ཡང་ལ་བན་གྱི་བུ་རྣམས་ཀྱིས། ངེད་ཀྱི་ཕའི་ནོར་ཐམས་ཅད་ཡ་ཀོབ་ཀྱིས་ཁྱེར་ཏེ་ངེད་ཀྱི་ཕའི་ནོར་རྫས་ལས་ནོར་འདི་ཐམས་ཅད་བརྙེད་དོ། ཞེས་ཟེར་བའི་གཏམ་ཡ་ཀོབ་ཀྱིས་ཐོས་པ་དང་། ༢ ཡ་ཀོབ་ཀྱིས་ལ་བན་གྱི་གདོང་ལ་བལྟས་ཏེ། ལྟོས་དེས་རང་ལ་སྔོན་མ་བཞིན་དུ་མི་བྱེད་པ་མཐོང་ངོ་། ༣ ཡ་ཧོ་ཝཱས་ཡ་ཀོབ་ལ། ཁྱོད་ཀྱི་ཕ་ཡུལ་དུ་ལོག་དང་། ཁྱོད་ཀྱི་གཉེན་འབྲེལ་གྱི་རྩར་ཕྱིར་ལོག་ཅིག ང་ཁྱོད་དང་འགྲོགས་སོ་ཞེས་བཀའ་གནང་ངོ་། ༤ ཡང་ཡ་ཀོབ་ཀྱིས་ར་ཧེལ་དང་ལེ་ཨ་ལ་ངའི་ཁྱུའི་རྩར་ཐང་དུ་ཤོག་ཟེར་བའི་མི་ཞིག་བཏང་ནས། ༥ དེ་དག་ལ། ཁྱོད་ཀྱི་ཕའི་གདོང་ང་ལ་བལྟས་ཏེ་སྔོན་བཞིན་དུ་མེད་པར་མཐོང་ཡང་། ངའི་ཕའི་དཀོན་མཆོག་གིས་ང་ལ་སྐྱབས་མཛད་དོ། ༦ ངས་སྟོབས་ཚང་མ་ནས་ཁྱོད་ཅག་གི་ཕའི་གཡོག་བྱས་པ་ཁྱོད་ཅག་ལ་རྒྱུས་ཡོད། ༧ འོན་ཀྱང་ཁྱོད་ཀྱི་ཕས་ང་ལ་སྒྱུ་ཟོག་བྱས་ཏེ་ལན་བཅུ་ཙམ་ངའི་གླ་བསྒྱུར་ཀྱང་། ང་ལ་གནོད་པ་བྱེད་པ་དཀོན་མཆོག་གིས་དེ་ལ་མ་གནང་ངོ་། ༨ ཁོས་ཐིག་ལེ་ཅན་ཁྱོད་ཀྱི་གླ་ཡིན་སྨྲས་དུས་ཁྱུ་ཚང་མ་ཐིག་ལེ་ཅན་སྐྱེས། ཁོས་སྟག་རིས་ཅན་ཁྱོད་ཀྱི་གླ་ཡིན་སྨྲས་དུས་ཁྱུ་ཚང་མ་ལ་སྟག་རིས་ཅན་སྐྱེས། ༩ དེ་ལྟར་དཀོན་མཆོག་གིས་ཁྱེད་ཀྱི་ཕའི་ནོར་བཞེས་ཏེ་ང་ལ་གནང་ངོ་། ༡༠ ཡང་ཁྱུ་སྙོག་པའི་དུས་སུ་ངས་རྨི་ལམ་དུ་ངའི་མིག་བཏེགས་ཏེ་ར་ལུག་ལ་མཆོང་བའི་ར་ཐུག་དང་ལུག་ཐུག་རྣམས་ནི་སྟག་རིས་ཅན་དང་། ཐིག་ལེ་ཅན་དང་། ཁྲ་བོ་ཡོད་པར་མཐོང་བ་དང་། ༡༡ དཀོན་མཆོག་གི་ཕོ་ཉས་རྨི་ལམ་དུ་ང་ལ། ཀྱེ་ཡ་ཀོབ་གསུངས་ནས། ང་འདི་རུ་ཡོད་ཞུས་པ་ཡིན། ༡༢ དེས་ཡང་ང་ལ། ཁྱོད་ཀྱི་མིག་ཐེགས་ལ་ཁྱུ་ལ་མཆོང་བའི་ར་ཐུག་དང་ལུག་ཐུག་ཐམས་ཅད་ནི་སྟག་རིས་ཅན་དང་། ཐིག་ལེ་ཅན་དང་། ཁྲ་བོ་ཡིན་པ་ལ་ལྟོས། ལ་བན་གྱིས་ཁྱོད་ལ་བྱས་པ་ཐམས་ཅད་ངས་གཟིགས་སོ། ༡༣ གང་དུ་ཁྱོད་ཀྱིས་ཐོ་ཡོར་ཁར་འབྲུ་མར་བླུགས་ནས། ང་ལ་དམ་བཅའ་བྱས་པའི་བེད་ཨེལ་གྱི་དཀོན་མཆོག་དེ་ནི་ང་ཡིན་པས། ད་ལོངས་ལ། ཡུལ་འདི་ནས་ཐོན་ཏེ། ཁྱོད་ཀྱི་ཕ་ཡུལ་དུ་ཕྱིར་ལོག་སོང་ཞིག་ཅེས་བཀའ་གནང་ངོ་། ༡༤ དེ་སྐད་གསུངས་པའི་ལན་དུ་ར་ཧེལ་དང་ལེ་ཨ་གཉིས་ཀྱིས་དེ་ལ། ད་དུང་ངེད་ཀྱི་ཕའི་ཁང་པ་ནས་ང་ཅག་ལ་སྐལ་བའམ་ནོར་སྐལ་ཞིག་ཡོད་དམ། ༡༥ མི་ཡན་ལ་བྱེད་པ་ལྟར་ཁོས་ང་ཅག་ལ་མ་བྱས་སམ། ཁོས་ང་ཅག་བཙོངས་ནས་ངེད་ཀྱི་ཕྱིར་ཐོབ་པའི་རིན་ཁོས་ཡོངས་སུ་ཟོས། ༡༦ འོ་ན་དཀོན་མཆོག་གིས་ངེད་ཀྱི་ཕ་ནས་ཁྱེར་བར་མཛད་པའི་ནོར་ཐམས་ཅད་ངེད་དང་ངེད་ཀྱི་ཕྲུ་གུ་རྣམས་ཀྱི་ཡིན་པས། དཀོན་མཆོག་གིས་ཁྱོད་ལ་བཀའ་ཅི་དང་ཅི་གནང་བ་བཞིན་དུ་བྱོས་ཤིག་ཅེས་སྨྲས་སོ༎