༨ ཡོ་ཡཱ་ཀིན་གྱིས་རྒྱལ་སྲིད་བཟུང་བའི་ཚེ། ལོ་བཅོ་བརྒྱད་ལོན་པ་དང་། ཡེ་རུ་ཤ་ལེམ་དུ་ཟླ་བ་གསུམ་རྒྱལ་སྲིད་བསྐྱངས་སོ། ཡེ་རུ་ཤ་ལེམ་པ་ཨེལ་ནཱ་ཐན་གྱི་བུ་མོ་ནེ་ཧུས་ཐཱ་བྱ་བ་ནི་དེའི་ཡུམ་མོ། ༩ དེས་ཀྱང་རང་གི་ཡབ་མེས་ཀྱིས་བྱས་པ་བཞིན་དུ། ཡ་ཧོ་ཝཱའི་སྤྱན་སྔར་ངན་པ་ཡིན་པ་དེ་བྱས་སོ༎

༡༠ དེའི་ཚེ་བཱ་བེལ་གྱི་རྒྱལ་པོ་ནེ་བུ་ཀད་ནེ་ཙར་གྱི་བྲན་གཡོག་རྣམས་ཀྱིས་ཡེ་རུ་ཤ་ལེམ་དུ་དམག་དྲངས་ནས། རྒྱལ་ས་ལ་དམག་བསྐོར་བཏང་སྟེ། ༡༡ བཱ་བེལ་རྒྱལ་པོ་ནེ་བུ་ཀད་ནེ་ཙར་རང་གིས་ཀྱང་དེར་དམག་དྲངས་ཏེ། དེའི་བྲན་གཡོག་གིས་དེ་ལ་མཐའ་བསྐོར་བཏང་བས། ༡༢ ཡ་ཧུ་དཱའི་རྒྱལ་པོ་ཡོ་ཡཱ་ཀིན་རང་དང་། དེའི་ཡུམ་དང་། བྲན་འཁོལ་དང་། སྐུ་དྲག་དང་། ཉུག་རུམ་རྣམས་ཐོན་ནས། བཱ་བེལ་རྒྱལ་པོ་གང་ན་བར་སོང་སྟེ། བཱ་བེལ་རྒྱལ་པོས་སྲིད་བྱེད་པའི་ལོ་བརྒྱད་པར་ཁོང་བཟུང་བ་ཡིན། ༡༣ ཡ་ཧོ་ཝཱས་གསུངས་པ་བཞིན་དུ། དེས་ཡ་ཧོ་ཝཱའི་མཆོད་ཁང་གི་དཀོར་མཛོད་ཐམས་ཅད་དང་། རྒྱལ་པོའི་ཕོ་བྲང་གི་གཏེར་རྣམས་བཏོན་ཁྱེར་ཏེ། ཨིས་ར་ཨེལ་གྱི་རྒྱལ་པོ་ཤ་ལོ་མོས་ཡ་ཧོ་ཝཱའི་མཆོད་ཁང་གི་དོན་དུ་བཟོས་པའི་གསེར་གྱི་མཆོད་རྫས་ཚང་མ་དུམ་བུར་བཅག་གོ། ༡༤ ཡང་ཡེ་རུ་ཤ་ལེམ་པ་ཚང་མ་དང་། སྐུ་དྲག་ཀུན་དང་། དམག་གི་དཔའ་བོ་མཐའ་དག་དང་། ལག་ཤེས་དང་། མགར་བ་ཐམས་ཅད་སྡོམ་ནས་མི་སྟོང་ཕྲག་བཅུ་བཟུང་ཁྱེར་བས། ཡུལ་གྱི་ནོར་མེད་རྣམས་མ་གཏོགས་པར། དེར་སུའང་མ་ལུས་སོ། ༡༥ ཡང་དེས་ཡོ་ཡཱ་ཀིན་དང་། རྒྱལ་པོའི་ཡུམ་དང་། རྒྱལ་པོའི་ལྕམ་རྣམས་དང་། དེའི་ཉུག་རུམ་དང་། ཡུལ་གྱི་སྐུ་དྲག་རྣམས་བཟུང་སྟེ། ཡེ་རུ་ཤ་ལེམ་ནས་བཱ་བེལ་དུ་ཁྱེར་ཏོ། ༡༦ དེ་མ་ཟད་དེ། དཔའ་བོ་སྟོང་ཕྲག་བདུན་པོ་ཚང་མ་དང་། ལག་ཤེས་དང་མགར་བ་སྟོང་ཕྲག་གཅིག་གམ། རེམ་ལ་དམག་འགྱེད་ཆོག་ཡོད་པ་ཐམས་ཅད་བཱ་བེལ་རྒྱལ་པོས་བཟུང་ནས་བཱ་བེལ་དུ་ཁྱེར་ཏོ། ༡༧ དེ་ནས་བཱ་བེལ་རྒྱལ་པོས་ཡོ་ཡཱ་ཀིན་གྱི་ཨ་ཁུ་མད་ཐན་ཡཱ་དེའི་མལ་དུ་རྒྱལ་པོར་བཅུག་ཅིང་། མིང་སྤོས་ནས་ཚེ་དེག་ཡཱ་བཏགས་སོ༎

༡༨ ཚེ་དེག་ཡཱ་རྒྱལ་པོར་གྱུར་བའི་ཚེ། ལོ་ཉེར་གཅིག་ལོན་ཡོད་དེ། ཡེ་རུ་ཤ་ལེམ་དུ་ལོ་བཅུ་གཅིག་རྒྱལ་སྲིད་བྱས་སོ། ལིབ་ནཱ་པ་ཡེ་རེམ་ཡཱའི་བུ་མོ་ཧ་མུ་ཏལ་བྱ་བ་ནི་དེའི་ཡུམ་མོ། ༡༩ དེས་ཀྱང་ཡོ་ཡཱ་ཀིམ་གྱིས་བྱས་པ་ལྟར། ཡ་ཧོ་ཝཱའི་སྤྱན་སྔར་ངན་པ་ཡིན་པ་དེ་བྱས་སོ། ༢༠ དེ་ཅིའི་ཕྱིར་ཞེ་ན། ཡ་ཧོ་ཝཱའི་ཐུགས་ཁྲོའི་ནང་ནས་ཡེ་རུ་ཤ་ལེམ་དང་ཡ་ཧུ་དཱ་ལ་དེ་ལྟར་བྱུང་སྟེ། ཁོང་གིས་དེ་དག་ཁོང་ཉིད་ཀྱི་དྲུང་ནས་ཕར་སྐྲད་པར་མཛད་དོ། དེ་ནས་ཚེ་དེག་ཡཱས་བཱ་བེལ་གྱི་རྒྱལ་པོ་ལ་ངོ་ལོག་བྱས་སོ༎