མ་ན་ཤེས་རྒྱལ་སྲིད་བཟུང་དུས་སུ་ལོ་བཅུ་གཉིས་ལོན་ཡོད་དེ། ལོ་ལྔ་བཅུ་ང་ལྔའི་བར་དུ་ཡེ་རུ་ཤ་ལེམ་དུ་རྒྱལ་སྲིད་བསྐྱངས་སོ། དེའི་ཡུམ་གྱི་མཚན་དུ་ཧེབ་ཙི་བཱ་ཞེས་ཟེར་རོ། ༢ དེས་ཡ་ཧོ་ཝཱའི་གཟིགས་ངོར་ངན་པ་ཡིན་པ་དེ་བྱས་ཏེ། ཡ་ཧོ་ཝཱས་ཨིས་ར་ཨེལ་གྱི་མདུན་ནས་བསྐྲད་པར་མཛད་པའི་ཕྱི་པ་རྣམས་ཀྱི་ཞེན་ལོག་གི་བྱ་བ་ལ་སྤྱོད་ཅིང་། ༣ དེས་རང་གི་ཡབ་ཧིས་ཀི་ཡཱས་བཤིག་པའི་མཐོ་གླིང་རྣམས་ཡང་སྐྱར་བརྩིགས་ཏེ། ཨིས་ར་ཨེལ་གྱི་རྒྱལ་པོ་ཨ་ཧབ་ཀྱིས་བགྱིས་པ་ལྟར་དུ་བ་ཨཱལ་གྱི་ཕྱིར་མཆོད་ཁྲི་བཞེངས་ཏེ། ཨ་ཤེ་རཱ་ཞིག་བཟོས་ནས། གནམ་གྱི་སྐར་ཚོགས་ཐམས་ཅད་ལ་ཕྱག་འཚལ་ཞིང་བརྟེན་པ་ཡིན། ༤ ངས་ཡེ་རུ་ཤ་ལེམ་གྱི་ནང་དུ་ཉིད་ཀྱི་མཚན་གཞག་གོ། ཞེས་ཡ་ཧོ་ཝཱས་གསུངས་མོད། དེས་ཡ་ཧོ་ཝཱའི་མཆོད་ཁང་གི་ནང་དུ་དེ་ལྟ་བུའི་མཆོད་ཁྲི་རྣམས་བཞེངས་སོ། ༥ ཡང་དེས་ཡ་ཧོ་ཝཱའི་མཆོད་ཁང་གི་ཁྱམས་གཉིས་ཀའི་ནང་དུ་གནམ་གྱི་སྐར་ཚོགས་ཀུན་གྱི་ཆེད་དུ་མཆོད་ཁྲི་མང་པོ་བཞེངས་སོ། ༦ ཡང་དེས་རང་གི་བུ་མེའི་ནང་དུ་འགྲུལ་བཅུག་སྟེ། དུས་ཚོད་རྣམས་བསྲུངས། སྔགས་བཏབ། གཤིན་འདྲེ་འགུག་མཁན་དང་སྔགས་པ་དང་འདྲེས་ནས། ཡ་ཧོ་ཝཱའི་ཐུགས་ཁྲོ་དཀྲུག་པའི་ངན་པ་མང་པོ་ཁོང་གི་གཟིགས་ངོར་བྱས་ཏེ། ༧ ཡང་ཁོ་རང་གིས་བཟོས་པའི་ཨ་ཤེ་རཱ་ཡི་བཙོག་སྐུ་དེ་མཆོད་ཁང་དུ་བཙུགས་སོ། ཁྱིམ་དེའི་སྐོར་ལ་ཡ་ཧོ་ཝཱས་དཱ་བིད་དང་དེའི་སྲས་ཤ་ལོ་མོ་ལ། ཨིས་ར་ཨེལ་གྱི་སྡེ་ཐམས་ཅད་ལས་འདམས་པའི་ཡེ་རུ་ཤ་ལེམ་དང་ཕོ་བྲང་འདིར་ངས་རང་གི་མཚན་རྒྱུན་དུ་འཇོག་པར་བྱ། ༨ ཇི་སྟེ་དེ་དག་གིས་ངས་དེ་དག་ལ་བཀའ་སྩལ་པ་དང་། ངའི་བྲན་པོ་མོ་ཤེས་དེ་དག་ལ་བསྟན་པའི་བཀའ་ཁྲིམས་ཐམས་ཅད་སྲུང་ན། ངས་ཨིས་ར་ཨེལ་གྱི་རྐང་པ་ནི་ཕ་མེས་པོ་ལ་གནང་བའི་ཡུལ་ཁམས་ཀྱི་ནང་ནས་ནམ་དུ་ཡང་འཁྱར་དུ་མི་གཞུག་གོ། ཞེས་གསུངས་སོ། ༩ འོན་ཀྱང་དེ་དག་གིས་མ་ཉན་པར། མ་ན་ཤེས་དེ་རྣམས་འགོལ་དུ་བཅུག་པས། ཡ་ཧོ་ཝཱས་ཨིས་ར་ཨེལ་གྱི་མདུན་ལས་མེད་པར་མཛད་པའི་མི་བརྒྱུད་རྣམས་ལས་ཀྱང་དེ་རྣམས་ཀྱིས་ལྷག་པར་བྱ་བ་ངན་པ་བྱས་སོ༎