དེ་ནས་ཧིས་ཀི་ཡཱས་ཡ་ཧོ་ཝཱ་ཨིས་ར་ཨེལ་གྱི་དཀོན་མཆོག་གི་མཚན་གྱི་ཕྱིར་དུ་པེ་སག་གི་དུས་ཆེན་བྱེད་དུ། ཡེ་རུ་ཤ་ལེམ་གྱི་ཡ་ཧོ་ཝཱའི་ཕོ་བྲང་ལ་ཤོག་ཅིག སྨྲས་ནས། ཨིས་ར་ཨེལ་དང་ཡ་ཧུ་དཱའི་མི་ཚང་མ་ལ་ཕྲིན་བཏང་སྟེ། ཨེབ་ར་ཨིམ་དང་མ་ན་ཤེ་ལ་ཡི་གེ་སྤྲིངས་སོ། ༢ དེའི་རྒྱུ་ནི། རྒྱལ་པོ་དང་། སྐུ་དྲག་དང་། ཡེ་རུ་ཤ་ལེམ་གྱི་མི་ཚོགས་ཚང་མས་ཟླ་བ་གཉིས་པའི་ནང་དུ་པེ་སག་བྱེད་པའི་གྲོས་བྱས་སོ། ༣ གང་ལ་ཞེ་ན། ཟླ་བ་དང་པོ་ནང་བླ་མ་མང་ཚད་ཀྱིས་རང་གཙང་སྦྲའང་མ་བྱས། མི་སྡེའང་ཡེ་རུ་ཤ་ལེམ་ལ་མ་འཛོམ་པས། པེ་སག་བྱེད་མ་ནུས་སོ། ༤ དེ་ལྟར་བྱེད་པར་རྒྱལ་པོ་དང་མི་ཚོགས་ཚང་མ་རན་ཏེ། ༥ ཡ་ཧོ་ཝཱ་ཨིས་ར་ཨེལ་གྱི་དཀོན་མཆོག་གི་མཚན་གྱི་ཕྱིར་པེ་སག་གི་དུས་ཆེན་བྱེད་དུ། ཡེ་རུ་ཤ་ལེམ་ལ་ཤོག་ཅིག སྨྲས་ནས། བེ་ཨེར་ཤེ་བཱ་ནས་དཱན་གྱི་བར་དུ་ཨིས་ར་ཨེལ་ཡོངས་ལ་འཕྲིན་སྒུར་དུ་ཁ་འཆམས་པ་ཡིན། གང་ལ་ཞེ་ན། དེ་དག་གིས་གསུང་རབ་ན་བྲིས་པ་བཞིན་དུ་ཡུན་རིང་པོ་ཞིག་ནས་པེ་སག་མ་བྱས་པ་ཡིན། ༦ ཡང་བང་ཆེན་རྣམས་ཀྱིས་རྒྱལ་པོ་དང་སྐུ་དྲག་གི་ཡི་གེ་བཀུར་ནས། རྒྱལ་པོའི་བཀའ་བཞིན་དུ་ཨིས་ར་ཨེལ་དང་། ཡ་ཧུ་དཱ་ཀུན་ཏུ་ཕྱིན་ཏེ། དེ་དག་ལ། ཀྱེ་ཨིས་ར་ཨེལ་གྱི་བུ་བརྒྱུད། ཨབ་ར་ཧམ་དང་། ཨི་སཱག་དང་། ཨིས་ར་ཨེལ་གྱི་དཀོན་མཆོག་ཡ་ཧོ་ཝཱའི་ཕྱོགས་སུ་འབུངས་ཤིག དེ་ནས་ཨ་སུར་རྒྱལ་པོ་རྣམས་ཀྱི་ལག་ནས་ཐར་བའི་ཕྱི་ལུས་ཀྱི་ཕྱོགས་སུ་སླར་ཁོང་འབྱོན་པར་འགྱུར། ༧ རང་གི་ཕ་མེས་ཀྱི་དཀོན་མཆོག་ཡ་ཧོ་ཝཱའི་བཀའ་ལས་འགལ་བའི་ཕ་མེས་དང་སྤུན་རྣམས་དང་འདྲ་བར་མ་བྱེད་ཅིག ཁྱོད་ཚོས་མཐོང་བ་ལྟར། ཁོང་གིས་དེའི་ཕྱིར་དུ་དེ་དག་ཧན་འཁྱོར་དུ་བཅུག་པ་ལགས། ༨ དེ་བས་ན་ཁྱོད་ཅག་གིས་རང་གི་ཕ་མེས་ལྟར་ཁ་ལོ་གྱོང་པོ་མ་བྱེད་པར། ཡ་ཧོ་ཝཱའི་འབངས་བྱོས་ཤིག ཡང་ཁོང་གིས་དུས་གཏན་གྱི་ཕྱིར་དམ་པར་མཛད་པའི་ཁོང་གི་གཙང་ཁང་དུ་ཤོག་ཅིག ཁྱོད་ཅག་ལས་ཁོང་གི་ཐུགས་ཁྲོ་འཇིགས་སུ་རུང་བ་དེ་འབུད་པའི་ཕྱིར་དུ། ཡ་ཧོ་ཝཱ་དཀོན་མཆོག་ལ་བསྙེན་བཀུར་གྱིས་ཤིག ༩ ཅི་ལ་ཟེར་ན། གལ་ཏེ་ཁྱོད་ཅག་ཡ་ཧོ་ཝཱ་ལ་འབུངས་ན། ཁྱོད་ཅག་གི་སྤུན་དང་ཕྲུ་གུ་རྣམས་གཉའ་ཡལ་དུ་བཟུང་འཁྱེར་བའི་མདུན་དུ་སྙིང་རྗེ་རྙེད་ཅིང་། ཡུལ་འདིར་ལོག་སྟེ་སླེབ་པར་འགྱུར། ཡ་ཧོ་ཝཱ་ཁྱོད་ཅག་གི་དཀོན་མཆོག་ཐུགས་རྗེ་ཅན་དང་སྙིང་རྗེ་ཅན་ལགས་པས། གལ་ཏེ་ཁྱོད་ཅག་ཁོང་གི་ཕྱོགས་སུ་ལོག་འོང་ན། ཁོང་གིས་ཀྱང་ཁྱོད་ཅག་ལས་ཉིད་ཀྱི་ཞལ་རས་མ་སྒྱུར་བར་གཟིགས་པར་འགྱུར་རོ། ཞེས་སྦྲན་ཏོ༎