བྱ་བ་དེའི་འོག་ཏུ་དཱ་བིད་ཀྱི་བུ་ཨབ་ཤ་ལོམ་ལ་སྲིང་མོ་བྱད་མཛེས་མ་ཐ་མར་བྱ་བ་ཞིག་ཡོད་པ་ལས། དཱ་བིད་ཀྱི་བུ་ཨམ་ནོན་གྱི་སེམས་དེ་ལ་འཕྲེང་བར་གྱུར་པས། ༢ ཨམ་ནོན་རང་གི་སྲིང་མོ་ཐ་མར་གྱི་དོན་དུ་རབ་ཏུ་སེམས་མི་བདེ་བར་སོང་སྟེ། ན་བར་གྱུར་ཏོ། དེ་ནི་ན་ཆུང་གཙང་མ་ཞིག་ཡིན་ཏེ། ཨམ་ནོན་གྱིས་དེ་ལ་ཐབས་གང་བྱེད་ཀྱང་། རང་གི་ཕྱིར་དཀའ་བ་མཐོང་བ་ཡིན། ༣ ཨམ་ནོན་ལ་མཛའ་གྲོགས་ཤིག་ཡོད་དེ། མི་དེའི་མིང་ཡོ་ན་དབ་སྟེ། དེ་ནི་དཱ་བིད་ཀྱི་གཅེན་པོ་ཤི་མེ་ཨ་ཡི་བུ་ཡིན་ཏེ། ཡོ་ན་དབ་ནི་མི་ཤིན་ཏུ་བློ་གྲོས་ཅན་ཞིག་ཡིན་པས། ༤ དེས་ཨམ་ནོན་ལ། ཁྱེད་རྒྱལ་སྲས་ལགས་བཞིན་ཞག་ལས་ཞག་རིད་དུ་འགྲོ་བ་དེ་ཅི་ཡིན། ཁྱེད་ཀྱིས་ང་ལ་འཆད་པར་མི་མཛད་དམ་ཞེས་ཞུས་པས། ཨམ་ནོན་གྱིས་དེ་ལ། ང་རང་གི་གཅེན་པོ་ཨབ་ཤ་ལོམ་གྱི་སྲིང་མོ་ཐ་མར་ལ་ངའི་སེམས་སོང་བར་གདའ་བྱས་ནས། ༥ ཡོ་ན་དབ་ཀྱིས་དེ་ལ། ཁྱོད་མལ་སའི་ཁར་ཉལ་ཏེ། ན་རྫུན་རྒྱོབ་ཅིག་དང་། ཁྱོད་ཀྱི་ཡབ་ཁྱོད་ལ་གཟིགས་པར་འབྱོན་སྐབས་སུ། ཁྱོད་ཀྱིས་དེ་ལ། ངའི་སྲིང་མོ་ཐ་མར་འདིར་འོང་སྟེ། དེས་ང་ལ་བག་ལེབ་སྟེར་བ་དང་། ངའི་མཐོང་ས་རུ་བག་ལེབ་རྒྱབ་པར་གནོང་ཞིག རང་གིས་མཐོང་ནས། ངས་དེའི་ལག་པའི་ནང་ནས་ཟ་བར་བྱ་ཞེས་ཞུས་ཤིག་བསླབས་པས། ༦ ཨམ་ནོན་ཉལ་ཏེ། ན་རྫུན་བརྒྱབས་པ་དང་། རྒྱལ་པོ་ཁོ་ལ་གཟིགས་པར་འབྱོན་པའི་ཚེ་ན། ཨམ་ནོན་གྱིས་རྒྱལ་པོ་ལ། ངའི་སྲིང་མོ་ཐ་མར་འདིར་འོང་བར་གནོང་ཞིག་དང་། དེས་ངའི་མཐོང་ས་རུ་ངའི་ཕྱིར་བག་ལེབ་གཅིག་གཉིས་རྒྱབ་ཅིང་། ངས་དེའི་ལག་པའི་ནང་ནས་ཟ་བར་བྱ་ཞེས་ཞུས་པས།