༨ དེ་ནས་ཨ་བི་མེ་ལེག་ཐོ་རངས་ལ་ལངས་ཏེ་གཡོག་འཁོར་ཐམས་ཅད་བོས་ནས། དེ་དག་གི་རྣ་བ་ལ་གཏམ་དེ་ཐམས་ཅད་བཤད་པས། དེ་ཚོ་ཤིན་ཏུ་འཇིགས་སྐྲགས་སོ། ༩ ཡང་ཨ་བི་མེ་ལེག་གིས་ཨབ་ར་ཧམ་བོས་ཏེ་དེ་ལ། ཁྱོད་ཀྱིས་ང་ཚོ་ལ་ཅི་བྱས། ཁྱོད་ཀྱིས་ང་དང་ངའི་ཡུལ་ལ་ཉེས་པ་འདི་ཙམ་ཆེན་པོ་ཞིག་དྲངས་པས། ངས་ཁྱོད་ལ་ཉེས་པ་ཅི་བྱས། མི་རུང་བའི་བྱ་བ་ནི་ཁྱོད་ཀྱིས་ང་ལ་བྱས་སོ། ༡༠ ཡང་ཨ་བི་མེ་ལེག་གིས་ཨབ་ར་ཧམ་ལ། ཁྱོད་ཀྱིས་ཅི་མཐོང་ནས་དེ་ལྟར་བྱས་པ་ཡིན་སྨྲས་སོ། ༡༡ ཨབ་ར་ཧམ་གྱིས། གནས་འདི་རུ་དཀོན་མཆོག་ལ་འཇིགས་པ་ནི་ཡོངས་སུ་མེད་པས། དེ་དག་གིས་ཆུང་མའི་ཕྱིར་ང་རང་གསོད་ཡོང་བསམས་སོ། ༡༢ ཁོ་བདེན་པར་ངའི་སྲིང་མོ་ཡང་ཡིན། ངའི་ཕའི་བུ་མོ་ཡིན་རུང་ངའི་མའི་བུ་མོ་མ་ཡིན་པས། དེ་ལྟར་ངའི་ཆུང་མ་གྱུར་ཏོ། ༡༣ དེ་ནས་དཀོན་མཆོག་གིས་ངའི་ཕའི་ཁང་པ་ནས་འགྲོར་འཇུག་པར་མཛད་པའི་ཚེ་ངས་དེ་ལ། ཁྱོད་ང་ལ་དྲིན་འདི་བྱོས། གང་ཡང་རུང་བའི་གནས་སུ་ང་ཅག་སླེབ་ན། ཁོ་ངའི་མིང་པོ་ཡིན་སྨྲོས་ཤིག ༡༤ དེ་ནས་ཨ་བི་མེ་ལེག་གིས་ལུག་དང་། བ་གླང་དང་། གཡོག་པོ་དང་། གཡོག་མོ་རྣམས་ཁྲིད་དེ་ཨབ་ར་ཧམ་ལ་བསྟེར་བ་དང་། ཆུང་མ་ས་རཱ་ཁོ་ལ་ཕྱིར་ལོག་བཏང་ངོ་། ༡༥ ཡང་ཨ་བི་མེ་ལེག་གིས། ད་ངའི་ཡུལ་ཁྱོད་ཀྱི་མདུན་དུ་ཡོད་དེ། ཁྱོད་ག་རུ་དགའ་བའི་གནས་སུ་གཞིས་ཟུང་ཞིག ༡༦ ཡང་ས་རཱ་ལ། ད་ངས་ཁྱོད་ཀྱི་མིང་པོ་ལ་བསྟེར་བའི་དངུལ་སྟོང་དེ་ཁྱོད་དང་བཅས་སུ་ཡོད་པ་ཐམས་ཅད་ཀྱི་མདུན་དུ་དང་། གང་ཡང་རུང་བའི་གནས་སུ་ཁྱོད་ཀྱི་མིག་གི་ཁེབས་ཡིན། ཁྱོད་སྐྱོན་མེད་པར་གྱུར་པ་ཡིན་ཞེས་སྨྲས་སོ། ༡༧ ཨབ་ར་ཧམ་གྱིས་དཀོན་མཆོག་ལ་གསོལ་བ་བཏབ་པས། དཀོན་མཆོག་གིས་ཨ་བི་མེ་ལེག་དང་། རང་གི་ཆུང་མ་དང་། གཡོག་པོ་རྣམས་གསོ་བར་མཛད་དེ། དེ་དག་ལ་ཕྲུ་གུ་སྐྱེས་སོ། ༡༨ ཡ་ཧོ་ཝཱས་ཨབ་ར་ཧམ་གྱི་ཆུང་མ་ས་རཱའི་རྐྱེན་གྱིས་ཨ་བི་མེ་ལེག་གི་ཁང་པར་མངལ་ཚང་མ་ཡོངས་སུ་བཀག་པར་མཛད་དོ༎