དཱ་བིད་སྐུ་གཤེགས་པའི་དུས་ཉེ་བས། རང་གི་སྲས་ཤ་ལོ་མོ་ལ་ཞལ་ཆེམས་བཞག་ཅིང་ན་རེ། ༢ བདག་ནི་འཇིག་རྟེན་པ་ཐམས་ཅད་ཀྱི་ལམ་དུ་འགྲོ་བས། ཁྱོད་སྟོབས་དང་ལྡན་པར་གྱུར་ཅིག རང་ཁྱོ་ག་གྱིས་ཤིག ༣ ཡ་ཧོ་ཝཱ་རང་གི་དཀོན་མཆོག་གིས་བཀའ་སྩལ་བ་ཐམས་ཅད་ལ་ནན་ཏན་བྱེད་ཅིང་། ཁོང་གི་གཤེགས་ལམ་ན་འགྲུལ་བ་དང་། ཁོང་གི་སྤྱད་མཚམས་རྣམས་དང་། བཀའ་རྒྱ་རྣམས་དང་། དཔང་མཛད་པ་ནང་བཞིན་སྤྱོད་པའི་ཕྱིར། མོ་ཤེའི་མདོའི་ནང་ན་བྲིས་པ་ཡིད་ལ་ཆོང་ཞིག་དང་། ཁྱོད་གང་དུ་ཕྱོགས་ཀྱང་། དོན་བགྲུབ་པར་འགྱུར་རོ། ༤ ཡ་ཧོ་ཝཱས་བདག་ལ། ཇི་སྟེ་ཁྱོད་ཀྱི་བུ་བརྒྱུད་ཀྱིས་རང་གི་ལམ་ལ་ཞིབ་ཏུ་ལྟ་ཞིང་། རང་གི་སྙིང་ཚང་མ་དང་སེམས་ཚང་མ་ནས་ངའི་མདུན་དུ་སེམས་དྲང་པོར་འགྲུལ་ན། ཁྱོད་ཀྱི་བུ་བརྒྱུད་ཨིས་ར་ཨེལ་གྱི་རྒྱལ་ཁྲི་ལས་ནམ་ཡང་འབྲལ་བར་མི་འགྱུར་རོ། ཞེས་བདག་གི་སྐོར་དུ་གསུངས་པའི་ཁོང་ཉིད་ཀྱི་བཀའ་ལ་ཆ་འཇོག་ཏུ་ཆུག་ཅིག ༥ དེའང་ཙེ་རུ་ཡཱ་ཡི་བུ་ཡོ་ཨབ་ཀྱིས་ང་དང་། ཨིས་ར་ཨེལ་གྱི་དམག་དཔོན་ནེར་གྱི་བུ་ཨབ་ནེར་དང་། ཡེ་ཐེར་གྱི་བུ་ཨ་མ་སཱ་གཉིས་ལ་ཇི་ལྟར་བྱས་པ་ཁྱོད་ལ་ཆ་ཡོད། ཁོས་བཟང་སྒྲིག་གི་དུས་སུ་དམག་འཐབ་ཀྱི་ཁྲག་ཕོས་ཏེ། དེའི་རྐེད་པ་ལ་བཅིང་བའི་སྐ་རགས་དང་། དེའི་རྐང་པར་གོན་པའི་ལྷམ་རྣམས་འཐབ་མོའི་ཁྲག་བསྐུས་བ་ཡིན། ༦ དེ་བས་ན་ཁྱོད་ཀྱིས་རང་གི་རིག་པ་བཞིན་དུ་བྱེད་ཅིང་། ཁོའི་མགོ་དཀར་དེ་ནི་ཞི་བདེ་བར་དུར་ཁུང་དུ་འགྲོར་མ་ཆུག་ཅིག ༧ འོན་ཀྱང་གིལ་ཨད་པ་བར་ཟིལ་ལཱ་ཨི་ཡི་བུ་རྣམས་ལ་དྲིན་བྱེད་ཅིང་། ཁྱོད་ཀྱི་གསོལ་ལྕོག་ལས་ཁ་ཟས་ཟ་བ་རྣམས་ཀྱི་ཁྲོད་དུ་སྲེས་ཤིག གང་ལ་ཞེ་ན། ཁྱོད་ཀྱི་སྤུན་ཨབ་ཤ་ལོམ་གྱི་རྐྱེན་གྱིས་ང་བྲོས་སྐབས་སུ། དེ་དག་ངའི་མདུན་དུ་འོངས་པའི་ཕྱིར་རོ། ༨ ཡང་ལྟོས་ཤིག བ་ཧུ་རིམ་ཡུལ་གྱི་བེན་ཡ་མིན་པ་གེ་རཱ་ཡི་བུ་ཤི་མེ་ཨི་བྱ་བ་ཁྱོད་དང་མཉམ་ཡོད། ང་མ་ཧ་ནཱ་ཨིམ་དུ་འགྲོ་བའི་དུས་སུ། ཁོས་ང་ལ་དམོད་མོ་བཏབ་སྟེ། ཡོར་དན་གྱི་མདུན་དུ་ང་ལ་བསུར་འོངས་པས། ངས་ཡ་ཧོ་ཝཱ་དཔང་དུ་བཙུག་ནས། རལ་གྲིས་ཁྱོད་གསོད་པར་མི་བྱའོ་སྨྲས་མོད། ༩ ཁོ་ནོངས་མེད་དུ་མ་སེམས་ཤིག ཁྱོད་བློ་གྲོས་ཅན་གྱིས་མི་ཡིན་པས། དེ་ལ་ཇི་ལྟར་བྱེད་དགོས་པ་ཁྱོད་ཀྱིས་ཤེས་ཏེ། དེའི་མགོ་དཀར་ནི་ཁྲག་གིས་ཚོས་སུ་བཅུག་ནས། དུར་ཁུང་དུ་ཕོབ་ཅིག ཅེས་བསྐུལ་ཏོ༎