༧ ཁ་ངན་གྱི་མི་ལ་བསླབ་བྱ་གཏོང་མཁན་གྱིས་རང་ཉིད་ངོ་ཚ་རུ་འཇུག སྡིག་སྤྱོད་ལ་བཀའ་བཀྱོན་པས་རང་ཉིད་ནོགས་སུ་འཇུག ༨ དེས་ཁྱོད་ལ་འཁོན་དུ་འཛིན་འོང་། ཁ་ངན་པ་ལ་བསླབ་བྱ་མ་ཐོང་ཞིག མཁས་པའི་མི་ལ་བཀྱོན་ཞིག་དང་། དེས་ཁྱོད་ལ་བྱམས་པར་བྱ། ༩ མི་མཁས་པ་ལ་མན་ངག་ཐོང་ཞིག་དང་། དེ་ལྷག་པར་མཁས་པར་འགྱུར། མི་བློ་དྲང་པོ་ལ་སློབས་ཤིག་དང་། དེ་རིག་པའི་ནང་ན་ཡར་འཕེལ་བར་འགྱུར། ༡༠ ཤེས་རབ་ཀྱི་ཐོག་མ་ནི་ཡ་ཧོ་ཝཱ་ལ་བག་བྱེད་པ་ཡིན། དམ་པ་གཅིག་པོའི་རྟོགས་པ་ནི་བློ་གྲོས་དེ་ཡིན། ༡༡ དེ་ཅིའི་ཕྱིར་ཞེ་ན། བདག་གི་ནང་ན་ཁྱོད་ཀྱི་ཞག་རྣམས་སྐྱེད་པ་བྱས་ཏེ། ཁྱོད་ཀྱི་ཚེའི་ལོ་གྲངས་འཕེལ་བར་འགྱུར། ༡༢ ཁྱོད་མཁས་ན། རང་གི་དོན་དུ་མཁས་པར་འགྱུར། ཁྱོད་སྨད་ན། རང་གཅིག་པུས་དེ་ཐོགས་པར་འགྱུར།

༡༣ བུད་མེད་གླེན་པ་འདུ་འཛི་ཆེ། དེ་ནི་རྨོངས་ཤིང་ཅིའང་མི་ཤེས། ༡༤-༡༥ ཤར་རེ་རང་གི་ལམ་ནང་འགྲོ་བའི་བྱེས་པ་ཚོ་ལ་འབོད་པ་ལ། མོ་རང་གི་ཁྱིམ་གྱི་སྒོ་དྲུང་དང་། གྲོང་ཁྱེར་གྱི་གནས་མཐོ་བའི་ཕོ་སྟེགས་ཀྱི་ཁར་སྡོད་ཅིང་། ༡༦ དྲང་སུམ་རྣམས་ལ་ཚུར་ཤོག་དང་། བློ་གྲོས་ཀྱིས་འཕོངས་པ་རྣམས་ལ་འདི་ན་རེ། ༡༧ བརྐུས་པའི་ཆུ་ནི་མངར་ཞིང་། ཕག་བཟན་ཞིམ་མོ་ཟེར། ༡༨ འོན་ཀྱང་མོའི་རྩར་ཤི་རོ་རྣམས་ཡོད་པ་དང་། མོའི་མགྲོན་པོ་རྣམས་དམྱལ་བའི་གཏིང་ན་གནས་པའི་རྒྱུས་ཁོ་ལ་མེད་དོ༎