༢
བདག་རང་གི་བསོ་བྱེད་ཁར་ལང་སྟེ། སྤེའུར་རང་གི་གནས་ས་བྱས་ཏེ། ཁོང་གིས་ང་ལ་ཅི་གསུང་བལྟ་རུ་སྒུག་པར་བྱ། ཡང་ངས་རྩོད་པའི་ཕྱིར་དུ་ལན་ཅི་དབུལ། ༢ དེ་ནས་ཡ་ཧོ་ཝཱས་བཀའ་ལན་གནང་སྟེ་འདི་སྐད་དུ། ཞལ་གཟིགས་འདི་བྲིས་ལ། གསལ་པོར་སམ་ཏ་རྣམས་ཀྱི་ཁར་ཕོབ་ཅིག དེ་ནི་མྱུར་པོར་ཀློག་པའི་སླད་དུའོ། ༣ དེ་ཅིའི་ཕྱིར་ཞེ་ན། ཞལ་གཟིགས་འདི་ནི་བསྐོས་པའི་དུས་ཀྱི་ཕྱིར་དུ་ཡིན་པས། མཐའ་མར་རང་གི་དོན་དུ་བསྟན་ཞིང་། རྫུན་ཟེར་བར་མི་བྱའོ། དེ་འགོར་ཡང་སྒུག་ཅིག དེ་ངེས་པར་འོང་རྒྱུ་སྟེ། བཤོལ་འདེབས་པར་མི་འགྱུར་རོ༎༤ ལྟོས་ཤིག ང་རྒྱལ་ཅན་གྱི་སྙིང་མི་དྲང་། འོན་ཀྱང་ཆོས་དྲང་པོ་ནི་རང་གི་དད་པས་འཚོ་བར་འགྱུར་རོ། ༥ འོ་ན། རྒུན་ཆང་ནི་བསླུ་ཁྲིད་མཁན་ཡིན་ཏེ། དེས་ང་རྒྱལ་སྐྱེད་ཅིང་། རང་ཁྱིམ་ན་མི་གནས་པར། རང་གི་འདོད་པ་དམྱལ་བའི་ཁམས་འདྲར་སྐྱེད་པས། འཆི་བ་དང་འདྲ་སྟེ། སེམས་མི་ཚིམ་པར། མི་བརྒྱུད་རང་གི་མདུན་དུ་སྡུད། མི་རིགས་ཐམས་ཅད་རང་གི་དྲུང་དུ་སྤུང་བར་བྱེད། ༦ འདི་ཐམས་ཅད་ཀྱིས་དེ་དཔེར་མི་བླང་ངམ། བརྙས་ཤིང་ཁ་དཔེར་མི་བརྗོད་དམ།
རང་གི་མ་ཡིན་པའི་ནོར་སྤེལ་མཁན་བཀྲ་མི་ཤིས། དུས་ནམ་གྱི་བར་དུ། རང་གི་ཕྱིར་གཏའ་མ་མང་པོའི་ཁལ་འཁུར་བ་བཀྲ་མི་ཤིས། ༧ ཁྱོད་ཀྱི་བུན་བདག་རྣམས་བློ་བུར་དུ་མི་ལང་ངམ། ཁྱོད་ཀྱི་སེམས་དཀྲུག་པ་རྣམས་ཀྱི་གཉིད་སད་པར་མི་འགྱུར་རམ། ཁྱོད་དེ་དག་གི་བཅོམ་ནོར་དུ་འགྱུར་བར་འགྱུར། ༨ ཁྱོད་ཀྱིས་མི་བརྒྱུད་མང་ཙམ་བཅོམ་པས། ལྷག་མ་ཐམས་ཅད་ཀྱིས་ཁྱོད་གཞོམ། མིའི་ཁྲག་འཕོ་བ་དང་། ཡུལ་ཁམས་དང་གྲོང་ཁྱེར་དང་དེའི་ནང་ན་གནས་པ་ཐམས་ཅད་ལ་བྱས་པའི་དབང་ཤེད་ཀྱི་ཕྱིར་དུའོ༎
