༢ རྟ་ལྕག་གི་སྐད་དང་འཁོར་ལོའི་སྐད་དང་། རྟའི་མཆོང་དཔང་དང་ཤིང་རྟ་འཕར་བའི་སྒྲ། ༣ རྟ་པའི་རལ་གྲིའི་མདངས་དང་མདུང་ལྷག་ལྷག ཤི་བའི་ཚོགས་དང་རོ་ཡི་རི་བོ་ཆེ། རོའི་ཚོད་མེད་པས་རོ་རྣམས་ལ་སྒག་རྒྱབ། ༤ མཛེས་ལ་ངན་ཆོས་བྱེད་པའི་སྨད་འཚོང་མའི། ལོག་གཡེམ་མང་བའི་རྒྱུ་ཡིས་དེ་བཞིན་འབྱུང་། དེས་ལོག་གཡེམ་ངང་ནས་མི་བརྒྱུད་རྣམས་འཚོང་། ངན་ཆོས་ངང་ནས་བརྒྱུད་རྣམས་བཙོང་བར་བྱས།

༥ ལྟོས་ངས་ཁྱོད་ལ་སྡང་བར་བྱེད་དོ་ཞེས། དཔུང་ཆེན་རྣམས་ཀྱི་ཡ་ཧོ་ཝཱས་གསུང་ངོ་། ཁྱོད་ཀྱི་སྨད་གཡོག་འཐེན་ནས་གདོང་ལ་དགབ། མི་བརྒྱུད་རྣམས་ལ་ཁྱོད་ཀྱི་གཅེར་བུ་དང་། རྒྱལ་ཁམས་རྣམས་ལ་ཁྱོད་ཀྱི་ཁྲེལ་བསྟན་འོང་། ༦ ངས་མི་གཙང་དྲི་མ་ཁྱོད་ཁར་རྒྱབ་ཅིང་། ཁྱོད་སྐྱེངས་ཤིང་གཏམ་ངན་དང་ལྡན་པར་བྱའོ། ༧ དེ་ནས་ཁྱོད་ལ་ལྟ་མཁན་ཀུན་འབྲོས་འོང་། ནི་ནི་ཝེ་སྟོངས་པར་གྱུར་པས་སུས་ངུ་། ཁྱོད་སེམས་གསོ་མཁན་ངས་གང་ནས་འཚོལ་འོང་།

༨ ནོ་ཨམ་མོན་ལས་ཁྱོད་བཟང་བ་ཡིན་ནམ། དེ་གཙང་པོ་རྣམས་ཀྱི་མཚམས་ན་ཚུགས་ཏེ། དེའི་ཕྱོགས་བཞི་རུ་ཆུ་དང་རྒྱ་མཚོ། མོ་ཡི་ལྕགས་རི་ཆུ་བོ་ཡོད་པ་ཡིན། ༩ ཀུས་དང་མི་སེར་གཉིས་དེའི་སྟོབས་ཡོད་དེ། མོ་ནི་ཐིག་མཐའ་མེད་པ་ཡོད་པ་ཡིན། ཕུད་དང་ལིབ་ཡཱ་ཁྱོད་ར་མདར་ཡོད་རུང་། ༡༠ ཡུལ་ལས་བསྐྲད་དེ་བཙོན་པར་གྱུར་ནས་སོང་། མོའི་ཕྲུ་གུ་རྣམས་ལམ་སྲང་མགོར་སར་བརྡབས། མོའི་བཙུན་པ་རྣམས་ལ་རྟགས་རིལ་བཏང་སྟེ། དེའི་མི་ཆེན་རྣམས་ལྕགས་སྒྲོག་གིས་བཅིངས་སོ། ༡༡ ཁྱོད་རང་ཡང་རས་བཟི་ཞིང་རང་ཡིབ་འོང་། དགྲ་ལས་ཐར་བའི་སྐྱབས་གནས་འཚོལ་བར་འགྱུར།

