མ་ན་ཤེ་ལོ་བཅུ་གཉིས་ལོན་པའི་ཚེ། རྒྱལ་པོར་གྱུར་ནས། ཡེ་རུ་ཤ་ལེམ་དུ་ལོ་ལྔ་བཅུ་ང་ལྔ་རྒྱལ་སྲིད་བསྐྱངས་སོ། ༢ དེས་ཡ་ཧོ་ཝཱའི་སྤྱན་སྔར་ངན་པ་སྤྱད་དེ། ཡ་ཧོ་ཝཱས་ཨིས་ར་ཨེལ་གྱི་བུ་བརྒྱུད་ཀྱི་མདུན་ལས་བསྐྲད་པའི་ཕྱི་པ་རྣམས་ཀྱི་ཞེན་ལོག་གི་སྤྱོད་ཚུལ་བཞིན་དུ་སྤྱད་དེ། ༣ དེའི་ཕ་ཧིས་ཀི་ཡཱས་བཤིག་པའི་མཐོ་གླིང་རྣམས་བརྩིགས། བ་ཨཱལ་རྣམས་ཀྱི་དོན་དུ་མཆོད་ཁྲི་བཞེངས། ཨ་ཤེ་རཱ་རྣམས་བཙུགས་ཏེ། གནམ་གྱི་སྐར་ཚོགས་ཐམས་ཅད་ལ་བསྙེན་བཀུར་དང་རིམ་གྲོ་བྱས། ༤ ཡ་ཧོ་ཝཱས། ངའི་མཚན་དུས་རྒྱུན་དུ་ཡེ་རུ་ཤ་ལེམ་ན་ལུས་པར་འགྱུར་རོ། གསུངས་པའི་ཡ་ཧོ་ཝཱའི་ཕོ་བྲང་གི་ནང་དུ་ཡང་མཆོད་ཁྲི་མང་པོ་བརྩིགས་ནས། ༥ ཡ་ཧོ་ཝཱའི་སྡེ་ཡངས་གཉིས་པོའི་ནང་དུ་གནམ་གྱི་སྐར་ཚོགས་ཀུན་གྱི་ཕྱིར་མཆོད་ཁྲི་བཞེངས་སོ། ༦ བེན་ཧིན་ནོམ་ཞེས་བྱ་བའི་ལུང་པར་རང་གི་བུ་ཕྲུག་རྣམས་མེའི་ནང་དུ་འགྲོར་བཅུག དུས་ཚོད་ལ་བརྟེན་ཏེ། ངན་ཆོས་དང་སྔགས་བཏབ། གཤིན་འདྲེ་འགུག་མཁན་དང་། ངན་སྔགས་མཁན་དང་འདྲེས་ཏེ། ཡ་ཧོ་ཝཱའི་ཐུགས་ཁྲོ་དཀྲུག་པའི་ཕྱིར་ཐུ་བ་མང་པོ་བྱས། ༧ དེས་བཟོས་པའི་བཙོག་སྐུ་དེ་དཀོན་མཆོག་གི་ཕོ་བྲང་དུ་བསླངས་ཏེ་བཞག ཡ་ཧོ་ཝཱས་ཕོ་བྲང་དེའི་ཕྱིར་དཱ་བིད་དང་། དེའི་སྲས་ཤ་ལོ་མོ་ལ། ངས་ཨིས་ར་ཨེལ་གྱི་སྡེ་ཀུན་གྱི་ནང་ནས་འདམས་པའི་ཡེ་རུ་ཤ་ལེམ་དང་ཕོ་བྲང་འདིར་ངས་ཉིད་ཀྱི་མཚན་དུས་རྟག་ཏུ་འཇོག་པར་བྱ་སྟེ། ༨ ཇི་སྟེ་དེ་དག་གིས་ཁོ་བོས་མོ་ཤེ་རྒྱུད་དེ་གསུངས་པའི་བཀའ་ཁྲིམས་དང་བཀའ་རྒྱ་དང་། སྤྱད་མཚམས་ཐམས་ཅད་བཞིན་དུ་བྱེད་པར་ཟོན་བྱེད་ན། ངས་དེ་དག་གི་མེས་པོ་རྣམས་ལ་བྱིན་པའི་ཡུལ་ཁམས་ཀྱི་ནང་ནས་ཨིས་ར་ཨེལ་གྱི་རྐང་པ་ནི་ནམ་དུ་ཡང་སྐྲོད་པར་མི་བྱའོ་ཞེས་གསུངས་སོ། ༩ མ་ན་ཤེས་ཡ་ཧུ་དཱ་དང་ཡེ་རུ་ཤ་ལེམ་པ་རྣམས་འགོལ་དུ་བཅུག་ནས། ཡ་ཧོ་ཝཱས་ཨིས་ར་ཨེལ་པ་རྣམས་ཀྱི་མདུན་ལས་ཚར་བཅད་པའི་ཕྱི་པ་རྣམས་ལས་ཀྱང་སྡིག་པ་མང་དུ་བྱེད་བཅུག་གོ།