༩ རང་གི་ཚང་མཐོ་སར་བྱེད་ཅིང་། སྡུག་བསྔལ་གྱི་དབང་ལས་ཐར་དུ་རང་ཁྱིམ་གྱི་ཕྱིར་མི་རིགས་པའི་ཁེ་ལེན་པ་དེ་བཀྲ་མི་ཤིས། ༡༠ ཁྱོད་ཀྱིས་མི་མང་པོ་རལ་ནས་རང་ཁྱིམ་གྱི་ཕྱིར་ཁྲེལ་བའི་གྲོས་བྱས་ཏེ། རང་སེམས་བརླགས་པའི་སྡིག་པ་བྱས་སོ། ༡༡ གང་ལ་ཞེ་ན། རྩིག་པའི་ནང་ན་ཡོད་པའི་རྡོས་འབོད་ཅིང་། མ་གདུང་ལ་བུ་གདུང་གིས་ལན་འདེབས་པར་འགྱུར་རོ། ༡༢ ཁྲག་གིས་གྲོང་ཁྱེར་རྩིག་པ་དང་། ངན་པ་ཡིས་རྒྱལ་ས་འཛུག་པ་དེ་བཀྲ་མི་ཤིས། ༡༣ ཀྱེ་ཧོ། མི་རྣམས་ཀྱིས་མེའི་དོན་དུ་ལས་བྱེད་པ་དང་། མི་རིགས་རྣམས་ཀྱིས་དོན་མེད་ཀྱི་དོན་དུ་རང་ངལ་བར་བྱེད་པ་དེ་ཡ་ཧོ་ཝཱ་ལས་མིན་ནམ། ༡༤ དེ་ཅིའི་ཕྱིར་ཞེ་ན། ཇི་ལྟར་ཁྲི་རྒྱ་མཚོ་ཆུས་གང་བ་དེ་བཞིན་དུ་ས་གཞི་ནི་ཡ་ཧོ་ཝཱའི་དཔལ་འབྱོར་གྱི་རྟོགས་པས་གང་བར་འགྱུར་རོ༎
༡༥ རང་གི་ཁྱིམ་མཚེས་ལ་རང་གི་གནོད་སེམས་བསྲེས་ཏེ་རྒུན་ཆང་བསྟེར་ནས། དེའི་གསང་བའི་གནས་ལ་ལྟ་བའི་ཕྱིར་བཟི་རུ་འཇུག་པ་དེ་བཀྲ་མི་ཤིས། ༡༦ གྲགས་པའི་ཚབ་ཏུ་ཁྱོད་ཁྲེལ་བས་གང་སྟེ། ཁྱོད་ཀྱང་འཐུང་ཞིག་དང་རང་གི་མདུན་ལྤགས་ཁེབས་མེད་དུ་བྱོས། ཡ་ཧོ་ཝཱའི་ཕྱག་གཡས་པའི་ཕོར་པ་ཁྱོད་ཀྱི་ཕྱོགས་སུ་བསྐོར་ཏེ། ཁྱོད་ཀྱི་གྲགས་པར་ངོ་ཚའི་སྐྱུག་པ་འཕོག་པར་འགྱུར། ༡༧ དེ་ནི་ལི་བ་ནོན་ལ་བྱས་པའི་དབང་ཤེད་ཀྱིས་ཁྱོད་གནན་ཞིང་། སེམས་ཅན་བསད་པའི་རྐྱེན་གྱིས་ཁྱོད་འཇིགས་ཤིང་། ཡུལ་ཁམས་དང་གྲོང་ཁྱེར་དང་དེའི་ནང་ན་གནས་པ་ཐམས་ཅད་ཀྱི་ཁྲག་ཕོས་པ་དང་དབང་ཆོས་ཀྱི་ཕྱིར་དུ་འབྱུང་བར་འགྱུར་རོ༎
༡༨ བཟོ་བོས་བརྐོས་ནས་བྱས་པའི་བཙོག་སྐུས་ཅི་ཕན། བླུག་སྐུ་དང་རྫུན་བསླབ་པའི་སྟོན་པ་དང་། བཟོ་བོ་རང་གི་ལས་ལ་ཡིད་ཆེས་ཤིང་། སྨྲ་མི་ནུས་པའི་སྐུ་འདྲས་ཅི་ཕན།