བུ་རྣམས། ཕ་ངའི་ཞལ་ཏ་ལ་ཉོན་ཞིག་དང་། ཤེས་བྱ་རྟོགས་སུ་བློ་ཧྲིལ་ཞིག ༢ དེ་ཅིའི་ཕྱིར་ཞེ་ན། ངས་ཁྱོད་ཚོ་ལ་བསྟན་པ་བཟང་པོ་སྟོན་པས། ངའི་ཚུལ་ཁྲིམས་མ་དོར་ཞིག ༣ གང་ལ་ཞེ་ན། བདག་ནི་རང་གི་ཕའི་བུ་དང་། མའི་མིག་གི་མདུན་དུ་གཅེས་ཕྲུག་གཅིག་པུ་ཡོད་པ་ཡིན་པས། ༤ ཁོང་གིས་ང་ལ་བསླབ་བྱ་གནང་ནས་འདི་སྐད་གསུངས། ངའི་གཏམ་ལ་ཁྱོད་ཀྱི་སྙིང་ཐོང་ཞིག ངའི་བཀའ་རྣམས་སྲུང་ལ་གསོན་པོར་གནས་པར་བྱོས། ༥ ཤེས་རབ་བློངས་ཤིག ཤེས་བྱ་ལེན་ཞིང་བརྗེད་པ་མ་བྱེད་ཅིག ངའི་གཏམ་རྣམས་ལས་ཀྱང་མ་བྱོལ་ཞིག ༦ དེ་མ་སྤོང་ཞིག་དང་། དེས་ཁྱོད་སྲུང་བར་འགྱུར། དེ་ལ་གཅེས་པར་འཛིན་ཞིག་དང་། དེས་ཁྱོད་སྐྱོབ་པར་འགྱུར་རོ། ༧ ཤེས་རབ་ནི་གཙོ་ཆེ་བ་དེ་ཡིན་པས། ཤེས་རབ་ལེན་པར་གྱིས་ཤིག རང་གི་རྙེད་པ་ཀུན་དང་བཅས་སུ་གོ་བ་སྐྱེད་པར་བྱོས། ༨ དེ་མཐོ་བར་གྱིས་ཤིག་དང་། དེས་ཀྱང་ཁྱེད་མཐོ་སར་འཇོག་པར་འགྱུར། ཁྱོད་ཀྱིས་དེའི་འགུལ་ལ་འཁྱུད་པའི་དུས་སུ། དེས་ཁྱོད་ལ་ཞེ་ས་སྟེར་བར་འགྱུར་རོ། ༩ དེས་ཁྱོད་ཀྱི་མགོའི་སྟེང་དུ་ཐུགས་རྗེའི་གཙུག་རྒྱན་གྱིས་རྒྱན་ཞིང་། ཟིལ་གྱི་ཅོད་པན་གནང་བར་འགྱུར།