ཡང་ས་ཐམས་ཅད་ལ་སྐད་གཅིག་དང་གཏམ་གཅིག་འབའ་ཞིག་ཡོད་པ་ཡིན། ༢ ཡང་མི་རྣམས་ཤར་ཕྱོགས་སུ་སོང་བ་ལས་ཤི་ནེ་ཨར་ཡུལ་ན་ཡོད་པའི་ཐང་ཞིག་ཐོབ་སྟེ་དེ་རུ་གནས་སོ། ༣ དེ་ནས་གཅིག་གིས་གཅིག་ལ། ད་ང་ཅག་གིས་པག་གུ་བྱས་ནས་མེས་སྲེག་པར་བྱའོ་སྨྲས་ནས། རྡོའི་ཚབ་ལ་པག་གུ་བྱས་ཤིང་འཇིམ་པའི་ཚབ་ལ་བྲག་ཞུན་བླངས་སོ། ༤ ཡང་དེ་དག་གིས་ད་གྲོང་ཁྱེར་ཞིག་དང་སྤེའུ་ཡི་རྩེ་མོ་ནམ་མཁའ་ལ་ཐུག་པ་ཞིག་བཟོ་བར་བྱ། དེ་ལྟར་རང་ཅག་གི་མིང་གྲགས་འདོན་པར་བྱའོ། དེ་མིན་རང་ཅག་ས་ཐམས་ཅད་ཀྱི་ངོས་སུ་ཡན་པར་འགྱུར་ཞེས་སྨྲས་སོ། ༥ དེའི་ཚེ་ཡ་ཧོ་ཝཱས་མིའི་བུ་རྣམས་ཀྱིས་བརྩིགས་པའི་གྲོང་ཁྱེར་དང་སྤེའུ་ལ་གཟིགས་པའི་ཕྱིར་བབས་སོ། ༦ དེ་ནས་ཡ་ཧོ་ཝཱས། ལྟོས་ཤིག་མི་བརྒྱུད་གཅིག་འབའ་ཞིག་ཡིན་ཏེ། དེ་ཚང་མ་ལ་སྐད་ཀྱང་གཅིག་འབའ་ཞིག་ཡོད་པས། འདི་ནི་དེ་དག་གིས་བྱེད་དུ་བརྩམས་པའི་འགོ་ཡིན་ཏེ། ད་ནི་དེ་དག་གིས་ཅི་དང་ཅི་བྱེད་དུ་གྲོས་བྱེད་པ་དེ་ལས་ཟློག་མི་འོང་བས། ༧ དེས་ན་དེ་དག་གཅིག་གིས་གཅིག་གི་སྐད་ཧ་གོ་བར་མི་འགྱུར་བའི་ཕྱིར། ང་ཅག་བབས་ཏེ་དེ་དག་གི་སྐད་འཛོལ་བར་བྱའོ་ཞེས་གསུངས་པ་དང་། ༨ ཡ་ཧོ་ཝཱས་དེ་དག་དེ་ནས་ས་ཐམས་ཅད་ཀྱི་ངོས་སུ་སོ་སོར་འགྱེ་བར་མཛད་པས། གྲོང་ཁྱེར་རྩིག་འཕྲོ་ལུས་སོ། ༩ དེའི་ཕྱིར་དེ་ལ་བཱ་བེལ་ཞེས་མིང་དུ་བཏགས་སོ། དེ་ཅིའི་ཕྱིར་ཞེ་ན། ཡ་ཧོ་ཝཱས་དེ་རུ་ས་ཐམས་ཅད་ཀྱི་སྐད་འཛོལ་བར་མཛད་དེ། ཡ་ཧོ་ཝཱས་དེ་དག་ས་ཐམས་ཅད་ཀྱི་ངོས་སུ་སོ་སོར་འགྱེ་བར་མཛད་པའི་ཕྱིར་རོ༎