༡༦ མོ་ཤེས་དེ་བཞིན་དུ་བྱས་ཤིང་། ཡ་ཧོ་ཝཱས་ཅི་དང་ཅི་བཀའ་གནང་བ་བཞིན་དུ་ཐམས་ཅད་བསྒྲུབས་སོ། ༡༧ དེ་ལྟར་ལོ་གཉིས་པའི་ཟླ་བ་དང་པོའི་ཚེས་དང་པོ་ལ་བཞུགས་གནས་དེ་བསྒྲེངས་སོ། ༡༨ མོ་ཤེས་བཞུགས་གནས་བསྒྲེངས་ཏེ་དེའི་ཞབས་གདན་རྣམས་བསྒྲིགས། སྤང་ལེབ་རྣམས་བསླངས། རྒྱབ་ལག་རྣམས་བཅུག ཀ་བ་རྣམས་ཀྱང་བསྒྲེངས་སོ། ༡༩ བཞུགས་གནས་ཀྱི་གུར་མཆོག་ཕུབ་ནས། ཡ་ཧོ་ཝཱས་མོ་ཤེ་ལ་བཀའ་གནང་བ་བཞིན་དུ་གུར་གྱི་ཐོག་ཡོལ་ཡང་བཏིང་ངོ་། ༢༠ དེ་ནས་དཔང་པོ་དེ་བླངས་ནས་སྒྲོམ་དུ་བཞག གདང་བུ་རྣམས་སྒྲོམ་ལ་བཅུག ཐུགས་རྗེའི་བཞུགས་ཁྲི་དེ་སྒྲོམ་གྱི་སྟེང་དུ་བཞག་གོ། ༢༡ ཡང་སྒྲོམ་བཞུགས་གནས་སུ་ཁྱེར་ནས། ཡ་ཧོ་ཝཱས་མོ་ཤེ་ལ་བཀའ་གནང་བ་བཞིན་དུ་དཔང་པོའི་སྒྲོམ་མི་མཐོང་བའི་ཕྱིར་དེའི་མདུན་དུ་ཡོལ་བ་འཕྱང་བར་བྱས་སོ། ༢༢ གསོལ་ལྕོག་དེ་འདུན་མའི་གུར་མཆོག་གི་ནང་དུ་བཞུགས་གནས་ཀྱི་ལོགས་གཅིག་ལ་བྱང་ཕྱོགས་སུ་ཡོལ་བའི་ཕྱི་རོལ་དུ་བཞག་པ་དང་། ༢༣ ཡ་ཧོ་ཝཱས་མོ་ཤེ་ལ་བཀའ་གནང་བ་བཞིན་དུ་དེའི་ཁར་ཡ་ཧོ་ཝཱའི་སྤྱན་གཟིགས་ཀྱི་བག་ལེབ་གྲལ་དུ་བཞག་གོ། ༢༤ དེ་ནས་མར་མེའི་སྟེགས་བུ་འདུན་མའི་གུར་མཆོག་གི་ནང་དུ་གསོལ་ལྕོག་གི་ཐད་དུ་ལྷོ་ཕྱོགས་སུ་བཞག་གོ། ༢༥ ཡ་ཧོ་ཝཱས་མོ་ཤེ་ལ་བཀའ་གནང་བ་བཞིན་དུ་ཁོས་དེའི་ཁར་ཡ་ཧོ་ཝཱའི་ཞལ་ངོར་མར་མེ་རྣམས་བཞག་གོ། ༢༦ མདུན་མའི་གུར་མཆོག་གི་ནང་དུ་ཡོལ་བའི་མདུན་དུ་གསེར་གྱི་མཆོད་ཁྲི་དེ་བཞག་ནས། ༢༧ ཡ་ཧོ་ཝཱས་མོ་ཤེ་ལ་བཀའ་གནང་བ་བཞིན་དུ་དེའི་ཁར་དྲི་ཞིམ་གྱི་བདུག་སྤོས་བདུགས་སོ། ༢༨ དེས་བཞུགས་གནས་ཀྱི་སྒོ་ཡོལ་དེ་ཡང་འཕྱང་བར་བྱས་སོ། ༢༩ འདུན་མའི་གུར་མཆོག་གི་བཞུགས་གནས་ཀྱི་སྒོའི་མདུན་དུ་ཁོས་སྦྱིན་སྲེག་གི་མཆོད་ཁྲི་དེ་བཞག་ནས། ཡ་ཧོ་ཝཱས་མོ་ཤེ་ལ་བཀའ་གནང་བ་བཞིན་དུ་དེའི་ཁར་སྦྱིན་སྲེག་དང་ཞལ་ཟས་རྣམས་མཆོད་པར་ཕུལ་ལོ། ༣༠ ཡང་འདུན་མའི་གུར་མཆོག་དང་མཆོད་ཁྲིའི་བར་ལ་དེས་གཞོང་པ་བཞག་ནས། འཁྲུད་པའི་ཕྱིར་ཆུ་དེའི་ནང་དུ་བླུགས་སོ། ༣༡ གཞོང་པ་དེ་ལས་མོ་ཤེ་དང་ཨ་རོན་དང་དེའི་བུ་རྣམས་ཀྱིས་རང་གི་ལག་པ་དང་རྐང་པ་རྣམས་ཁྲུས་སོ། ༣༢ ཅི་ལ་ཞེ་ན། ཡ་ཧོ་ཝཱས་མོ་ཤེ་ལ་བཀའ་གནང་བ་བཞིན་དུ་དེ་དག་འདུན་མའི་གུར་མཆོག་གི་ནང་དུ་ཞུགས་ནས། མཆོད་ཁྲིའི་དྲུང་དུ་འབྱུང་སྐབས་སུ་འཁྲུད་དགོས་པའི་ཕྱིར་རོ། ༣༣ དེ་ནས་བཞུགས་གནས་དང་མཆོད་ཁྲིའི་ཕྱོགས་བཞི་ནས་སྐོར་བའི་ཁྱམས་དེ་བསྒྲེངས་ནས། ཁྱམས་ཀྱི་སྒོ་ཆེན་པོའི་ཡོལ་བ་དེ་འཕྱང་བར་བྱས་སོ། དེ་ལྟར་མོ་ཤེས་ལས་ཀ་དེ་བསྒྲུབས་སོ༎

༣༤ དེའི་ཚེ་སྤྲིན་པའི་ཀ་བ་ནི་འདུན་མའི་གུར་མཆོག་གཡོགས་པ་དང་། ཡ་ཧོ་ཝཱའི་གཟི་བརྗིད་དེས་བཞུགས་གནས་ཁྱབ་བོ། ༣༥ མོ་ཤེ་འདུན་མའི་གུར་མཆོག་ཏུ་འཇུག་མ་ནུས་སོ། གང་ལ་ཟེར་ན། དེའི་སྟེང་ལ་སྤྲིན་པའི་ཀ་བ་གནས་ཤིང་ཡ་ཧོ་ཝཱའི་གཟི་བརྗིད་ནི་བཞུགས་གནས་བཀང་ཡོད་པའི་ཕྱིར་རོ། ༣༦ སྤྲིན་གྱི་ཀ་བ་ནི་བཞུགས་གནས་ནས་ནམ་བཞེངས་པའི་ཚེ། ཨིས་ར་ཨེལ་གྱི་བུ་རྣམས་རང་གི་ལམ་ཐམས་ཅད་དུ་ཆས་སོ། ༣༧ འོན་ཀྱང་སྤྲིན་གྱི་ཀ་བ་མ་བཞེངས་ན། དེ་མ་བཞེངས་པའི་ཞག་གི་བར་དུ་དེ་དག་མ་ཆས་སོ། ༣༨ ཅི་ལ་ཞེ་ན། ཨིས་ར་ཨེལ་གྱི་ཁྱིམ་ཚང་མའི་མཐོང་ངོར་དེ་དག་གི་ལམ་ཀུན་ལ་ཡ་ཧོ་ཝཱའི་སྤྲིན་གྱི་ཀ་བ་ཉིན་མོའི་དུས་སུ་བཞུགས་གནས་ཀྱི་སྟེང་དུ་གནས་ཏེ། མཚན་མོའི་དུས་སུ་དེའི་ངང་ན་མེ་ཞིག་ཡོད་པའི་ཕྱིར་རོ༎ ༎