ཨ་སཱའི་རྒྱལ་སྲིད་ཀྱི་ལོ་སོ་དྲུག་པར། ཨིས་ར་ཨེལ་གྱི་རྒྱལ་པོ་བ་ཨེ་ཤཱས་ཡ་ཧུ་དཱ་ལ་དམག་བཏེགས་ནས། ཡ་ཧུ་དཱའི་རྒྱལ་པོ་ཨ་སཱའི་དྲུང་དུ་མི་གང་ཡང་འགྲོ་འོང་གི་འགྲུལ་གཅོད་དུ། རཱ་མཱ་བྱ་བ་བརྩིགས་པ་ལས། ༢ ཨ་སཱས་ཡ་ཧོ་ཝཱའི་ཕོ་བྲང་དང་རྒྱལ་པོའི་ཕོ་བྲང་གི་གཏེར་མཛོད་ཀྱི་ནང་ནས་གསེར་དངུལ་ཕྱུང་སྟེ། ད་མཱ་སེག་ཏུ་གནས་པའི་ཨ་རམ་གྱི་རྒྱལ་པོ་བེན་ཧ་དད་ལ་བསྐུར་ནས་དེ་ལ། ༣ འོ་བུ་ཅག་གཉིས་ཀྱི་བར་དང་། ངའི་ཕ་དང་ཁྱེད་ཀྱི་ཕ་གཉིས་ཀྱི་བར་ན་ཆད་དོན་ཞིག་བྱས་ཏེ་ཡོད་པས། གཟིགས། ད་ངས་ཁྱེད་ལ་གསེར་དང་དངུལ་སྐུར་བས། ཨིས་ར་ཨེལ་གྱི་རྒྱལ་པོ་བ་ཨེ་ཤཱ་ངའི་མདུན་ལས་འགྲོ་བའི་ཕྱིར། ཁྱེད་ཤོག་ལ། ཁྱེད་ཀྱིས་དེ་དང་མཉམ་དུ་བྱས་པའི་ཆད་དོན་དེ་གཅོག་པར་མཛོད་ཅིག སྨྲས་ནས་སྤྲིངས་པ་དང་། ༤ བེན་ཧ་དད་རྒྱལ་པོ་ཨ་སཱའི་གཏམ་ལ་ཉན་ནས། རང་གི་དམག་དཔུང་སོ་སོའི་དམག་དཔོན་རྣམས་ཨིས་ར་ཨེལ་གྱི་གྲོང་ཁྱེར་རྣམས་སུ་བཏང་ནས། དེ་དག་གིས་ཨི་ཡོན་དང་། དཱན་དང་། ཨ་བེལ་མཱ་ཡིམ་དང་། ནབ་ཐ་ལིའི་གྲོང་ཁྱེར་ཐམས་ཅད་ཀྱི་གཏེར་མཛོད་རྣམས་བཅག་གོ། ༥ དེ་ནས་བ་ཨེ་ཤཱས་གཏམ་དེ་ཐོས་པར་ཙམ་གྱིས། རཱ་མཱའི་མཁར་ལས་གཞག་ནས། ལས་བར་བཅད་དོ། ༦ དེར་རྒྱལ་པོ་ཨ་སཱས་ཡ་ཧུ་དཱ་ཡོད་དོ་ཅོག་ཁྲིད་དེ། བ་ཨེ་ཤཱས་བརྩིགས་པའི་རཱ་མཱའི་རྡོ་བ་དང་གདུང་མ་རྣམས་བསྐྱས་ཏེ། དེ་རྣམས་ལས་དེས་གེ་བཱ་དང་མིས་པཱ་གཉིས་བཞེངས་སོ༎