དེ་ནས་ཨ་བི་ཡཱ་རང་གི་ཕ་མེས་དང་ལྷན་ཅིག་ཏུ་མནལ་དུ་སོང་བ་དང་། མི་རྣམས་ཀྱིས་དཱ་བིད་ཀྱི་གྲོང་ཁྱེར་དུ་བསྐུངས་སོ། དེའི་སྲས་ཨ་སཱ་དེའི་ཚབ་ཏུ་རྒྱལ་པོར་གྱུར་ཏེ། དེའི་རིང་དུ་ལོ་བཅུ་ཐུག་ཡུལ་ལ་དུས་བདེ་ཡོད་པ་ཡིན། ༢ ཡང་ཨ་སཱས་ཡ་ཧོ་ཝཱ་རང་གི་དཀོན་མཆོག་གི་སྤྱན་དྲུང་དུ་ལེགས་པ་དང་རིགས་པ་ཡིན་པའི་ལས་བགྱེས་ཏེ། ༣ ཕྱི་པའི་ལྷ་རྟེན་གྱི་མཆོད་ཁྲི་དང་། མཐོ་གླིང་རྣམས་ཐེན་ཏེ། སྐུ་འདྲ་རྣམས་བཅག་སྟེ། ལྷ་ལྕང་རྣམས་བཅད་ནས། ༤ ཡ་ཧོ་ཝཱ་རང་གི་དཀོན་མཆོག་འཚོལ་བ་དང་། ཁོང་གི་བཀའ་ཁྲིམས་དང་བཀའ་རྒྱ་སྲུང་བའི་ཕྱིར། ཡ་ཧུ་དཱ་ལ་བཀའ་སྩལ་ཏེ། ༥ ཡ་ཧུ་དཱའི་གྲོང་ཁྱེར་ཚང་མའི་ནང་ནས་མཐོ་གླིང་དང་། ཉི་མའི་སྐུ་འདྲ་རྣམས་འཐེན་པར་བྱས། དེའི་དུས་སུ་རྒྱལ་ཁམས་ཀྱི་ནང་དུ་དུས་བདེ་ས་འཇམ་ཡོད་པ་ཡིན། ༦ ཡ་ཧོ་ཝཱས་དེ་ལ་རྣལ་མ་གནང་བའི་ཐབས་ཀྱིས། ཡུལ་ལ་དུས་བདེ་ཡོད་པས། ཡ་ཧུ་དཱ་རུ་གྲོང་ཁྱེར་བཙན་པོ་རྣམས་བརྩིགས། ༧ དེའི་དོན་དུ་དེས་ཡ་ཧུ་དཱ་ལ། ངེད་ཅག་གིས་ཡ་ཧོ་ཝཱ་རང་གི་དཀོན་མཆོག་བཙལ་བཙལ་བ་ལས། ཁོང་གིས་ངེད་ལ་ཕྱོགས་ཀུན་ནས་དུས་བདེ་གནང་བས། ད་དུང་ངེད་ཀྱི་ལག་ཏུ་ཡུལ་ཁམས་ཡོད་རིང་དུ། ངེད་ཀྱིས་གྲོང་ཁྱེར་རྣམས་རྩིག་ཅིང་། དེ་དག་གི་མཐའ་འཁོར་དུ་ལྕགས་རི་དང་། སྤེའུ་དང་། རྟ་སྒོ་དང་། སྒོ་གཏན་བྱེད་པར་བྱའོ། སྨྲས་ནས། དེ་དག་གིས་བརྩིགས་ཏེ། བསམ་དོན་གྲུབ་པར་གྱུར་ཏོ། ༨ ཨ་སཱའི་དམག་མི་ལ་ཡ་ཧུ་དཱའི་ནང་ནས་ཕུབ་དང་མདུང་ཐོགས་མཁན་འབུམ་ཕྲག་གསུམ་དང་། བེན་ཡ་མིན་གྱི་ནང་ནས་ཕུབ་དང་གཞུ་ཐོགས་མཁན་འབུམ་ཕྲག་གཉིས་དང་བརྒྱད་ཁྲི་ཡོད་དེ། དེ་ཐམས་ཅད་དམག་རྩལ་ཅན་ཡོད་པ་ཡིན།