ཤ་ལོ་མོས་ལོ་ཉི་ཤུའི་ནང་དུ་ཡ་ཧོ་ཝཱའི་ཕོ་བྲང་དང་རང་གི་ཕོ་བྲང་རྩིག་ཟིན་པའི་མཐར། ༢ ཧུ་རམ་གྱིས་ཤ་ལོ་མོ་ལ་ཕུལ་བའི་གྲོང་ཁྱེར་རྣམས་ཤ་ལོ་མོས་བརྩིགས་ནས། དེ་དག་གི་ནང་དུ་ཨིས་ར་ཨེལ་གྱི་བུ་བརྒྱུད་གནས་བཅུག་གོ། ༣ དེ་ནས་ཤ་ལོ་མོ་་ཧ་མད་ཙོ་བཱ་རུ་ཕྱིན་ནས། དེ་ལས་རྒྱལ་བྱུང་། ༤ ཡང་འབྲོག་སྟོང་གི་ཐད་མོར་དང་། ཧ་མད་ཀྱི་བང་མཛོད་ཀྱི་གྲོང་ཁྱེར་རྣམས་དང་། ༥ བེད་ཧོ་རོན་གོང་འོག་གཉིས་བཅས་ལྕགས་རི་དང་རྒྱ་སྒོ་དང་སྒོ་གཏན་གྱིས་བརྟན་པོར་བྱས་པའི་གྲོང་ཁྱེར་དེ་རྣམས་བརྩིགས་པ་ཡིན། ༦ ཡང་ཤ་ལོ་མོའི་ཡིན་པའི་བ་ཨ་ལད་དང་། བང་མཛོད་ཀྱི་གྲོང་ཁྱེར་དང་། ཤིང་རྟའི་གྲོང་ཁྱེར་དང་། རྟ་པའི་གྲོང་ཁྱེར་རྣམས་དང་། ཤ་ལོ་མོས་ཡེ་རུ་ཤ་ལེམ་དང་། ལི་བ་ནོན་དང་། རང་གི་རྒྱལ་སྲིད་ཀྱི་ཡུལ་ཚང་མར་ཅི་དང་ཅི་བརྩིག་པར་འདོད་པ་ཐམས་ཅད་བསྒྲུབས་སོ། ༧ ཡང་ཨིས་ར་ཨེལ་མིན་པའི་ཧེད་པ་དང་། ཨ་མོར་པ་དང་། ཕེ་རི་ཟི་པ་དང་། ཧི་ཝི་པ་དང་། ཡེ་བུས་པའི་ནང་ནས་ལུས་པའི་མི་སྡེ་ཚང་མ། ༨ ཨིས་ར་ཨེལ་གྱི་བུ་བརྒྱུད་ཀྱིས་མ་སྣུབ་པར། ཡུལ་ཁམས་ཀྱི་ནང་དུ་ལུས་པའི་བརྒྱུད་དེ་དག་ལ། ཤ་ལོ་མོས་དེ་རིང་གི་བར་དུ་ལུས་པ་ལྟར་དུ། དཔྱ་ཁྲལ་གྱི་ཚབ་ཏུ་ཁྲལ་རྒྱུག་ཏུ་བཅུག་པ་ཡིན། ༩ འོན་ཀྱང་ཤ་ལོ་མོས་ཨིས་ར་ཨེལ་གྱི་བུ་བརྒྱུད་ཀྱི་ནང་ནས་གང་ཡང་རང་གི་ལས་བྱེད་དུ་འཁོལ་པོར་མ་བཞག་གིས། དེ་རྣམས་ཁོང་གི་དམག་མི་དང་། དམག་དཔོན་དང་། ཤིང་རྟ་དང་རྟ་པའི་འགོ་པ་བྱས་པ་ཡིན། ༡༠ ཡང་རྒྱལ་པོ་ཤ་ལོ་མོའི་འགོ་བྱེད་ཀྱི་ནང་ནས་ཆེ་བ་ཉིས་བརྒྱ་ལྔ་བཅུ་ཡོད་པ་ཡིན་ཏེ། དེ་དག་གིས་ལས་མི་རྣམས་ཀྱི་འགོ་པ་བྱས་པ་ཡིན།