དེ་ནས་ཧིས་ཀི་ཡཱས་དེ་ཐོས་པར་ཙམ་གྱིས་རང་གི་ན་བཟའ་བཤགས་ནས། རྩྭ་ཕད་ཀྱིས་གཡོགས་ཏེ། ཡ་ཧོ་ཝཱའི་མཆོད་ཁང་དུ་ཆས་པ་དང་། ༢ རྒྱལ་ཁབ་ཀྱི་ནང་བློན་ཨེལ་ཡཱ་ཀིམ་དང་། ཡིག་མཁན་ཤེབ་ནཱ་དང་། བླ་མ་རྣམས་ཀྱི་དབུ་ཆོས་དག་རྩྭ་ཕད་ཀྱིས་གཡོགས་ནས། ཨ་མོས་ཀྱི་བུ་ལུང་སྟོན་པ་ཡེ་ཤ་ཡཱའི་དྲུང་དུ་མངགས་སོ། ༣ དེ་དག་གིས་དེ་ལ། ཧིས་ཀི་ཡཱས་འདི་ན་རེ། དེ་རིང་གི་ཉིན་མོ་ནི་སྡུག་བསྔལ་མཐོང་བ་དང་། ཀླན་ཀ་དང་། སྐུར་པའི་ཉིན་མོ་དེ་ཡིན། དེ་ཅིའི་ཕྱིར་ཞེ་ན། བུ་བཙའ་དུས་ལ་བབས་མོད། བཙའ་བའི་སྟོབས་དང་བྲལ་བས། ༤ ཁྱེད་ཀྱི་དཀོན་མཆོག་ཡ་ཧོ་ཝཱས་རབ་ཤཱ་ཀེའི་ཚིག་རྣམས་གསན་ཡོད་འགྲོ། དེའི་ཇོ་བོ་ཨ་སུར་རྒྱལ་པོས་མི་དེ་ནི་གསོན་པོའི་དཀོན་མཆོག་ལ་སྐུར་བ་འདེབས་པའི་དོན་དུ་འདིར་མངགས་སོ། དེས་ན་ཁྱེད་ཀྱི་དཀོན་མཆོག་ཡ་ཧོ་ཝཱས་གསན་པའི་ཚིག་རྣམས་ཀྱི་སྒོ་ནས་སྙད་འཛུག་པར་བྱའོ། དེའི་ཕྱིར་ཁྱེད་ཀྱིས་ལུས་ཡོད་པའི་ལྷག་མ་དེའི་དོན་དུ་གསོལ་བ་ཐོབ་ཅིག ཅེས་སྦྲན་ཏོ། ༥ དེ་ནས་ཧིས་ཀི་ཡཱའི་དྲུང་འཁོར་རྣམས་ཡེ་ཤ་ཡཱའི་དྲུང་དུ་བསླེབས་ནས། ༦ ཡེ་ཤ་ཡཱས་དེ་དག་ལ། ཁྱོད་ཅག་གི་ཇོ་བོ་ལ་འདི་སྐད་སྦྲོན་ཅིག ཡ་ཧོ་ཝཱས་འདི་སྐད་དུ། ཨ་སུར་གྱི་རྒྱལ་པོའི་བྲན་གཡོག་རྣམས་ཀྱིས་ང་ལ་སྐུར་པ་བཏབ་པའི་གཏམ་ཁྱོད་ཀྱིས་ཐོས་པ་དེ་ལ་མ་འཇིགས་ཤིག ༧ ལྟོས་ཤིག ངས་དེ་ལ་གདོན་གྱིས་གདོན་དུ་གཞུག ཡང་དེས་སྐད་ཆ་ཞིག་ཐོས་ནས། རང་ཡུལ་དུ་ལོག་འགྲོ་བར་འགྱུར། ཡང་ངས་ཁོ་རང་གི་ཡུལ་དུ་རལ་གྲིས་བསད་དོ། ཞེས་གསུང་ངོ་བྱས་སོ༎