ཟླ་བ་བདུན་པ་དང་། ཟླ་བ་དེའི་ཚེས་ཉི་ཤུ་གཅིག་ཞག ཡ་ཧོ་ཝཱའི་བཀའ་ལུང་སྟོན་པ་ཧག་གཱ་ཨིའི་ངང་ནས་བྱུང་སྟེ། འདི་སྐད་གསུང་། ༢ ད་ཡ་ཧུ་དཱའི་དཔོན་པོ་ཤེ་ཨལ་ཏི་ཨེལ་གྱི་བུ་ཟེ་རུབ་བཱ་བེལ་དང་། བླ་མ་ཆེན་པོ་ཡོ་ཚ་དག་གི་བུ་ཡོ་ཤུ་ཨ་གཉིས་དང་། ཡུལ་པ་ཕྱི་ལུས་རྣམས་ལ་གཏམ་བྱེད་ཅིང་འདི་སྐད་སྒོ་བར་གྱིས་ཤིག ༣ ཁྱོད་ཀྱི་ནང་ན་ཕོ་བྲང་འདི་སྔ་མའི་ཟིལ་གྱི་ནང་ན་མཐོང་བ་སུ་ཞིག་ལུས་ཡོད་དམ། ད་ལྟ་མཐོང་བ་འདི་ཇི་འདྲ་འདུག འདི་ནི་དེ་དང་སྡུར་ན་ཅིའང་མིན་པ་ཁྱོད་ཀྱི་མཐོང་སྣང་ལ་མི་རིག་གམ། ༤ འོན་ཀྱང་ཀྱེ་ཟེ་རུབ་བཱ་བེལ། སྟོབས་དང་ལྡན་པར་གྱུར་ཅིག ཅེས་ཡ་ཧོ་ཝཱས་གསུང་ངོ་། ཡང་ཀྱེ་ཡོ་ཚ་དག་གི་བུ་ཡོ་ཤུ་ཨ་བླ་མ་ཆེན་པོ། སྟོབས་དང་ལྡན་པར་གྱུར་ཅིག ཡང་ཀྱེ་ཡུལ་གྱི་མི་ཐམས་ཅད། སྟོབས་དང་ལྡན་པར་གྱུར་ཅིག་དང་། ལས་བྱོས་ཤིག ཅེས་ཡ་ཧོ་ཝཱས་གསུང་ངོ་། དེ་ཅིའི་ཕྱིར་ཞེ་ན། ང་ཁྱོད་དང་འགྲོགས་སོ། ཞེས་དཔུང་ཆེན་གྱི་ཡ་ཧོ་ཝཱས་གསུང་ངོ་། ༥ ཁྱོད་ཅག་མི་སེར་ཡུལ་ནས་འཐོན་དུས་ངས་ཁྱོད་ཅག་མཉམ་བྱས་པའི་ཞལ་ཆད་དང་བསྟུན་ནས། ངའི་ཐུགས་ཉིད་ཁྱོད་ཅག་གི་ཁྲོད་ན་བཞུགས་པས་ན། མ་འཇིགས་ཤིག ༦ དེ་ཅིའི་ཕྱིར་ཞེ་ན། དཔུང་ཆེན་གྱི་ཡ་ཧོ་ཝཱས་འདི་སྐད་གསུང་། ད་དུང་ཡང་ལན་གཅིག དུས་རེ་ཞིག་གི་འོག་ཏུ་ངས་ནམ་མཁའ་རྣམས་དང་། ས་དང་། རྒྱ་མཚོ་དང་སྐམ་ས་སྒུལ་བ་ལས། ༧ ངས་མི་སྡེ་ཐམས་ཅད་སྒུལ་ཞིང་། མི་སྡེ་ཀུན་གྱི་ཡིད་མགུ་བའི་རྫས་བསླེབ་ཅིང་། ངས་ཕོ་བྲང་འདི་ལྷན་ནེ་བས་དགང་ངོ་། ཞེས་དཔུང་ཆེན་གྱི་ཡ་ཧོ་ཝཱས་གསུང་ངོ་། ༨ དངུལ་ནི་ངའི་ཡིན། གསེར་ནི་ངའི་ཡིན། ཞེས་དཔུང་ཆེན་གྱི་ཡ་ཧོ་ཝཱས་གསུང་ངོ་། ༩ ཕོ་བྲང་ཕྱི་མ་འདིའི་གཟི་བརྗིད་ནི་ཕོ་བྲང་སྔ་མ་བས་ཀྱང་ཆེ་བར་འགྱུར་རོ། ཞེས་དཔུང་ཆེན་གྱི་ཡ་ཧོ་ཝཱས་གསུང་ངོ་། ཡང་ཕོ་བྲང་འདི་ནང་ངས་ཞི་བདེ་སྦྱིན་པར་བྱའོ། ཞེས་དཔུང་ཆེན་གྱི་ཡ་ཧོ་ཝཱས་གསུང་ངོ་༎