དེ་ནས་ཤེ་བཱ་ཡི་རྒྱལ་མོས་ཤ་ལོ་མོའི་སྙན་གྲགས་ཐོས་པས། འཁོར་ཆེན་པོ་དང་། སྤོད་དང་། གསེར་མང་པོ་དང་། རྡོ་བ་རིན་པོ་ཆེ་བཀལ་བའི་རྔ་མོང་དག་དང་བཅས་སུ། གབ་ཚིག་གིས་ཁོང་གི་ཚོད་ལེན་དུ་ཡེ་རུ་ཤ་ལེམ་དུ་འོངས་ཏེ། ཤ་ལོ་མོ་གང་ན་བར་ཕྱིན་ནས། མོའི་སྙིང་ལ་གང་ཡོད་པ་ཐམས་ཅད་ཀྱི་སྐོར་དུ། ཁོང་དང་གཏམ་བྱས་ནས། ༢ ཤ་ལོ་མོས་དེའི་དྲི་བ་ཚང་མ་ལ་ལན་བཏབ་སྟེ། མོའི་དྲི་བ་གང་ལ་ཡང་ལན་མི་ཐེབས་པའི་ཕྱིར་ཤ་ལོ་མོ་ལ་ནི་གབ་ཚིག་མེད་པ་ཡིན། ༣ དེ་ནས་ཤེ་བཱ་ཡི་རྒྱལ་མོས་ཤ་ལོ་མོའི་བློ་མཁས་པ་དང་། ཁོང་གིས་བཞེངས་པའི་ཕོ་བྲང་དང་། ༤ ཁོང་གི་གསོལ་ལྕོག་གི་ཁ་ཟས་དང་། ཁོང་གི་ཞབས་ཕྱི་རྣམས་ཀྱི་སྡོད་ལུགས་དང་། མདུན་ན་འདོན་པ་རྣམས་ཀྱི་འཚོགས་ལུགས་དང་། དེ་རྣམས་ཀྱི་ཆས་དང་། སྟེགས་དཔོན་རྣམས་དང་། དེ་དག་གི་གོས་དང་། ཁོང་ཡ་ཧོ་ཝཱའི་ཕོ་བྲང་དུ་ཡར་འགྲོ་རྒྱུའི་སྐས་ཀ་དེ་མཐོང་བ་དང་། མོའི་དྲན་པ་སྟོར་ནས། ༥ རྒྱལ་པོ་ལ། ངས་རང་གི་ཡུལ་དུ་ཁྱེད་ཀྱི་མཛད་པ་དང་བློ་མཁས་པའི་སྐོར་ཐོས་པའི་ལོ་དེ་བདེན་ཏེ། ༦ འོན་ཀྱང་ང་འདིར་བསླེབས་ནས། རང་གི་མིག་གིས་མ་མཐོང་བའི་བར་དུ། ལོ་དེ་ལ་ཡིད་མ་ཆེས་པ་ཡིན། གཟིགས་ཤིག ཁྱེད་ཀྱི་ཤེས་རབ་ཀྱི་ཆེ་ཁྱད་ཀྱི་ཕྱེད་ཁ་ཙམ་ཡང་ངས་ཐོས་པ་མིན་པས། ངས་ཐོས་པའི་ལོ་ལས་ནི་ཁྱེད་ལྷག་པར་དུ་དྲག་གོ། ༧ ཁྱེད་ཀྱི་མི་རྣམས་བཀྲ་ཤིས་ཏེ། དུས་རྒྱུན་དུ་ཁྱེད་ཀྱི་དྲུང་ན་སྡོད་ཅིང་། ཁྱེད་ཀྱི་ཤེས་རབ་ཐོས་པའི་ཞབས་ཕྱི་འདི་རྣམས་བཀྲ་ཤིས་པའོ། ༨ ཡ་ཧོ་ཝཱ་ཁྱེད་ཀྱི་དཀོན་མཆོག་ལ་བཀྲ་ཤིས་ཤོག ཁོང་ཁྱེད་ལ་མཉེས་ཏེ། ཡ་ཧོ་ཝཱ་ཁྱེད་ཀྱི་དཀོན་མཆོག་གི་ཚབ་ཏུ་རྒྱལ་པོ་བྱེད་དུ། ཁྱེད་ནི་ཡ་ཧོ་ཝཱ་ཁྱེད་ཀྱི་དཀོན་མཆོག་གི་རྒྱལ་ཁྲིར་བཞག་པ་ཡིན། དེ་ཅིའི་ཕྱིར་ཞེ་ན། ཁྱེད་ཀྱི་དཀོན་མཆོག་གིས་ཨིས་ར་ཨེལ་ལ་བྱམས་ཤིང་། དེ་དག་དུས་རྒྱུན་དུ་འཇོག་པའི་ཕྱིར་དུ། ཁྲིམས་དང་ཞལ་ཆེ་དྲང་པོ་གཅོད་དུ་དེ་དག་གི་རྒྱལ་པོར་ཁྱེད་བསྐོས་པ་ལགས་སོ། ཞེས་ཤིས་པར་བརྗོད་ནས། ༩ རྒྱལ་པོ་ལ་གསེར་གྱི་རྡོ་ཚད་བརྒྱ་དང་ཉི་ཤུ་དང་། སྤོད་མང་པོ་དང་། རྡོ་བ་རིན་པོ་ཆེ་མང་པོ་ཕུལ་ཏོ། ཤེ་བཱ་ཡི་རྒྱལ་མོས་རྒྱལ་པོ་ཤ་ལོ་མོ་ལ་ཕུལ་བའི་སྤོད་དེ་ལྟ་བུ་ཞིག་ནམ་དུ་ཡང་མ་བསླེབས་སོ༎