ཡང་ཡ་ཧོ་ཝཱས་མོ་ཤེ་ལ་འདི་སྐད་དུ། བླ་མ་རྣམས་སམ། ཨ་རོན་གྱི་བུ་རྣམས་ལ་འདི་སྐད་ཅེས་སྨྲོས་ཤིག མི་སུས་ཀྱང་རང་གི་མི་སྡེའི་ནང་ན་གཤིན་པོ་ཞིག་གི་ཕྱིར་དུ་རང་མི་གཙང་བར་བྱེད་དུ་མི་རུང་གི། ༢ རང་དང་གཉེན་ཉེ་བ་ཞེ་ན་མ་དང་། ཕ་དང་། བུ་དང་། བུ་མོ་དང་། ནུ་བོ་དང་། ༣ སྲིང་མོ་ནི་གལ་ཏེ་བུ་མོ་ན་ཆུང་ཡིན་ཞིང་རང་དང་མཉམ་དུ་ཡོད་པ་དང་། ཁྱོ་ད་དུང་མ་ཤེས་ན། དེ་དག་གི་ཕྱིར་མི་གཙང་བར་འགྱུར་བས་ཆོག་གོ། ༤ ཡང་མི་དེ་ནི་རང་གི་མི་སྡེའི་ནང་ན་ཁྱིམ་བདག་ཡིན་པས་གྲིབ་ཅན་མི་འགྱུར་བའི་ཕྱིར་རང་མི་གཙང་བར་བྱེད་པར་མི་རུང་ངོ་། ༥ ཡང་དེ་དག་གི་མགོ་སྤྱི་ཐེར་འབྲེག་པ་དང་། ཁ་སྤུའི་མཐའ་མ་འབྲེག་པ་དང་། ལུས་ཀྱི་ཤ་ལ་རི་མོ་ཞིག་བྱེད་པར་མི་རུང་ངོ་། ༦ དེ་དག་རང་གི་དཀོན་མཆོག་གི་ཕྱིར་དམ་པ་ཡིན་ཏེ། དེ་དག་གི་དཀོན་མཆོག་གི་མཚན་གྲིབ་ཅན་བྱེད་དུ་མི་རུང་ངོ་། གང་ལ་ཟེར་ན། ཡ་ཧོ་ཝཱའི་ཕྱིར་སྦྱིན་སྲེག་རྣམས། དཀོན་མཆོག་གི་ཞལ་ཟས་རྣམས་འབུལ་བའི་ཕྱིར་དེ་དག་དམ་པ་ཡིན་པར་དགོས་པའི་ཕྱིར་རོ། ༧ སྨད་འཚོང་མ་དང་བུ་མོ་མི་ཚངས་པར་གྱུར་པ་ཞིག་བག་མར་ལེན་པའམ། ཁྱོ་དང་ཕྲལ་བའི་བུད་མེད་ཅིག་དེ་དག་གིས་ལེན་པའི་མི་རིགས། དེ་ནི་དཀོན་མཆོག་གི་ཕྱིར་དམ་པ་ཡིན་པའི་ཕྱིར་རོ། ༨ མི་དེ་ཁྱོད་ཀྱི་ཕྱིར་དམ་པ་ཡིན་པར་དགོས། ཁྱོད་ཀྱི་དཀོན་མཆོག་གི་ཞལ་ཟས་འབུལ་བའི་ཕྱིར་དམ་པ་རྩི་བར་དགོས་སོ། ཅིའི་ཕྱིར་ཞེ་ན། ང་ནི་ཡ་ཧོ་ཝཱ་ཡིན་པས། ཁྱོད་རྣམས་དམ་པར་བྱེད་ཅིང་རང་དམ་པ་ཡིན་པའི་ཕྱིར་རོ། ༩ ཡང་བླ་མ་ཞིག་གི་བུ་མོས་གལ་ཏེ་ལོག་གཡེམ་བྱེད་པར་རྩོམ་ན། ཕ་མི་གཙང་བར་བྱེད་པས་མོ་མེས་སྲེག་པར་དགོས་སོ༎