དེ་ནས་ཤ་ལོ་མོས་ཡེ་རུ་ཤ་ལེམ་གྱི་མོ་རི་ཡཱའི་རིའི་ཐོག་ཏུ། དེའི་ཡབ་དཱ་བིད་ལ་ཡ་ཧོ་ཝཱ་སྣང་བར་གྱུར་ནས། དཱ་བིད་ཀྱིས་ཡེ་བུས་པ་ཨོར་ནན་གྱི་གཡུལ་ཐང་གི་ཁར་བཤམས་པའི་གནས་སུ། ཡ་ཧོ་ཝཱའི་ཕོ་བྲང་དེ་བཞེང་བར་བརྩམས་ཏེ། ༢ དེས་རྒྱལ་སྲིད་སྐྱོང་བའི་ལོ་བཞི་པའི་ཟླ་བ་གཉིས་པའི་ཚེས་གཉིས་པའི་ཞག་ལ། མཁར་ལས་བྱེད་དུ་ཚུགས་སོ། ༣ འདི་ནི་ཤ་ལོ་མོ་ཡ་ཧོ་ཝཱའི་ཕོ་བྲང་གི་རྩིག་རྨང་བཏིང་བའི་མ་གདན་ཏེ། སྔར་གྱི་འཇལ་ཚད་བཞིན་དུ་རིང་ཁྱད་དུ་ཁྲུ་དྲུག་ཅུ་དང་། ཞེང་ཁྱད་དུ་ཁྲུ་ཉི་ཤུ། ༤ ཡང་ཕོ་བྲང་གི་སྒོ་ཁང་གི་རིང་ཁྱད་ནི། ཕོ་བྲང་གི་ཞེང་ལྟར་ཁྲུ་ཉི་ཤུ་དང་། མཐོ་ཁྱད་དུ་ཁྲུ་བརྒྱ་དང་ཉི་ཤུའོ། ཁོང་གིས་དེའི་ནང་ལོགས་ནི་གསེར་བཙོ་མས་གཡོགས་སོ། ༥ ཡང་ཁྱིམ་ཆེན་པོ་དེ་ལ་ཐང་ཤིང་གི་སྤང་ལེབ་ཀྱིས་བཀབ་སྟེ། གསེར་བཙོ་མས་གཡོགས་ནས། དེའི་ཁར་ཁ་ཟུར་ཤིང་དང་ཉག་ཐག་བཟོས་པ་ཡིན། ༦ མཛེས་རྒྱན་གྱི་ཕྱིར་ཁྱིམ་དེ་རྡོ་བ་རིན་པོ་ཆེས་སྤྲས་ཏེ། དེའི་གསེར་ནི་པར་ཝ་ཨིམ་གྱི་གསེར་ཡོད་པ་ཡིན། ༧ ཡང་ཕོ་བྲང་དང་། གདུང་མ་རྣམས་དང་། སྒོ་ཐེམ་དང་། རྩིག་པ་དང་། སྒོ་རྣམས་གསེར་གྱིས་བཏུམ་ནས། རྩིག་པ་རྣམས་ཀྱི་ཁར་བརྐོས་ནས། ཀེ་རུབ་བྱས། ༨ དེ་ནས་ཁོང་གིས་རབ་ཏུ་དམ་པའི་གཞལ་ཡས་ཁང་དེ་བཞེངས་ཏེ། དེའི་རིང་ནི་ཕོ་བྲང་གི་ཞེང་ཁྱད་ལྟར་ཁྲུ་ཉི་ཤུ་དང་། ཞེང་ཡང་ཁྲུ་ཉི་ཤུའོ། ཡང་གསེར་བཙོ་མ་རྡོ་ཚད་དྲུག་བརྒྱས་དེ་གཡོགས་སོ། ༩ གཟེར་རྣམས་ཀྱི་སྐར་ཁ་ནི་གསེར་གྱི་ཤེ་ཀེལ་ལྔ་བཅུ་སྟེ། སྟེང་ཐོག་གི་ནང་ཆུང་རྣམས་ཀྱང་གསེར་གྱིས་བཏུམ་མོ༎