དེ་ནས་ཅི་བྱུང་ཞེ་ན། རེ་ཧབ་ཨམ་གྱི་རྒྱལ་སྲིད་ལ་སྲད་ཆགས་ནས། ཤུགས་ཅན་སོང་བའི་ཚེ་ན། དེ་དང་མཉམ་དུ་ཨིས་ར་ཨེལ་ཚང་མས་ཡ་ཧོ་ཝཱའི་བཀའ་རྒྱ་སྤངས་སོ། ༢ དེ་ནས་རྒྱལ་པོ་རེ་ཧབ་ཨམ་གྱི་ལོ་ལྔ་པར། མི་སེར་རྒྱལ་པོ་ཤི་ཤཱག་གིས་ཡེ་རུ་ཤ་ལེམ་ལ་དམག་དྲངས། གང་ལ་ཞེ་ན། དེ་དག་གིས་ཡ་ཧོ་ཝཱའི་དྲུང་དུ་ཉེས་སྡིག་སྤྱད་པའི་ཕྱིར་རོ། ༣ དེ་དང་ལྷན་ཅིག་ཏུ་མི་སེར་ནས་ཐོན་པའི་ཤིང་རྟ་ཆིག་སྟོང་ཉིས་བརྒྱ་དང་། རྟ་པ་དྲུག་ཁྲི་དང་། ལིབ་ཡཱ་པ་དང་། སུག་པ་དང་། ཀུས་པའི་མི་གྲངས་མེད་ཡོད་པས། ༤ དེས་ཡ་ཧུ་དཱའི་གྲོང་ཁྱེར་བཙན་པོ་རྣམས་བླངས་ཏེ། ཡེ་རུ་ཤ་ལེམ་དུ་འོངས་སོ། ༥ དེ་ནས་ལུང་སྟོན་པ་ཤེ་མ་ཡཱས་རེ་ཧབ་ཨམ་དང་། ཤི་ཤཱག་གིས་རྐྱེན་བྱས་ནས་ཡེ་རུ་ཤ་ལེམ་དུ་འདུས་པའི་ཡ་ཧུ་དཱའི་སྐུ་དྲག་རྣམས་ལ། ཡ་ཧོ་ཝཱས་འདི་སྐད་གསུང་། ཁྱོད་ཚོས་ང་སྤངས་པས། ངས་ཀྱང་ཁྱོད་ཚོ་ཤི་ཤཱག་གི་ལག་ཏུ་འཁད་བཅུག་པ་ཡིན། ཞེས་གསུང་ངོ་སྨྲས་པ་ལས། ༦ ཨིས་ར་ཨེལ་གྱི་སྐུ་དྲག་རྣམས་དང་རྒྱལ་པོས་སྙེམས་ཆུང་བྱས་ཏེ། ཡ་ཧོ་ཝཱ་ལ་ཐུགས་མད་ཅེས་ཞུས་ཏེ། ༧ ཡ་ཧོ་ཝཱས་ནི། དེ་དག་གིས་སྙེམས་ཆུང་བྱེད་པར་གཟིགས་པ་དང་། ཤེ་མ་ཡཱ་ལ་ཡ་ཧོ་ཝཱའི་བཀའ་བྱུང་ཞིང་འདི་སྐད་དུ། དེ་དག་གིས་སྙེམས་ཆུང་བྱེད་པས་ན། ངས་དེ་དག་མེད་པར་མི་བྱ་བར། རིང་མི་ཐོགས་པར་སྒྲོལ་བར་བྱ་བས། ཤི་ཤཱག་བརྒྱུད་ངས་ཡེ་རུ་ཤ་ལེམ་གྱི་ཐོག་ཏུ་ཉིད་ཀྱི་ཁོང་ཁྲོ་མི་དབབ། ༨ འོན་ཀྱང་དེ་ཚོས་ངའི་གཡོག་བྱེད་པ་དང་། སའི་རྒྱལ་པོ་སོ་སོའི་གཡོག་བྱེད་པའི་དབྱེ་བ་རྟོགས་པའི་སླད་དུ། ངས་དེ་དག་དེའི་བྲན་པོར་བྱའོ་གསུང་ངོ་། ཞེས་སྦྲན་ཏོ༎