ཡང་མོ་ཤེ་དང་ཨིས་ར་ཨེལ་གྱི་རྒན་པོ་རྣམས་ཀྱིས་མི་སྡེ་ལ་འདི་སྐད་དུ། ངས་དེ་རིང་ཁྱོད་ཅག་ལ་སྐུལ་བའི་བཀའ་ཐམས་ཅད་སྲུང་ཞིག ༢ ཡང་ཡ་ཧོ་ཝཱ་ཁྱོད་ཀྱི་དཀོན་མཆོག་གིས་ཁྱོད་ལ་གནང་བའི་ཡུལ་དུ་ཡོར་དན་གྱི་ཕ་རོལ་དུ་འགྲོ་བའི་ཉིན་མོར་ཁྱོད་ཀྱིས་རྡོ་ཆེན་པོ་རྣམས་བཙུགས་ནས་དཀར་རྩི་སྐུད་པར་བྱོས། ༣ ཡང་ཕ་རོལ་དུ་སོང་ནས་དེ་དག་གི་ཁར་བཀའ་ཁྲིམས་འདིའི་ཚིག་ཐམས་ཅད་འབྲི་བར་དགོས། གང་ལ་ཞེ་ན། ཡ་ཧོ་ཝཱ་ཁྱོད་ཀྱི་ཕ་མེས་ཀྱི་དཀོན་མཆོག་གིས་ཁྱོད་ལ་ཞལ་གྱིས་བཞེས་པ་བཞིན་དུ་ཡ་ཧོ་ཝཱ་ཁྱོད་ཀྱི་དཀོན་མཆོག་གིས་ཁྱོད་ལ་གནང་བའི་ཡུལ་འོ་མ་དང་སྦྲང་རྩིས་གང་བ་རུ་འཇུག་པར་འགྱུར་བའི་ཕྱིར་རོ། ༤ དེ་བས་ན་ཁྱེད་ཡོར་དན་གྱི་ཕ་རོལ་དུ་སོང་ནས། དེ་རིང་ངས་ཁྱེད་ལ་བསྒོ་བའི་རྡོ་རྣམས་རི་ཨེ་བལ་དུ་འཛུགས་ཏེ། དཀར་རྩི་སྐུད་པར་དགོས། ༥ དེ་རུ་ཡང་ཡ་ཧོ་ཝཱ་ཁྱོད་ཀྱི་དཀོན་མཆོག་གི་ཕྱིར་མཆོད་ཁྲི་རྒྱུ་རྡོ་ནས་མཆོད་ཁྲི་ཞིག་བཟོ་སྟེ་ལྕགས་རིགས་གང་ཡང་དེ་ལ་མ་རྒྱབ། ༦ ཡ་ཧོ་ཝཱ་ཁྱོད་ཀྱི་དཀོན་མཆོག་གི་མཆོད་ཁྲི་མ་བཞོགས་པའི་རྡོ་རྣམས་ལས་བཟོ་བ་དང་། དེའི་ཁར་ཡ་ཧོ་ཝཱ་ཁྱོད་ཀྱི་དཀོན་མཆོག་ལ་སྦྱིན་སྲེག་རྣམས་ཕུལ་ཞིག ༧ བདེ་བའི་མཆོད་པ་རྣམས་ཀྱང་འབུལ་ཏེ། དེར་ཟ་ཞིང་ཡ་ཧོ་ཝཱ་ཁྱོད་ཀྱི་དཀོན་མཆོག་གི་ཞལ་ངོར་སེམས་དགའ་བར་བྱོས། ༨ ཡང་རྡོ་རྣམས་ཀྱི་སྟེང་དུ་བཀའ་ཁྲིམས་འདིའི་ཚིག་ཐམས་ཅད་ཤིན་ཏུ་གསལ་པོར་འབྲི་བར་དགོས་ཤེས་བསྒོའོ༎