འོན་ཀྱང་ཕྱི་མའི་ཉིན་མོ་རྣམས་སུ་ཡ་ཧོ་ཝཱའི་ཕོ་བྲང་གི་རི་བོ་ནི་རི་བོ་རྣམས་ཀྱི་རྩེ་མོར་དགོད་ཅིང་། རི་ཕྲན་ཀུན་པས་ཡར་གདེགས་པ་དང་། མི་རིགས་རྣམས་དེའི་ཐད་དུ་བརྒྱུག་པར་འགྱུར། ༢ ཡང་མི་བརྒྱུད་མང་པོ་འོང་ཞིང་འདི་སྐད་དུ། ཤོག་ལ། ངེད་ཡར་ཡ་ཧོ་ཝཱའི་རི་བོ་དང་། ཡ་ཀོབ་ཀྱི་དཀོན་མཆོག་གི་ཕོ་བྲང་དུ་འདོང་དང་། ཁོང་གིས་ཉིད་ཀྱི་གཤེགས་ལམ་ངེད་ལ་བསྟན་ཏེ། ངེད་ཁོང་གི་ལམ་རྣམས་སུ་འགྲུལ་བར་བྱའོ། དེ་ཅིའི་ཕྱིར་ཞེ་ན། ཙི་ཨོན་ལས་བཀའ་ཁྲིམས་དང་ཡེ་རུ་ཤ་ལེམ་ནས་ཡ་ཧོ་ཝཱའི་གསུང་འབྱུང་བར་འགྱུར། ༣ ཡང་ཁོང་གིས་མི་བརྒྱུད་དུ་མའི་ནང་ན་ཞལ་ཆེ་གཅད་དེ། ས་ཐག་རིང་པོའི་མི་སྡེ་སྟོབས་ལྡན་བཀའ་བཀྱོན་པར་འགྱུར་བ་དང་། དེ་དག་གིས་རང་གི་རལ་གྲི་ལས་རྨོ་ལྕགས་དང་། མདུང་ལས་ཟོར་བ་བཟོ་བར་བྱ། མི་རྒྱུད་གཅིག་གིས་གཅིག་ལ་རལ་གྲི་མི་སྤར། དེ་མན་ཆད་དམག་ཀྱང་སྦྱོང་བར་མི་འགྱུར་རོ། ༤ འོན་ཀྱང་རེ་རང་གི་རྒུན་ཤིང་གི་ལྐོག་དང་། སེ་ཡབ་ཀྱི་འོག་ཏུ་བསྡད་དེ། སུས་ཀྱང་དེ་དག་འཇིགས་སུ་མི་གཞུག་གོ། དེ་ཅིའི་ཕྱིར་ཞེ་ན། དཔུང་ཆེན་རྣམས་ཀྱི་ཡ་ཧོ་ཝཱའི་ཞལ་ལས་གསུངས་པའི་ཕྱིར་རོ། ༥ གང་ལ་ཞེ་ན། མི་བརྒྱུད་ཀུན་གྱིས་རེ་རང་གི་རྟེན་གྱི་མིང་གི་ནང་དུ་འགྲུལ་བར་བྱའི། ངེད་ཅག་རྒྱུན་ནས་རྒྱུན་དུ་ཡ་ཧོ་ཝཱ་རང་གི་དཀོན་མཆོག་གི་མཚན་ནང་འགྲུལ་བར་བྱའོ༎