ས་རཱ་ཡི་ཚེ་ཚད་ལོ་བརྒྱ་དང་ཉི་ཤུ་རྩ་བདུན་ཙམ་དུ་ཕྱིན་ཏེ། ༢ ས་རཱ་་ཁིར་ཡད་ཨར་བཱ་ན་ཤིའོ། དེ་ནི་ཀ་ན་ཨན་ཡུལ་ན་ཡོད་པའི་ཧེབ་རོན་ཡིན། ཨབ་ར་ཧམ་་ས་རཱ་ཡི་ཕྱིར་དུ་མྱ་ངན་དང་ངུ་འབོད་བྱེད་དུ་འོངས་སོ། ༣ ཡང་ཨབ་ར་ཧམ་རང་གི་གཤིན་མོའི་དྲུང་ནས་ལངས་ཏེ་ཧེད་པ་རྣམས་ལ་འདི་སྐད་དུ། ༤ ང་རྒྱལ་ཁམས་པ་ཡིན་ཏེ་ཁྱེད་རྣམས་ཀྱི་ཁྲོད་དུ་གཞིས་བཟུང་ནས་ངའི་གཤིན་མོ་འདི་ངའི་དྲུང་ནས་དུར་དུ་འཇུག་པའི་ཕྱིར་ཁྱེད་ཀྱི་ཁྲོད་ནས་ས་ཆ་ཞིག་ངའི་ལག་ཏུ་གཏང་དུ་གསོལ་ཞེས་ཞུས་པའི་ལན་དུ། ༥ ཧེད་པ་རྣམས་ཀྱིས་ཨབ་ར་ཧམ་ལ། ༦ ཇོ་བོ། ངེད་རྣམས་ལ་གསོན་ཞིག ཁྱེད་ངེད་རྣམས་ཀྱི་ཁྲོད་དུ་དཀོན་མཆོག་ལ་རྟེན་པའི་དཔོན་པོ་ཆེན་པོ་ཞིག་ཡིན་ཏེ། ངེད་ཀྱི་དུར་ས་རྣམས་ཀྱི་མཆོག་ཡིན་པ་དེར་ཁྱེད་ཀྱི་གཤིན་མོ་དུར་དུ་ཆུག་ཅིག ཁྱེད་ཀྱི་གཤིན་མོ་དུར་དུ་འཇུག་པ་ལ་ངེད་ཀྱི་ནང་ནས་མི་སུས་ཀྱང་རང་གི་དུར་ཁྱེད་ཀྱི་ཕྱིར་མི་དགག་གོ་ཞེས་སྨྲས་སོ། ༧ དེ་ནས་ཨབ་ར་ཧམ་ལངས་ཏེ་ཡུལ་མི་ཧེད་པ་རྣམས་ཀྱི་མདུན་དུ་ལུས་ས་ལ་བརྡབས་ཏེ་དེ་དག་ལ། ༨ ངའི་གཤིན་མོ་འདི་ངའི་དྲུང་ནས་དུར་དུ་འཇུག་པ་ཁྱེད་རྣམས་ཀྱི་ཐུགས་སུ་འགྲོ་ན་ང་ལ་གསན་ཞུ། ཚོ་ཧར་གྱི་བུ་ཨེབ་རོན་བྱ་བས་དབང་བའི་མག་ཕེ་ལཱ་བྱ་བའི་བྲག་ཕུག་དེ་རང་གི་ཞིང་གི་ཟུར་ལ་ཡོད་པ་དེ། ༩ ང་ལ་གནང་བའི་ཕྱིར་ངའི་སླད་དུ་ཞུ་བ་ཕུལ་ཞིག ཁོས་རིན་ཚང་པོ་བླངས་ཏེ་ཕུག་པ་དེ་ཁྱེད་ཀྱི་ཁྲོད་དུ་ངའི་བརྒྱུད་ཀྱི་དུར་དུ་དབང་བར་གནང་བར་ཞུས་ཤིག་ཅེས་སྨྲས་སོ༎