དཱ་བིད་ཀྱི་དུས་སུ་ལོ་གསུམ་སྟུད་མར་མུ་གེ་བྱུང་བས། དཱ་བིད་ཀྱིས་ཡ་ཧོ་ཝཱ་ལ་ཐུགས་བརྟག་ཞུས་ནས། ཡ་ཧོ་ཝཱས་བཀའ་ལན་དུ། ཤ་ཨུལ་གྱིས་གི་བེ་ཨོན་པ་རྣམས་བསད་པས་ན། ཁྲག་འཕོ་བར་བྱེད་པའི་བརྒྱུད་ཀྱི་རྐྱེན་གྱིས་བྱུང་ངོ་ཞེས་གསུངས་སོ། ༢ གི་བེ་ཨོན་པ་རྣམས་ནི་ཨིས་ར་ཨེལ་གྱི་བརྒྱུད་ལས་མ་ཡིན་གྱི། ཨ་མོར་པ་ལས་ལུས་པ་ཡིན་ནོ། ཨིས་ར་ཨེལ་གྱི་བུ་རྣམས་ཀྱིས་དེ་དག་དང་མནའ་ཐོ་བྱས་ཀྱང་། ཤ་ཨུལ་གྱིས་ཨིས་ར་ཨེལ་དང་ཡ་ཧུ་དཱ་ཡི་བུ་རྣམས་ཀྱི་དོན་ལ་དམིགས་ནས། དེ་དག་གསོད་དུ་བསྙེགས་པ་ཡིན་ནོ། ཡང་རྒྱལ་པོས་གི་བེ་ཨོན་པ་རྣམས་བོས་ནས། དེ་དག་ལ། ༣ ཁྱོད་ཅག་གིས་ཡ་ཧོ་ཝཱའི་ནོར་སྐལ་ལ་བྱིན་གྱིས་རློབས་པའི་དོན་དུ་ངས་ཁྱོད་ཅག་ལ་ཅི་བྱེད་པར་དགོས། སྡིག་བཤགས་སུ་ངས་ཅི་གཏོང་བར་དགོས། ཞེས་དྲིས་པས། ༤ གི་བེ་ཨོན་པས་ཁོང་ལ། ཤ་ཨུལ་དང་དེའི་བརྒྱུད་ཀྱི་དངུལ་དང་གསེར་ང་ཚོ་ལ་མི་དགོས། ང་ཚོའི་དོན་དུ་ཨིས་ར་ཨེལ་གྱི་སྐྱེས་པ་གང་ཡང་གསོད་པར་མི་དགོས། ཞེས་ཞུས་པས། ཁོང་གིས་ནི། དེ་ནས་ངས་ཁྱོད་ཅག་གི་དོན་དུ་ཅི་བྱེད་པར་དགོས། ༥ ཞེས་པའི་གཏམ་ལན་དུ་དེ་དག་གིས་རྒྱལ་པོ་ལ། ང་ཚོ་ནི་བསད་ནས། ང་ཚོ་ཨིས་ར་ཨེལ་གྱི་ས་མཐའ་གང་དུའང་མི་ལུས་པའི་དོན་དུ། ང་ཚོ་མེད་པར་བྱེད་པའི་ཇུས་བྱས་པའི་མི་དེའི་ཕྱིར་དུ། ༦ དེའི་བུ་རྣམས་ཀྱི་ནང་ནས་མི་བདུན་ང་ཚོའི་ལག་ཏུ་སྤྲོད་ཅིག་དང་། ཡ་ཧོ་ཝཱས་འདམས་པའི་ཤ་ཨུལ་གྱི་གི་བེ་ཨ་རུ་ཡ་ཧོ་ཝཱའི་དོན་དུ་ང་ཚོས་དེ་དག་ནི་འཕྱར་བར་བྱའོ་ཞེས་ཞུས་པས། རྒྱལ་པོས་ནི། ངས་དེ་བཞིན་གཏོང་བར་བྱ་ཞེས་གསུངས་སོ༎