བྱ་བ་དེའི་རྗེས་ལ་ཨབ་རམ་ལ་མཐོང་སྣང་དུ། ཡ་ཧོ་ཝཱའི་བཀའ་བྱོན་ནས་འདི་སྐད་དུ། ཨབ་རམ། མ་འཇིགས་ཤིག ང་ནི་ཁྱོད་ཀྱི་ཕུབ་དང་བྱ་དགའ་ཆེན་པོ་དེ་ཡིན་གསུངས་སོ། ༢ ཨབ་རམ་གྱིས་ཞུས་པ། གཙོ་བོ་ཡ་ཧོ་ཝཱ། ང་ནི་བུ་མེད་པར་འགྲོ་སྟེ། ད་མཱ་སེག་པ་ཨེ་ལི་ཨེ་ཟེར་འདི་ནི་ངའི་ཁྱིམ་གྱི་བདག་པོར་འགྱུར་འོང་བས། ཁྱེད་ཀྱིས་ང་ལ་ཅི་གནང་འོང་ཞུས་ནས། ༣ ཡང་ཨབ་རམ་གྱིས། ད་ཁྱེད་ཀྱིས་ང་ལ་ས་བོན་མ་གནང་བས། གཟིགས་ཤིག ངའི་ཁྱིམ་ནང་སྐྱེས་པ་དེ་ངའི་ནོར་བདག་པོར་འགྱུར་ཡོང་ཞུས་སོ། ༤ ལྟོས་ཤིག ཡ་ཧོ་ཝཱའི་བཀའ་ཞིག་བྱུང་སྟེ་ཁོ་ལ། འདིས་ཁྱོད་ཀྱི་ནོར་སྐལ་དབང་བར་འགྱུར་མི་ཡོང་། ཁྱོད་ཀྱི་ངང་ནས་འབྱུང་བ་ཞིག་གིས་ནོར་སྐལ་དབང་བར་འགྱུར་གསུངས་ནས། ༥ ཕྱི་རོལ་དུ་ཁྲིད་དེ་ཡང་དེ་ལ། ནམ་མཁའ་ལ་ལྟོས་ལ་སྐར་མ་རྣམས་རྩི་བར་ནུས་ན། རྩིས་ཤིག དེ་ལྟར་ཁྱོད་ཀྱི་རིགས་བརྒྱུད་ཡོད་པར་འགྱུར་གསུངས་སོ། ༦ ཁོས་ཡ་ཧོ་ཝཱ་ལ་དད་པ་བྱས་པས། དད་པ་དེ་ནི་ཁོའི་ཕྱིར་དྲང་བ་ཉིད་དུ་བརྩིས་སོ༎