ཡ་ཧུ་དཱའི་རྒྱལ་པོ་ཨ་ཧས་ཡཱའི་སྲས་ཡོ་ཨས་ཀྱིས་རྒྱལ་སྲིད་བཟུང་ནས་ལོ་ཉེར་གསུམ་པར། ཡེ་ཧུའི་སྲས་ཡོ་ཨ་ཧས་བྱ་བ་དེ་ས་མར་ཡཱ་རུ་ཨིས་ར་ཨེལ་གྱི་རྒྱལ་པོར་གྱུར་ནས། ལོ་བཅུ་བདུན་རྒྱལ་སྲིད་བསྐྱངས་སོ། ༢ དེས་ཡ་ཧོ་ཝཱའི་གཟིགས་ངོར་མི་རིགས་པ་སྤྱད་དེ། ཨིས་ར་ཨེལ་ལ་སྡིག་པ་བྱེད་དུ་བཅུག་པའི་ནེ་བཱད་ཀྱི་བུ་ཡེ་རོབ་ཨམ་གྱི་སྡིག་པ་རྣམས་ལ་བྲངས་ནས། དེ་རྣམས་ལས་མ་བྱོལ་ཏོ། ༣ དེར་ཡ་ཧོ་ཝཱའི་ཐུགས་ཁྲོ་ཨིས་ར་ཨེལ་པའི་ཐོག་ཏུ་འབར་ཏེ། དེ་དག་གི་ཚེ་ཐོག་ཐག་ཏུ་ཁོང་གིས་དེ་རྣམས་ཨ་རམ་རྒྱལ་པོ་ཧ་ཟ་ཨེལ་དང་དེའི་བུ་བེན་ཧ་དད་ཀྱི་ལག་ཏུ་བཏད་དོ། ༤ དེ་ནས་ཡོ་ཨ་ཧས་ཀྱིས་ཡ་ཧོ་ཝཱ་ལ་བཅོལ་བས། ཁོང་གིས་གསན་པར་མཛད་དོ། ཅིའི་ཕྱིར་ཞེ་ན། ཁོང་གིས་ཨིས་ར་ཨེལ་གྱི་སྡུག་བསྔལ་ལམ། ཨ་རམ་རྒྱལ་པོས་དེ་རྣམས་ལ་མནར་དུ་འཇུག་པའི་སྡུག་བསྔལ་ལ་གཟིགས་སོ། ༥ ཡང་ཡ་ཧོ་ཝཱས་ཨིས་ར་ཨེལ་ལ་སྐྱབས་མགོན་ཞིག་གནང་བས། ཨ་རམ་པའི་ལག་ནས་ཐར་ཏེ། ཨིས་ར་ཨེལ་སྔར་ལུགས་སུ་རེ་རང་གི་གུར་ནང་གནས་པ་ཡིན། ༦ དེ་ནས་ཀྱང་དེ་རྣམས་ཨིས་ར་ཨེལ་ལ་སྡིག་པ་བྱེད་དུ་བཅུག་པའི་ཡེ་རོབ་ཨམ་ཁྱིམ་གྱི་སྡིག་པ་རྣམས་ལས་མ་འབྱོལ་བར། དེའི་ནང་དུ་འགྲུལ་བ་དང་། ས་མར་ཡཱའི་ནང་དུ་ཨ་ཤེ་རཱའི་སྐུ་འདྲ་ཡང་ལུས་ནས་ཡོད་པ་ཡིན། ༧ ཡང་ཨ་རམ་རྒྱལ་པོས་དེ་རྣམས་མེད་པར་བྱས་ཏེ། གཡུལ་ཁའི་རྡུལ་ལྟ་བུར་བྱས་པའི་རྐྱེན་གྱིས། མི་སྡེའི་ནང་ནས་ཡོ་ཨ་ཧས་ཀྱི་ཕྱིར་དུ་རྟ་པ་ལྔ་བཅུ་དང་། ཤིང་རྟ་བཅུ་དང་། རྐང་ཐང་པ་སྟོང་ཕྲག་བཅུ་མ་གཏོགས་ལུས་སུ་མ་བཅུག་གོ། ༨ ཡོ་ཨ་ཧས་ཀྱི་གཞན་བྱ་བ་རྣམས་དང་། དེས་ཅི་དང་ཅི་བྱས་པ་ཐམས་ཅད་དང་། དེའི་སྟོབས་ཤུགས་ནི་ཨིས་ར་ཨེལ་གྱི་རྒྱལ་པོ་རྣམས་ཀྱི་རྒྱལ་རབས་ཀྱི་མདོའི་ནང་དུ་བྲིས་སོ། ༩ དེ་ནས་ཡོ་ཨ་ཧས་རང་གི་ཕ་མེས་ཀྱི་ཁྲོད་དུ་གཉིད་དུ་སོང་བ་དང་། དེ་དག་གིས་ཁོང་ས་མར་ཡཱ་རུ་བསྐུངས་ནས། དེའི་སྲས་ཡོ་ཨས་ནི་དེའི་མལ་དུ་རྒྱལ་པོ་གྱུར་ཏོ༎