༨ གཅེས་པ་རྣམས། གཙོ་བོའི་གཟིགས་ངོར་ཉིན་གཅིག་ནི་ལོ་སྟོང་དང་ལོ་སྟོང་ནི་ཉིན་གཅིག་དང་འདྲ་བ་ཡིན་པ་མ་རྗེད་ཅིག ༩ ཁ་ཅིག་གིས་སེམས་ཀྱང་གཙོ་བོས་ཉིད་ཀྱི་ཞལ་ཆད་ལ་བཤོལ་མི་འདེབས་ཤིང་། སུའང་འཇིག་པ་ལ་མི་དགྱེས་པར། ཐམས་ཅད་འགྱོད་ཚངས་སྐྱེད་པའི་ཕྱིར། ཁྱེད་ཚོའི་དོན་དུ་ཐུགས་སྣ་རིང་བར་མཛད་དོ། ༡༠ གཙོ་བོའི་ཉིན་མོ་དེ་རྐུན་མ་དང་འདྲ་བར་འོང་བར་འགྱུར། དེའི་ཚེ་ལྡིར་སྒྲ་ཆེན་པོས་ནམ་མཁའ་ཡལ་བར་འགྱུར། འབྱུང་བཞི་མེས་འཇུ་བར་འགྱུར། ས་དང་ས་ལ་ཡོད་པ་ཐམས་ཅད་བསྲེག་པར་འགྱུར་རོ༎

༡༡-༡༢ དེ་ལྟར་དེ་ཐམས་ཅད་ཞུ་རྒྱུ་ཡིན་པས། ཁྱེད་ལ་སྤྱོད་ལམ་བཟང་པོ་དང་ཆོས་སེམས་ཇི་ལྟ་བུ་ཞིག་ཡོད་དགོས། ནམ་མཁའ་འབར་ཞིང་འཇིག་ནས་འབྱུང་བཞི་མེས་ཞུ་བར་འགྱུར་བའི་དཀོན་མཆོག་གི་ཉིན་མོ་དེ་འོང་བའི་ཕྱིར་རིངས་ཤིང་སྒུག་པ་ཞིག་དགོས། ༡༣ ང་ཚོ་ནི་ཁོང་གི་ཞལ་ཆད་བཞིན་དུ། དྲང་བ་ཉིད་བཞུགས་པའི་ནམ་མཁའ་གསར་བ་དང་ས་གཞི་གསར་བའི་ཕྱིར་སྒུག་གོ།

༡༤ གཅེས་པ་རྣམས། ཁྱེད་ཚོ་དེའི་ཕྱིར་སྒུག་པས། ཁོང་གི་དྲུང་དུ་སྐྱོན་དང་རྨེ་བ་མེད་པར་ཞི་བདེ་དང་ལྡན་པ་འབྱུང་བར་བརྩོན་ཞིག ༡༥ ང་ཚོའི་གཙོ་བོས་ཐུགས་སྣ་རིང་བར་མཛད་པ་དེ་ཐར་པ་རུ་རྩིས་ཤིག ང་ཚོའི་གཅེས་པའི་སྤུན་པའུ་ལུས་ཀྱང་ཁོང་ལ་གནང་བའི་ཤེས་རབ་དང་དཔགས་ནས་ཁྱེད་ཚོར་དེ་བཞིན་དུ། ༡༦ ཕྲིན་ཡིག་ཐམས་ཅད་ཀྱི་ནང་འདིའི་ཕྲོས་བྱེད་ཅིང་བྲིས་པ་ཡིན། དེ་ཚོའི་ནང་ན་གོ་དཀའ་བ་ཁ་ཤས་ཡོད་དེ། བློ་གྲོས་མེད་ཅིང་བརྟན་པོ་མིན་པ་འགའ་རེས་གསུང་རབ་གཞན་ལ་བྱེད་པ་ལྟར་འདིའི་དོན་ཡང་འགྱུར་ནས་རང་འཕུང་བའི་རྒྱུར་བྱེད་དོ། ༡༧ དེའི་ཕྱིར་གཅེས་པ་རྣམས། འདི་རྣམས་ཁྱེད་ཚོས་སྔོན་དུ་ཤེས་པས། བཀའ་ཁྲིམས་མེད་པ་རྣམས་ཀྱི་འཁྲུལ་པའི་དབང་དུ་སོང་ནས་རང་གི་བརྟན་པ་མི་བརླག་པའི་ཕྱིར་གཅང་གྲུང་བྱོས་ཤིག ༡༨ ང་ཚོའི་གཙོ་བོ་དང་སྐྱབས་མགོན་ཡེ་ཤུ་མཱ་ཤི་ཀའི་ཐུགས་རྗེ་དང་རྟོགས་པའི་ནང་ཆེར་སྐྱེད་ཅིག ཁོང་ལ་ད་ལྟ་དང་མཐའ་མེད་པའི་ཉིན་མོའི་བར་དུ་བསྟོད་པ་འབྱུང་བར་ཤོག་ཅིག ཨ་མེན༎ ༎