བྱ་བ་འདི་དག་གི་འོག་ཏུ་དཀོན་མཆོག་གིས་ཨབ་ར་ཧམ་ལ་ཚོད་བཞེས་ཤིང་དེ་ལ། ཨབ་ར་ཧམ། གསུངས་པ་དང་དེས་ང་འདི་རུ་ཡོད་ཞུས་ནས། ༢ ཁོང་གིས་ད་ཁྱོད་ཀྱིས་རང་གིས་གཅེས་པར་འཛིན་པའི་བུ་གཅིག་པུ་ཨི་སཱག་ཁྲིད་དེ་མོ་རི་ཡཱ་ཡུལ་དུ་སོང་ལ། ངས་ཁྱོད་ལ་བསྟན་པར་བྱ་བའི་རི་ཞིག་ཏུ་ཁོ་སྦྱིན་སྲེག་གི་མཆོད་པར་ཕུལ་བར་བྱོས་ཤིག་ཅེས་བཀའ་བསྩལ་ཏོ། ༣ ཨབ་ར་ཧམ་ཐོ་རངས་ལ་ལངས་ཏེ་བོང་བུ་ཞིག་ལ་སྒ་བསྟད་དེ། ཁོ་རང་གི་བྲན་པོ་རྣམས་ནས་གཉིས་དང་། བུ་ཨི་སཱག་ཁྲིད་དེ་སྦྱིན་སྲེག་གི་ཤིང་བཅད་ནས་ལམ་དུ་ཞུགས་པ་དང་། དཀོན་མཆོག་གིས་དེ་ལ་བཀའ་གནང་བའི་གནས་སུ་སོང་ངོ་། ༤ ཞག་གསུམ་པ་ལ་ཨབ་ར་ཧམ་གྱིས་མིག་བཏེགས་ཏེ་གནས་དེ་རྒྱང་མ་ནས་མཐོང་ངོ་། ༥ ཨབ་ར་ཧམ་གྱིས་བྲན་པོ་ལ། བོང་བུ་དང་བཅས་སུ་འདི་རུ་སྡོད་ཅིག་དང་། ང་རང་དང་བུ་དེར་ཕྱིན་ཏེ་སྨོན་ལམ་བཏབ་ནས་ཁྱོད་ཅག་གི་རྩར་ལོག་ཡོང་ཞེས་བསྒོའོ། ༦ དེ་ནས་ཨབ་ར་ཧམ་གྱིས་སྦྱིན་སྲེག་གི་ཤིང་བླངས་ཏེ་བུ་ཨི་སཱག་གི་རྒྱབ་ལ་བཀལ་ཏེ། རང་གི་ལག་པ་ལ་མེ་དང་གྲི་ཁྱེར་ནས་དེ་གཉིས་མཉམ་དུ་སོང་ངོ་། ༧ དེའི་ཚེ་ཨི་སཱག་གིས་ཕ་ཨབ་ར་ཧམ་ལ་འདི་སྐད་དུ། ངའི་ཕ་ཞེས་ཞུས་པ་དང་། དེས་ངའི་བུ་ང་འདི་རུ་ཡོད་སྨྲས་པ་དང་། ཁོས་གཟིགས་ཤིག མེ་དང་ཤིང་འདུག་ཀྱང་། སྦྱིན་སྲེག་གི་ལུག་དེ་ག་རུ་ཡོད་ཞུས་པ་དང་། ༨ ཨབ་ར་ཧམ་གྱིས། ངའི་བུ་དཀོན་མཆོག་གིས་མཆོད་པར་བྱ་བའི་ལུག་སྦྱོར་བར་འགྱུར་རོ་སྨྲས་ནས། དེ་གཉིས་མཉམ་དུ་སོང་ངོ་༎