༡༤ ཡེ་ཤུས་སྐམ་ས་ལ་ཕེབས་ནས་མི་ཚོགས་ཆེན་པོ་གཟིགས་ཏེ། སྙིང་རྗེ་འཁྲུངས་ནས་དེ་རྣམས་ཀྱི་ནད་པ་གསོ་བར་མཛད་དོ། ༡༥ ཉི་མ་ཡོལ་བས་ཉེ་གནས་རྣམས་འོངས་ནས། ས་ཆ་འདི་དབེན་ཞིང་དུས་ཀྱང་ཡོལ་བས། མི་ཚོགས་ལ་ཁ་ཟས་ཉོ་རུ་ཡུལ་ཚོར་འགྲོ་བར་གནོང་ཞིག་ཞུས། ༡༦ ཡེ་ཤུས་འགྲོ་མི་དགོས་དེ་རྣམས་ལ་ཁྱེད་རང་གིས་ཟ་རྒྱུ་སྟེར་ཞིག་གསུངས། ༡༧ འདིར་བག་ལེབ་ལྔ་དང་ཉ་གཉིས་ལས་ཅིའང་མེད་ཞུས། ༡༨ དེ་ངའི་རྩར་ཁུར་ཤོག་གསུངས། ༡༩ དེ་ནས་མི་ཚོགས་རྩྭའི་ཁར་སྡོད་པའི་བཀའ་སྩལ་ནས། བག་ལེབ་ལྔ་དང་ཉ་གཉིས་པོ་ཕྱག་ཏུ་བཞེས། ནམ་མཁར་གཟིགས་ཏེ་གསོལ་བ་བཏབ་ནས། བག་ལེབ་བཅག་སྟེ་ཉེ་གནས་ལ་གནང་། ཉེ་གནས་ཀྱིས་མི་ཚོགས་ལ་གནང་ངོ་། ༢༠ ཐམས་ཅད་ཀྱིས་ཟོས་ཏེ་ཚིམ་ནས་ལྷག་པའི་བྲུལ་བུ་ཙེ་པོ་གང་བ་བཅུ་གཉིས་བླངས་སོ། ༢༡ དེར་བུད་མེད་དང་བྱིས་པ་མ་ཐེ་བར་ཟ་མཁན་སྟོང་ལྔ་ཙམ་ཡོད་དོ༎

༢༢ མི་ཚོགས་ལ་དགོངས་པ་གནང་བའི་བར་དུ། ཉེ་གནས་རྣམས་ལ་འཕྲལ་དུ་གྲུར་ཞུགས་ནས་ཁོང་ལས་སྔོན་དུ་ཕ་རོལ་དུ་འགྲོ་ཕྱིར་ཨུ་ཚུགས་མཛད་དོ། ༢༣ མི་ཚོགས་ལ་དགོངས་པ་གནང་བའི་རྗེས་སུ་ཐུགས་དམ་ཕྱིར་གཅིག་པུར་རི་ལ་ཕེབས་སོ། མུན་རུབ་ཁར་ཁོང་དེར་གཅིག་པུར་བཞུགས་ཡོད་ཙ་ན། ༢༤ གྲུ་མཚོ་དཀྱིལ་དུ་ཡོད་དེ། མི་མཐུན་པའི་རླུང་ལངས་པས། རྦ་རླབས་ཀྱིས་དཀྲུགས་སོ། ༢༥ མཚན་གྱི་ཐུན་བཞི་པ་ལ་ཁོང་མཚོའི་ཁར་ཞབས་འཆག་ཅིང་དེ་རྣམས་ཀྱི་རྩར་ཕེབས་སོ། ༢༦ ཉེ་གནས་རྣམས་ཀྱིས་ཁོང་མཚོའི་ཁར་ཞབས་འཆག་པ་མཐོང་ནས་སྐྲག་སྟེ། འདྲེའོ་ཟེར་ཞིང་འཇིགས་པས་འབོད་བསྒྲགས་སོ། ༢༧ ཡེ་ཤུས་སེམས་ལྷོད་དེར་སྡོད། ང་ཡིན། མ་འཇིགས་ཤིག་གསུངས། ༢༨ པེ་ཏྲོས་ཞུ་ལན་དུ། གཙོ་བོ་ཁྱེད་ལགས་ན། ངའང་ཆུའི་ཁར་འགྲུལ་ནས་ཁྱེད་དྲུང་འོང་བའི་བཀའ་སྩོལ་ཞིག་ཞུས། ༢༩ ཁོང་གིས་ཤོག་གསུངས། པེ་ཏྲོས་གྲུ་ལས་བབས་ཏེ། ཆུའི་ཁར་འགྲུལ་ཞིང་ཡེ་ཤུའི་དྲུང་དུ་འོང་བ་ལས། ༣༠ རླུང་པོ་མཐོང་སྟེ་འཇིགས་ནས་ནུབ་འགྲོ་བའི་ཚེ། སྐད་ཆེན་པོས། གཙོ་བོ་^*ལགས། ང་སྐྱོབས་ཤིག་ཞུས། ༣༡ ཡེ་ཤུས་ཕྱག་བརྐྱངས་ཏེ་ཁོ་བཟུང་ནས། དད་ཆུང་ཁྱོད། ཐེ་ཚོམ་ཅི་ལ་བྱས་གསུངས་སོ། ༣༢ ཁོང་གཉིས་གྲུའི་ནང་དུ་ཕེབས་པ་དང་རླུང་ཆད། ༣༣ གྲུའི་ནང་ཡོད་པ་དག་གིས་ཁོང་ལ་ཕྱག་འཚལ་ནས། བདེན་པར་ཁྱེད་དཀོན་མཆོག་གི་སྲས་སོ་ཞུས།

༣༤ ཕ་རོལ་དུ་གེ་ནེ་སཱ་རེད་ཡུལ་དུ་ཕེབས། ༣༥ དེའི་ཡུལ་པས་ངོ་ཤེས་ནས། ཡུལ་འཁོར་ཐམས་ཅད་ལ་ལོན་བཏང་སྟེ། ནད་པ་ཐམས་ཅད་ཁོང་གི་སྐུ་དྲུང་དུ་འཁྱེར་འོངས། ༣༦ ན་བཟའི་ཟུར་ཙམ་ལ་ཐུག་པར་གནོང་ཞུས་ནས། རེག་ཚད་གསོས་སོ༎