ཡང་དེས་རྒྱལ་སྲིད་བཟུང་ནས་ལོ་དགུ་ངོའི་ཟླ་བ་བཅུ་པའི་ཚེས་བཅུ་པར། བཱ་བེལ་རྒྱལ་པོ་ནེ་བུ་ཀད་ནེ་ཙར་རང་དང་། དམག་དཔུང་དང་བཅས་སུ་ཡེ་རུ་ཤ་ལེམ་དུ་དམག་དྲངས་ཏེ། དེའི་མདུན་དུ་དམག་སྒར་ཕབ་ནས། དེའི་མཐའ་སྐོར་ནས་ཕག་ར་བརྩིགས་སོ། ༢ རྒྱལ་པོ་ཚེ་དེག་ཡཱའི་རྒྱལ་སྲིད་ཀྱི་ལོ་བཅུ་གཅིག་པའི་བར་དུ་རྒྱལ་ས་ལ་དམག་གིས་བསྐོར་བཞག་པས། ༣ ཟླ་བ་བཞི་པའི་ཚེས་དགུ་པ་ལ་རྒྱལ་སའི་ནང་དུ་མུ་གེ་བྱུང་བས། ཡུལ་མི་ལ་ཁ་ཟས་གང་ཡང་མེད་པ་ཡིན། ༤ དེ་ནས་རྒྱལ་ས་ལ་འཕྲོག་བཅོམ་བཏང་སྟེ། དམག་གི་སྐྱེ་བོ་ཐམས་ཅད་རྒྱལ་པོའི་ལྡུམ་རའི་མདུན་ལ་ཡོད་པའི་ལྕགས་རི་གཉིས་ཀྱི་བར་གྱི་རྒྱ་སྒོའི་ལམ་ལས་བྲོས་སོ། དེའི་ཚེ་ན་ཀལ་དཱི་པས་བསྐོར་ཡོད་པས། རྒྱལ་པོ་ཡང་ལམ་དེ་ནས་འབྲོག་སྟོང་གི་ཕྱོགས་སུ་སོང་ངོ་། ༥ དེར་ཀལ་དཱི་པའི་དམག་དཔུང་གིས་རྒྱལ་པོ་ལ་བདས་ནས། ཡེ་རི་ཀོའི་ཐང་དུ་ནོན་པ་དང་། ཁོང་གི་དམག་མི་ཐམས་ཅད་ཁོང་ལས་ཡན་ཏོ། ༦ དེ་ནས་དེ་དག་གིས་རྒྱལ་པོ་བཟུང་ནས་བཱ་བེལ་རྒྱལ་པོའི་དྲུང་དུ་རིབ་ལཱ་རུ་དྲངས་ནས། དེ་རྣམས་ཀྱིས་དེ་ལ་ཁྲིམས་བཅད་དེ། ༧ ཚེ་དེག་ཡཱའི་སྲས་རྣམས་ཡབ་ཀྱི་མིག་གི་མདུན་དུ་བསད། ཚེ་དེག་ཡཱའི་མིག་གཉིས་ཀ་བཏོན་ཏེ། ར་གན་གྱི་ཐག་པས་བཅིངས་ནས། བཱ་བེལ་དུ་ཁྱེར་ཏོ༎