༡༢ འགོ་མར་ཚོས་པའི་སེ་ཡབ་ཀྱི་ཤིང་ལྟར། ཁྱོད་ཀྱི་རྫོང་ཀུན་ལ་ཡང་འབྱུང་བར་འགྱུར། སྤྲུག་ན་ཟ་མཁན་མི་ཡི་ཁ་ནང་འབུད། ༡༣ ཁྱོད་དཀྱིལ་ཡོད་པ་རྣམས་ནི་བུད་མེད་འདྲ། ཁྱོད་ཀྱི་ཡུལ་གྱི་རྒྱ་སྒོ་རྣམས་དགྲའི་མདུན། གདངས་ནས་མེས་ཁྱོད་ཀྱི་སྒོ་གཏན་རྣམས་ཟོས། ༡༤ དམག་གིས་བསྐོར་དུས་ཕྱིར་ཆུ་འཆུ་བར་གྱིས། ཁྱོད་རང་གི་རྫོང་རྣམས་བརྟན་པར་གྱིས་ཤིག འདམ་ནང་བོབས་ཤིག་དང་འཇིམ་པ་བརྫིས་ཏེ། བག་གུའི་ཤིང་ཁྱོད་ཀྱིས་འཐམ་པར་གྱིས་ཤིག ༡༥ དེར་མེས་ཁྱོད་ཟ་ཞིང་རལ་གྲིས་གཏུབ་འོང་། དེས་ལྡག་པའི་ཆ་ག་འབུ་བཞིན་ཁྱོད་བཟའ། ལྡག་པའི་ཆ་ག་འབུ་ལྟར་རང་མང་ལ། ཚོགས་པའི་ཆ་ག་འབུ་ལྟར་རྒྱས་པར་བྱོས། ༡༦ རང་གི་ཚོང་པ་རྣམས་རྒྱས་པར་བྱས་ཏེ། ནམ་མཁའི་སྐར་མ་རྣམས་ལས་ལྷག་པར་སོང་། ལྡག་པའི་ཆ་ག་འབུས་བརླགས་ནས་འཕུར་འགྲོ། ༡༧ ཁྱོད་ཀྱི་ཐོར་ཅོག་ཅན་ཆ་ག་འབུ་འདྲ། དམག་དཔོན་རྣམས་ཆ་ག་འབུའི་དམག་ཚོགས་འདྲ། དེ་རྣམས་གྲང་དུས་རྩིག་གསེབ་ནང་དུ་ཞུགས། ཉི་མ་ཤར་དུས་སུ་ཕར་འབྲོས་པར་བྱེད། དེ་ནས་དེ་དག་གི་གནས་སའི་གཏོལ་མེད། ༡༨ ཨ་སུར་རྒྱལ་པོ་ཁྱོད་ཀྱི་རྫི་བོ་རྣམས། གཉིད་ལོག་སྟེ་ཁྱོད་ཀྱི་དམག་དཔོན་རྣམས་ཉལ། ཁྱོད་ཀྱི་འབངས་རྣམས་རི་རྣམས་སུ་ཐོར་ཏོ། དེ་དག་བསྡུ་བར་བྱེད་མཁན་སུ་ཡང་མེད། ༡༩ ཁྱོད་ཀྱི་རྨ་ཁ་ལ་གསོ་ཐབས་ནི་མེད། ཁྱོད་ཀྱི་རྨ་གཟུག་གཟེར་ཅན་ནོ་ཁྱོད་ཀྱི། སྐད་ཆ་ཐོས་ཚད་ཀྱིས་ལག་རྡབ་གཏང་ངོ་། གང་ལ་ཞེ་ན་ཁྱོད་ཀྱི་སེམས་ངན་གྱིས། གཏན་དུ་མ་རུབ་པའི་མི་ཞིག་ཡོད་དམ༎ ༎