་ཤུ་གཅིག་པུ་མ་གཏོག་སུའང་མ་མཐོང་ངོ་། ༩ རི་ལས་འབབ་པའི་ཚེ། ཡེ་ཤུས། མིའི་བུ་གཤིན་པོའི་ཁྲོད་ལས་མ་བཞེང་བའི་བར་དུ། ཁྱེད་ཚོས་མཐོང་བ་འདི་སུ་ལའང་མ་འཆད་ཅེས་བཀའ་གནང་ངོ་། ༡༠ ཉེ་གནས་རྣམས་ཀྱིས། མཁན་པོ་དག་གིས་ཨེ་ལི་ཡཱ་སྔོན་དུ་ཕེབས་དགོས་ཅིའི་ཕྱིར་ཟེར་ཞུས་པའི་བཀའ་ལན་དུ། ༡༡ ཨེ་ལི་ཡཱ་འབྱོན་ཞིང་ཐམས་ཅད་གསོ་འོང་ཟེར་བ་བདེན་པ་ཡིན། ༡༢ འོན་ཀྱང་ཨེ་ལི་ཡཱ་བྱོན་ཟིན་ཞེས་ངས་ཟེར། དེ་རྣམས་ཀྱིས་ཁོང་ངོ་མ་ཤེས་པར། ཁོང་ལ་དེ་ཚོས་རང་གི་བློ་འདོད་བཞིན་བྱས་སོ། དེ་བཞིན་དུ་མིའི་བུའང་དེ་རྣམས་ཀྱི་ལག་ནས་མནར་འོང་གསུངས། ༡༣ དེ་ནས་ཁྲུས་གསོལ་མཁན་ཡོ་ཧ་ནན་གྱི་སྐོར་དུ་གསུང་བ་དེ་རྣམས་ཀྱིས་གོའོ༎