དུས་དེར་བྱུང་བ་ནི། ཡ་ཧུ་དཱ་སྤུན་རྣམས་ཀྱི་དྲུང་ནས་སོང་སྟེ། ཨ་དུལ་ལམ་པའི་མི་ཧི་རཱ་བྱ་བ་ཞིག་གི་རྩར་སོང་ངོ་། ༢ ཡ་ཧུ་དཱས་དེ་རུ་ཀ་ན་ཨན་པ་ཤུ་ཨ་བྱ་བའི་བུ་མོ་ཞིག་མཐོང་ནས་བླངས་སོ། ཁོ་དེ་དང་འགྲོགས་ནས། ༣ མོ་མངལ་དང་ལྡན་པར་གྱུར་ནས། ཁོས་དེ་ལ་སྐྱེས་པའི་བུའི་མིང་ཨེར་བཏགས་སོ། ༤ དེ་ནས་ཡང་མངལ་དང་ལྡན་པར་གྱུར་ནས་སྐྱེས་པའི་བུའི་མིང་ཨོ་ནན་བཏགས་སོ། ༥ དེ་ལ་ཡང་བུ་ཞིག་སྐྱེས། ཁོས་དེའི་མིང་ཤེ་ལཱ་བཏགས་སོ། བུ་དེ་མོ་ལ་སྐྱེས་པའི་ཚེ། ཁོ་ཀེ་ཟིབ་ཡུལ་དུ་ཡོད་པ་ཡིན། ༦ དེ་ནས་ཡ་ཧུ་དཱ་ཡིས་རང་གི་བུ་སྔོན་སྐྱེས་ཨེར་ལ་ཐ་མར་ཞེས་བྱ་བ་ཆུང་མར་བླངས་སོ། ༧ ཡ་ཧུ་དཱ་ལ་བྱོར་པའི་བུ་སྔོན་སྐྱེས་ཨེར་ནི་ཡ་ཧོ་ཝཱའི་ཞལ་ངོའི་མདུན་དུ་སྤྱོད་ངན་བྱས་ནས་ཡ་ཧོ་ཝཱས་དེ་བསད་དོ། ༨ ཡ་ཧུ་དཱས་ཨོ་ནན་ལ། ཁྱོད་རང་གི་སྤུན་གྱི་ཆུང་མ་དང་འགྲོགས་ལ་ཁྱོད་ཀྱི་སྤུན་ལ་བུ་བརྒྱུད་འབྱུང་བའི་ཕྱིར་སྤུན་གྱི་ཚབ་ཏུ་དེ་ཆུང་མར་བློངས་ཤིག་ཅེས་སྨྲས་སོ། ༩ ཨོ་ནན་ལས་བྱོར་པ་ནི་རང་གི་བུ་བརྒྱུད་ལ་མི་འགྱུར་བ་ཤེས་པས། ཨ་ཇོའི་ཆུང་མ་དང་འགྲོགས་སྐབས་ལ་སྤུན་ལ་བུ་བརྒྱུད་མི་འབྱུང་བའི་ཕྱིར་ཁོས་དེ་ནི་ས་རུ་དོར་རོ། ༡༠ བྱ་བ་དེ་ཡ་ཧོ་ཝཱའི་ཞལ་ངོའི་མདུན་དུ་ངན་པ་ཡིན་པས། ཁོང་གིས་དེ་ཡང་བསད་དོ། ༡༡ དེའི་རྗེས་ལ་ཡ་ཧུ་དཱས་བུའི་ཆུང་མ་ཐ་མར་ལ། ངའི་བུ་ཤེ་ལཱ་ཆེར་མ་སྐྱེས་པའི་བར་དུ་ཡུག་ས་སྲུང་ཞིང་ཕའི་ཁང་པ་ལ་སྡོད་ཅིག་ཅེས་བསྐུལ་ཏོ། ཅི་ལ་ཞེ་ན། སྤུན་རྣམས་ཤི་བ་ལྟར་ཁོ་མི་ཤི་བའི་ཕྱིར་རོ། ཐ་མར་སོང་ནས་ཕའི་ཁང་པ་རུ་བསྡད་དོ༎